အာဆီယံ မစ်ဆူဘီရှီဖလားပြိုင်ပွဲ အုပ်စု (က)အဖွင့်ပွဲစဉ်ကို ယမန်နေ့ ဒီဇင်ဘာ (၈)ရက် ညနေပိုင်းက ကျင်းပပြုလုပ်ရာ ထိုင်းအသင်းက တီမောအသင်းကို (၁၀) ဂိုးသွင်းယူ၍ အနိုင် ရရှိခဲ့သည်။
အဆိုပါ ပွဲစဥ်အတွင်း ထိုင်းအသင်းက လူငယ်ကစားသမားအများစုဖြင့် ပွဲထွက်လာသည်ကို တွေ့ရှိရပြီး၊ ပထမပိုင်းမှာ (၄) ဂိုး ဒုတိယပိုင်းမှာ (၆) ဂိုး စုစုပေါင်း (၁၀) ဂိုးအထိ သွင်းယူခဲ့ခြင်းဖြစ်သည်။
ထိုင်းအသင်းအနေဖြင့် အုပ်စုဒုတိယပွဲစဥ်က်ု ဒီဇင်ဘာ (၁၄) ရက်၌ မလေးရှားအသင်းဖြင့် ဆက်လက်ယှဥ်ပြိုင်ရမည်ဖြစ်သည်။
အလားတူ ယမန်နေ့တွင် အာဆီယံ မစ်ဆူဘီရှီဖလား အုပ်စု (က) အဖွင့်ပွဲစဥ်၌ ကမ္ဘောဒီးယားအသင်းနှင့် မလေးရှားအသင်းကို ယှဉ်ပြိုင်ကစားရာ တစ်ဖက် (၂)ဂိုးစီ ဖြင့် သရေရလဒ် ထွက်ပေါ်ခဲ့သည်။
ပွဲစဉ်အတွင်း ကမ္ဘောဒီးယားက မလေးရှားကို မိနစ် (၇၀) ကျော်အထိ (၂)ဂိုး (၁)ဂိုးဖြင့် ဦးဆောင်နိုင်ခဲ့သည်။
ထို့နောက် ပွဲကစားချိန် (၇၄) မိနစ်၌ မလေးရှားအသင်း၏ တိုက်စစ်မှူး တီယာနေးက ချေပဂိုးပြန်သွင်းနိုင်ခဲ့သည့်အတွက် ပွဲအပြီးတွင် (၂)ဂိုးစီဖြင့် သရေရလဒ်ထွက်ပေါ်ခဲ့ခြင်းဖြစ်သည်။
မစ်ဆူဘီရှီဖလား အုပ်စု (က) တွင် ထိုင်း၊ ကမ္ဘောဒီးယား၊ မလေးရှား၊ စင်ကာပူ၊ တီမော တို့ တစ်အုပ်စုတည်း ကျရောက်နေကြခြင်းဖြစ်သည်။