ရန်ကုန်တိုင်း ဒေသကြီးမှ တိုင်းဒေသကြီးနှင့် ပြည်နယ်အသီးသီးသို့ ပြေးဆွဲပေးနေသည့် အောင်မင်္ဂလာအဝေးပြေးဝင်းနှင့် ဒဂုံဧရာအဝေးပြေးဝင်းများမှ အဝေးပြေးယာဉ်လိုင်းများတွင် တင်ဆောင်သည့်ကုန်ပစ္စည်းများကို ဖွင့်ဖောက်စစ်ဆေးပြီးမှသာ တင်ဆောင်ခွင့်ပြုရန် ညွှန်ကြားထားကြောင်း ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ (YRTC) အဝေးပြေးဌာနမှသိရသည်။
ဥပဒေနှင့်မလွတ်ကင်းသည့် ပစ္စည်းများတင်ဆောင်မှုမရှိစေရန်နှင့် လုံခြုံစိတ်ချမှုရှိစေရန် ဖွင့်ဖောက်စစ်ဆေးခြင်းများ လုပ်ဆောင်ရန် ညွှန်ကြားထားခြင်းဖြစ်ပြီး အစစ်ဆေးမခံသည့် ပစ္စည်းများကို ပြန်လည်ပေးအပ်ရန် ညွှန်ကြားထားကြောင်းလည်း သိရသည်။
ရန်ကုန်မြို့မှနိုင်ငံတစ်ဝန်းသို့ အဝေးပြေးယာဉ် လိုင်းပေါင်း (၁၆၉)လိုင်းပြေးဆွဲပေးနေပြီး ဧရာဝတီတိုင်းဒေသကြီးမှအပကျန်သော တိုင်းဒေသကြီးနှင့် ပြည်နယ်များသို့ အောင်မင်္ဂလာ အဝေးပြေး ကားဝင်းတွင် ယာဉ်လိုင်း (၁၀၇)လိုင်းမှ ယာဉ်အစီးရေ (၂၃၅)စီးနှင့် ခရီးသွား (၂၉၀၀) ကျော်ကို ဝန်ဆောင်မှုပေးလျက်ရှိကြောင်း သိရသည်။
ဧရာဝတီတိုင်းဒေသကြီးသို့ ပြေးဆွဲသော ဒဂုံ-ဧရာ အဝေးပြေးကားဝင်းတွင် ယာဉ်လိုင်းပေါင်း (၆၂)လိုင်း မှယာဉ်အစီးရေ (၁၁၆) စီးဖြင့်ခရီးသွား (၁၁၀၀)ကျော် ကို နေ့စဉ်ဝန်ဆောင်မှုပေးလျက်ရှိကြောင်း သိရသည်။
ရန်ကုန်မြို့မှ နိုင်ငံတစ်ဝန်းသို့ ပြေးဆွဲသော အဝေးပြေးယာဉ်လိုင်းပေါင်း (၃၈၆) လိုင်းရှိပြီး အောင် မင်္ဂလာအဝေးပြေးတွင် ယာဉ်လိုင်းပေါင်း (၂၆၃)လိုင်း နှင့် ဒဂုံ-ဧရာအဝေးပြေးတွင် ယာဉ်လိုင်းပေါင်း (၁၂၃) လိုင်းတို့မှ ယာဉ်အစီးရေ (၃၇ ၉၅)စီးရှိကြောင်း သိရသည်။