အရှေ့တီမောနိုင်ငံအား လာမည့်အောက်တိုဘာလတွင် အာဆီယံဒေသဆိုင်ရာအဖွဲ့၏ ၁၁ နိုင်ငံမြောက် အဖွဲ့ဝင်ဖြစ်လာရန် စီစဉ်ထားကြောင်း မလေးရှားဝန်ကြီးချုပ် အန်ဝါ အီဘရာဟင်က ပြောကြားခဲ့သည်။
လက်ရှိ အရှေ့တောင်အာရှနိုင်ငံများအသင်း၏ ဥက္ကဋ္ဌဖြစ်သူ အန်ဝါ၏ အတည်ပြုပြောကြားချက်အရ အဖွဲ့ဝင်အဖြစ် တရားဝင်ပူးပေါင်းခြင်းကို ကွာလာလမ်ပူတွင်ကျင်းပမည့် ကမ္ဘာ့ခေါင်းဆောင်များစည်းဝေးပွဲတွင် ပြုလုပ်မည်ဖြစ်သည်။ အရှေ့တီမောသည် ၂၄ နှစ်ကြာ အင်ဒိုနီးရှား၏ သိမ်းပိုက်မှုကိုခံခဲ့ရပြီးနောက် ၂၀၀၂ ခုနှစ်တွင် လွတ်လပ်ရေးရခဲ့သော ဒေသတွင်းနိုင်ငံသစ် ဖြစ်သည်။
အရှေ့တီမောနိုင်ငံ၏မြို့တော် ဒီလီတွင် အရှေ့တီမောသမ္မတ ရာမို့စ်-ဟော်တာနှင့် တွေ့ဆုံပြီးနောက် ပြုလုပ်သည့် သတင်းစာရှင်းလင်းပွဲတွင် အန်ဝါက “အရှေ့တီမောရဲ့ အာဆီယံအဖွဲ့ဝင်ဖြစ်လာမှုက ကျွန်တော်တို့အားလုံးအတွက် အကျိုးကျေးဇူး အလွန်ကြီးမားမှာပါ”ဟု ပြောသည်။
“၂၀၂၅ ခုနှစ် အောက်တိုဘာလမှာ ခင်ဗျားတို့ရဲ့ အာဆီယံအဖွဲ့ဝင်ဖြစ်လာမှုကို ကျွန်တော်တို့ အကြီးအကျယ် ကျင်းပပေးမှာပါ” ဟုလည်း သူက ဆိုသည်။
အန်ဝါက နှစ်နိုင်ငံတွေ့ဆုံဆွေးနွေးမှုအတွင်း ကုန်သွယ်ရေး၊ ရင်းနှီးမြှုပ်နှံမှု၊ ခရီးသွားလုပ်ငန်း၊ ပညာရေးနှင့် ကာကွယ်ရေးကိစ္စများကို ဆွေးနွေးခဲ့ကြသည်ဟုလည်း ပြောကြားခဲ့သည်။ ၎င်း၏ ခရီးစဉ်အတွင်း အရှေ့တီမောဝန်ကြီးချုပ်နှင့်လည်း တွေ့ဆုံရန်လည်း စီစဉ်ထားသည်။
သမ္မတ ဟိုဆေး ရာမို့စ်-ဟော်တာသည် အရှေ့တီမောနိုင်ငံအာဆီယံအဖွဲ့ဝင်ဖြစ်ရေးအတွက် ၂၀၁၁ ခုနှစ်တွင် ပထမဆုံးအကြိမ် လျှောက်ထားခဲ့ခြင်းဖြစ်သည်။
ဟော်တာက “ကျွန်တော်တို့ရဲ့ ဆွေးနွေးမှုတွေက နွေးထွေးပြီး အပြုသဘောဆောင်ပါတယ်၊ အောက်တိုဘာလ ကွာလာလမ်ပူမှာ သမိုင်းဝင်အာဆီယံအဖွဲ့ဝင်ဖြစ်ဖို့ ကျွန်တော်တို့ပြင်ဆင်နေချိန်မှာ အနာဂတ်ကို အဓိကထားပြီး ဆွေးနွေးခဲ့ကြပါတယ်”ဟု ပြောသည်။ “အဖွဲ့ဝင်အဖြစ် အပြည့်အဝရရှိဖို့အတွက် ကျန်ရှိနေတဲ့မှတ်ကျောက်တွေကို စံမီပြည့်မီစေဖို့ မလေးရှားနဲ့ရော အာဆီယံအဖွဲ့ဝင်နိုင်ငံအားလုံးနဲ့ပါ အနီးကပ်ပူးပေါင်းဆောင်ရွက်ဖို့ ကျွန်တော်တို့ ကတိပြုပါတယ်” ဟုလည်း သူက ဆိုသည်။
အာဆီယံအဖွဲ့ကို ၁၉၆၇ ခုနှစ်က အဖွဲ့ဝင် ၅ နိုင်ငံဖြင့် စတင်ခဲ့ပြီး ၁၉၉၉ ခုနှစ်တွင် နောက်ဆုံးအဖြစ် ကမ္ဘောဒီးယားကိုထည့်သွင်းကာ တဖြည်းဖြည်းတိုးချဲ့ခဲ့သည်။ အမေရိကန်သမ္မတ ဒေါ်နယ်လ် ထရမ့်ကလည်း လာမည့်လတွင် ကွာလာလမ်ပူ၌ကျင်းပမည့် အာဆီယံထိပ်သီးအစည်းအဝေးသို့ တက်ရောက်မည်ဖြစ်ကြောင်း အတည်ပြုထားသည်။