မန္တလေးတိုင်း၊ မိတ္ထီလာမြို့တွင် MSME များရှိရာ စပါးခွံလောင်စာတောင့်ဖြင့် လျှပ်စစ်ဓာတ်အားထုတ်လုပ်အသုံးပြုနေသော “မိဘမေတ္တာ”အဆင့်မြင့်ဆန်စက်လုပ်ငန်း၊ ကျီတော်ကုန်းရပ်ကွက်၌ ၄၅နှစ်သက်တမ်းရှိ”သိန်းမင်း”ငရုတ်သီးမှုန့်ထုတ်လုပ်ရေးလုပ်ငန်းတို့ကို နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ဇူလိုင် ၁၀ ရက်က သွားရောက်အားပေးခဲ့သည်။
ဆန်စက်များမှထွက်ရှိလာသည့် စပါးခွံများကို အလေအလွင့်မရှိဘဲပတ်ဝန်းကျင်သန့်ရှင်းမှုနှင့် ထင်းသုံးစွဲမှုကို လျော့ ကျစေသည့် ထင်းအစားထိုး စပါးခွံလောင်စာတောင့်ထုတ်လုပ်နိုင်မှု၊ စပါးခွံလောင်စာတောင့်အသုံးပြုသည့် Gasifier စက်ဖြင့် အင်ဂျင်လည်ပတ်ကာ လုပ်ငန်းသုံးလျှပ်စစ်ဓာတ်အားပြန်လည်ထုတ်လုပ်ခြင်းတို့တွင် အသုံးပြုနေကြသည်။
မိတ္ထီလာမြို့၊ ဝမ်းတော်ပြည့်တိုးချဲ့၊ နယ်မြေ(၈)၊ ကျီတော်ကုန်းရပ်ကွက်ရှိ “သိန်းမင်း”အမှတ်တံဆိပ် ငရုတ်သီးမှုန့်ထုတ်လုပ်ရေးလုပ်ငန်းတွင်လည်း ပိုးသတ်ပြီးငရုတ်သီးများအား နေရောင်ခြည် စွမ်းအင်သုံးအခြောက်ခံစက်အတွင်း၌ ငရုတ်သီးအမျိုးအစားအလိုက် Moisture (၈ မှ ၁၀)အထိ ကျအောင်အခြောက်ခံထားခြင်း၊
ငရုတ်ခြောက်များအား အညှာခြွေသန့်စင်မှု၊ သန့်စင်ပြီးငရုတ်ခြောက်များအား မှိုဝင်မှုမရှိစေရေး Moisture ၅ အထိကျအောင်အခြောက်ခံ၍ ကြိတ်ခွဲပြီးထွက်ရှိလာသည့် ကုန်ချောများကို သန့်ရှင်းစွာထုပ်ပိုးနေမှုတို့က စားသုံးသူဘေးကင်းရေး စေတနာနှင့် စီးပွါးဖြစ်ရေး ပညာတို့ပေါင်းစပ်ကာ ပြည်တွင်း ထုတ်လုပ်မှုကို အရှိန်ရစေမည်ဖြစ်သည်။
ဒေသမှထွက်ရှိသည့် ငရုတ်သီးများ ၊ ဧရာဝတီတိုင်း၊ မကွေးတိုင်း၊ ရှမ်းပြည်နယ်တို့မှထွက်ရှိသည့်ငရုတ်သီးများဖြင့် ငရုတ်ချဉ်၊ ငရုတ်သီးမှုန့်၊ အရောင်တင်မှုန့်နှင့် ငရုတ်ဆော့ တို့ကို ထုတ်လုပ်ရောင်းချနိုင်သည်။
စျေးကွက်အနေနှင့်လည်း တနိုင်ငံလုံးသို့ဖြန့်နိုင်သလို ဒေသတွင်းနိုင်ငံများသည်လည်း ငရုတ်သီးအသုံးများသည့်နိုင်ငံများဖြစ်သဖြင့် အခွင့်အလမ်းများရှိဆဲဖြစ်သည်။
MSNE များသည် အလုပ်အကိုင်အခွင့်အလမ်းများပေါလာစေသလို ပို့ကုန်အဖြစ်မလုပ်နိုင်သေးလျှင်တောင်မှ သွင်းကုန်အစားထိုးနိုင်ခြင်းက တိုင်းပြည်အတွက် အကျိုးများစေသဖြင့် MSME များကို အားလုံးက အားပေးနေကြချိန်လည်းဖြစ်သည်။