ထိုင်းဝန်ကြီးချုပ် ပေတုံတန်ရှင်နာဝပ်ထရာသည် ၄၆ ကြိမ်မြောက် အာဆီယံ ထိပ်သီးအစည်းအဝေးကို တက်ရောက်ရန် တနင်္ဂနွေနေ့တွင် မလေးရှားနိုင်ငံသို့ ထွက်ခွာသွားခဲ့ပြီး ခေါင်းဆောင်များသည် “အားလုံးပါဝင်မှုနှင့် ရေရှည်တည်တံ့ခိုင်မြဲမှု” ခေါင်းစဉ်ဖြင့် ဒေသတွင်း၏ လမ်းကြောင်းကို ဆွေးနွေးပုံဖော်ကြမည်ဖြစ်သည်။
ဝန်ကြီးချုပ်သည် တနင်္လာနှင့် အင်္ဂါနေ့တို့တွင် ၄၆ ကြိမ်မြောက် အာဆီယံထိပ်သီးအစည်းအဝေးကို တက်ရောက်မည်ဖြစ်သည်။ အစည်းအဝေးကို မလေးရှားအစိုးရက လက်ခံကျင်းပခြင်းဖြစ်သည်။ သူသည် အာဆီယံအစည်းအဝေးခုနှစ်ခုကို ပါဝင်တက်ရောက်မည်ဖြစ်သကဲ့သို့ ၁၆ ကြိမ်မြောက် အင်ဒိုနီးရှား၊ မလေးရှား၊ ထိုင်း ဖွံ့ဖြိုးတိုးတက်ရေးတြိဂံ(IMT-GT) ခေါင်းဆောင်များ အစည်းအဝေးကိုလည်း တက်ရောက်မည်ဖြစ်ကြောင်း အစိုးရပြောရေးဆိုခွင့်ရှိသူ Jirayu Houngsub က စနေနေ့တွင် ပြောကြားခဲ့သည်။
ထိုအစည်းအဝေးသည် ယခုနှစ်အတွင်း အာဆီယံခေါင်းဆောင်များ၏ ပထမဆုံး အဓိကအစည်းအဝေးဖြစ်ပြီး ဒေသ၏ ဦးတည်ချက်များနှင့် ၎င်းတို့၏ အမြင်များကို ခေါင်းဆောင်များက ဆွေးနွေးကြမည်ဖြစ်သည်။
အစည်းအဝေးသို့ အာဆီယံ ၉ နိုင်ငံမှ နိုင်ငံတော်အကြီးအကဲများအပြင် မြန်မာနိုင်ငံခြားရေးဝန်ကြီးဌာန အမြဲတမ်းအတွင်းဝန်သည်လည်း ပါဝင်တက်ရောက်မည်ဖြစ်သည်။
အဓိက အလေးပေးမည့်ကိစ္စရပ်သည် လာမည့် နှစ် ၂၀ အတွင်း ဒေသ၏ ဖွံ့ဖြိုးတိုးတက်မှုအတွက် ရေရှည် စီမံကိန်းတစ်ခုဖြစ်သော 2045 Asean Community Vision ကို ထောက်ခံအတည်ပြုကြရေးဖြစ်သည်။
ယခုနှစ်၏ အာဆီယံအလှည့်ကျ ဥက္ကဌဖြစ်သော မလေးရှားနိုင်ငံ၏ ဝန်ကြီးချုပ် အန်ဝါအီဘရာဟင်မ်သည် အင်္ဂါနေ့တွင် ဘာရိန်း၊ ကူဝိတ်၊ အိုမန်၊ ကာတာ၊ ယူအေအီးနှင့် ဆော်ဒီအာရေဗျနိုင်ငံတို့ပါဝင်သော ပင်လယ်ကွေ့ပူးပေါင်းဆောင်ရွက်ရေးကောင်စီ(ဂျီစီစီ) မှ ခေါင်းဆောင်များ၊ တရုတ်ဝန်ကြီးချုပ် လီချန်းတို့နှင့် အစည်းအဝေးကိုလည်း လက်ခံကျင်းပမည်ဖြစ်သည်။
အဆိုပါ အစည်းအဝေးသည် အာဆီယံနှင့် အလားအလာရှိသော ပြင်ပမိတ်ဖက်များအကြား ပူးပေါင်းဆောင်ရွက်မှုကို ရှာဖွေရန်ရည်ရွယ်ကြောင်း သိရသည်။
Ref: ဘန်ကောက်ပို့စ်