မော်စကို၊ ဩဂုတ် ၃၁
အာတိတ်ဒေသတွင် နေတိုးအဖွဲ့၏ စစ်ရေးလှုပ်ရှားမှုများ တိုးမြှင့်လာခြင်းသည် ရုရှားနိုင်ငံ၏ လုံခြုံရေးကို တို-က်ရို-က်ခြိမ်းခြောက်နေပြီး လက်နက်ကိုင်ပဋိပက္ခ ဖြစ်ပွားနိုင်သည့် အန္တရာယ်ကိုပါ မြင့်တက်စေကြောင်း ရုရှားနိုင်ငံခြားရေးဝန်ကြီး ဆာဂီ လက်ဗရော့ဗ်က ပြောကြားသည်။
ရုရှားနိုင်ငံခြားရေးဝန်ကြီးဌာနက ဩဂုတ် ၃၁ ရက်တွင် ထုတ်ဝေသည့် ဆောင်းပါးတစ်ပုဒ်၌ လက်ဗရော့ဗ်က ယင်းသို့ ရေးသားခဲ့ခြင်းဖြစ်ပြီး အာတိတ်ဒေသ၌ နေတိုး၏ စစ်ရေးတည်ရှိမှုနှင့် လေ့ကျင့်မှုများ တိုးမြှင့်လာခြင်းအပေါ် မော်စကို၏ စိုးရိမ်မှုကို ထပ်မံဖော်ပြခဲ့သည်။
နေတိုးသည် မြောက်ဘက်အစွန်ဆုံးဒေသတွင် စစ်ရေးတည်ရှိမှု အားကောင်းစေရန် Arctic Sentry အမည်ရှိ မစ်ရှင်ကို ဖေဖော်ဝါရီလတွင် စတင်ခဲ့ပြီး ယင်းနောက် အာတိတ်ဒေသဆိုင်ရာ လုံခြုံရေးအပေါ် မဟာမိတ်အဖွဲ့၏ အာရုံစိုက်မှု ပိုမိုမြင့်တက်လာခဲ့သည်။
ရုရှားကမူ Arctic Sentry မစ်ရှင်ကို ကန့်ကွက်ထားပြီး အာတိတ်ဒေသအတွင်း နေတိုး၏ စစ်ရေးလေ့ကျင့်မှုများကို ရန်လိုသည့် လုပ်ရပ်များအဖြစ် ရှုမြင်ထားသည်။
“မြောက်ဘက်စွန်းဒေသတွင် ယင်းကဲ့သို့သော စစ်ရေးလှုပ်ရှားမှုများသည် ရုရှား၏ လုံခြုံရေးကို တို-က်ရို-က်ခြိမ်းခြောက်နေပြီး လက်နက်ကိုင်ပဋိပက္ခ ဖြစ်ပွားစေနိုင်သည့် အန္တရာယ်ရှိသော ဖြစ်ရပ်များ ပေါ်ပေါက်နိုင်ခြေကို မြင့်တက်စေသည်” ဟု လက်ဗရော့ဗ်က ဆိုသည်။
အာတိတ်ဒေသသည် ရုရှားအတွက် မဟာဗျူဟာမြောက် အရေးပါသည့် ဒေသတစ်ခုဖြစ်ပြီး နျူကလီးယားလက်နက်တပ်ဆင်ထားသည့် ရေငုပ်သင်္ဘောများအပါအဝင် ရေတပ်အင်အားများ ဖြန့်ကြက်ထားသည့်အပြင် အာရှနိုင်ငံများနှင့် ဆက်သွယ်နိုင်မည့် မြောက်ပိုင်းပင်လယ်ရေကြောင်းလမ်းကိုလည်း ဖွံ့ဖြိုးတိုးတက်အောင် ဆောင်ရွက်လျက်ရှိသည်။
ရုရှားသည် အာတိတ်ဒေသတွင် ကြီးမားသည့် စစ်ရေးတည်ရှိမှုနှင့် ကျယ်ပြန့်သည့် စစ်ရေးအခြေခံအဆောက်အအုံများ ပိုင်ဆိုင်ထားပြီး မကြာသေးမီနှစ်များအတွင်း တရုတ်နိုင်ငံကလည်း မော်စကိုနှင့် ပူးပေါင်းကာ သဘာဝသယံဇာတကြွယ်ဝသည့် ယင်းဒေသတွင် လှုပ်ရှားမှုများ တိုးမြှင့်လာခဲ့သည်။
တစ်ချိန်တည်းတွင် ရုရှားနှင့် နယ်နိမိတ်ချင်းထိစပ်နေသည့် နော်ဝေနိုင်ငံကလည်း အာတိတ်ဒေသအခြေစိုက် တပ်မဟာတစ်ခုကို တိုးချဲ့ဖွဲ့စည်းခဲ့ပြီး ယင်းသည် ၂၀၂၂ ခုနှစ် ရုရှား-ယူကရိန်းစစ်ပွဲ စတင်ပြီးနောက် နေတိုးအဖွဲ့ဝင်နိုင်ငံများ၏ မြောက်ပိုင်းဒေသ ကာကွယ်ရေးအင်အား မြှင့်တင်မှုများအနက် နောက်ဆုံးလှုပ်ရှားမှုတစ်ခု ဖြစ်လာခဲ့သည်။
Ref: Frankfurter Rundschau