(၁၈)ကြိမ်မြောက် အာဆီယံပတ်ဝန်းကျင်ဆိုင်ရာ ဝန်ကြီးများအဆင့် အစည်းအဝေးနှင့် ဆက်စပ်အစည်းအဝေးများကို မလေးရှားနိုင်ငံမှ Hybrid စနစ်ဖြင့် အိမ်ရှင်အဖြစ်လက်ခံကျင်းပလျက်ရှိရာ မြန်မာနိုင်ငံမှလည်း တက်ရောက်ခဲ့ကြောင်း သိရသည်။
အဆိုပါအစည်းအဝေးကို စက်တင်ဘာ ၂ ရက်မှ ၄ ရက်အထိကျင်းပလျက်ရှိရာ အစည်းအဝေးဒုတိယနေ့ဖြစ်သည့် စက်တင်ဘာ ၃ ရက်တွင် ဥက္ကဌအဖြစ် မလေးရှားနိုင်ငံသယံဇာတနှင့်သဘာဝပတ်ဝန်းကျင် ရေရှည်တည်တံ့ရေးဝန်ကြီးဌာန ခေတ္တဝန်ကြီး Datuk Seri Johari Abdul Ghaniနှင့် ဒုတိယဥက္ကဌအဖြစ် မြန်မာနိုင်ငံသယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန ဒုတိယဝန်ကြီး ဦးမင်းသူတို့ကဆောင်ရွက်ပြီး အဖွင့်အမှာစကားပြောကြားခဲ့ကြောင်း သိရသည်။
အစည်းအဝေးပထမပိုင်းတွင် အာဆီယံဒေသတွင်း ဇီဝမျိုးစုံမျိုးကွဲထိန်းသိမ်းရေး၊ ပင်လယ်ကမ်းရိုးတန်း၊ ရေသယံဇာတ၊ ရာသီဥတုပြောင်းလဲမှုလျှော့ချရေး၊ဓာတုစွန့်ပစ်ပစ္စည်းများ၊ ပတ်ဝန်းကျင်ဆိုင်ရာပညာပေးရေစ၊ ရေရှည်တည်တံ့သော ထုတ်လုပ်မှုနှင့်စားသုံးမှုများဆိုင်ရာ အစီရင်ခံစာများနှင့်ရလဒ်များကို ဆွေးနွေးခဲ့ကြောင်း သိရသည်။
ဒုတိယပိုင်း၌ အာဆီယံဒေသတွင်း Fire Hotspot နှင့် မီးခိုးမြူငွေ့ဖြစ်ပေါ်မှုအခြေအနေ၊ ခြောက်သွေ့ရာသီတွင် မီးခိုးမြူငွေ့ဖြစ်ပေါ်နိုင်သည့် မိုးလေဝသခန့်မှန်းချက်နှင့် နိုင်ငံအလိုက် မီးခိုးမြူငွေ့လျှော့ချရေး ဆောင်ရွက်နေမှုအခြေအနေများ၊ နယ်စပ်ဖြတ်ကျော် မီးခိုးမြူငွေ့ညစ်ညမ်းမှု ထိန်းချုပ်ရေးဆိုင်ရာ အာဆီယံပူးပေါင်းဆောင်ရွက်ရေး လမ်းပြမြေပုံ(၂၀၂၃-၂၀၃၀)၊ အာဆီယံသစ်ဆွေးမြေ စီမံအုပ်ချုပ်မှုမဟာဗျူဟာ(၂၀၂၃-၂၀၃၀)နှင့် မီးခိုးမြူငွေ့ကင်းစင်၍ ရေရှည်တည်တံ့သော မြေယာစီမံခန့်ခွဲရေးအတွက် အာဆီယံရင်းနှီးမြှုပ်နှံမှု မူဘောင်တို့ကို အကောင်အထည်ဖော်ဆောင်ရွက်မှုအခြေအနေ၊ နယ်စပ်ဖြတ်ကျော်မီးခိုးမြူငွေ့ညစ်ညမ်းမှု ထိန်းချုပ်ရေးဆိုင်ရာ အာဆီယံညှိနှိုင်းရေးဗဟိုဌာန တည်ထောင်ရေးဆောင်ရွက်မှုအခြေအနေများနှင့်ပတ်သက်၍ ဆွေးနွေးခဲ့ကြကြောင်းလည်း သိရသည်။