အသည်းရောင်အသားဝါရောဂါ(စီ)ပိုးအား ကုသဆေးများဖြင့် (လုံးဝ)ပျေ-ာက်ကင်းအောင်ကုသနိုင်သည်ဟု ကျန်းမာရေးဝန်ကြီးဌာန ပြည်ထောင်စုဝန်ကြီးပါမောက္ခဒေါက်တာသက်ခိုင်ဝင်းမှ ဇွန် ၄ ရက်နံနက်ပိုင်းက အသည်းရောင်အသားဝါရောဂါကာကွယ်ထိန်းချုပ်ရေးလုပ်ငန်းညှိနှိုင်းအစည်းအဝေးတွင် ပြောကြားခဲ့ခြင်းဖြစ်သည်။
လက်ရှိအချိန်၌ ပြည်သူ့ဆေးရုံကြီး(၁၄)ရုံတွင် အသည်းရောင်အသားဝါ(စီ)ပိုးကုသမှုဆောင်ရွက်ပေးလျက်ရှိပြီး အသည်းရောင်အသားဝါရောဂါ(ဘီ)ပိုးကိုလည်း ကာကွယ်ဆေးများစနစ်တကျထိုးနှံမှုခံယူခြင်းဖြင့်ကာကွယ်နိုင်သည်ဟု ပြောသည်။
ထို့အတူ ပြည်သူ့ဆေးရုံများတွင်လာရောက်မွေးဖွားသည့် မွေးကင်းစကလေးများကို အသည်းအရောင်အသားဝါ(ဘီ)ပိုးကာကွယ်ဆေးထိုးပေးခြင်းနှင့် အသက်(၅)နှစ်အောက်ကလေးများတွင် အသည်းရောင်အသားဝါ(ဘီ)ပိုးကာကွယ်ဆေးပါဝင်သည့် ငါးမျိုးစပ်ကာကွယ်ဆေးကို လေးကြိမ်ထိုးနှံပေးခြင်းများဖြင့် အသည်းရောင်အသားဝါရောဂါ(ဘီ)ပိုးကို ကာကွယ်တားဆီးပေးလျက်ရှိသည်ဟု ပြောသည်။
ထို့ကြောင့် ဆေးနှင့်ဆေးပစ္စည်းများကို လူနာများအတွက်အကျိုးရှိထိရောက်စွာအသုံးပြုနိုင်ရေးနှင့် လူနာဆေးကုသမှုပိုမိုဆောင်ရွက်ပေးနိုင်ရေးတို့အတွက် ပေါင်းစပ်ညှိနှိုင်းဆောင်ရွက်ပေးကြရမည်ဟုလည်း ပြောကြားခဲ့သည်။
အဆိုပါ အသည်းရောင်အသားဝါရောဂါကာကွယ်ထိန်းချုပ်ရေး လုပ်ငန်းညှိနှိုင်းအစည်းအဝေးအား ဇွန် ၄ ရက်မှ ၅ ရက်အထိကျင်းပသွားမည်ဖြစ်ကာ အသည်းရောင်အသားဝါရောဂါကာကွယ်ထိန်းချုပ်ရေးလုပ်ငန်းများ ဆောင်ရွက်မှုအခြေအနေနှင့် အခက်အခဲများအား သုံးသပ်ဆွေးနွေးခြင်း၊ မြန်မာနိုင်ငံတွင် အိတ်ချ်အိုင်ဗွီ၊ ကာလသားရောဂါနှင့် အသည်းရောင်အသားဝါ ဘီရောဂါကင်းစင်ပပျေ-ာက်ရေး(Triple Elimination)နှင့် အသည်းရောင်အသားဝါရောဂါကာကွယ်ထိန်းချုပ်ရေးအမျိုးသားအဆင့် မဟာဗျူဟာစီမံချက်ကို ပြန်လည်သုံးသပ်၍ ရှေ့ဆက်ဆောင်ရွက်မည့်လုပ်ငန်းများ ချမှတ်ခြင်းတို့ကို ပြုလုပ်သွားကြမည်ဖြစ်သည်။