ဒေသအခေါ် “bangus” ဟု သိကြသည့် ငါးတိန်း(milkfish)သည် အရေပြားခွဲစိတ်ကုသမှုများအတွက် ဈေးချိုပြီး ကျယ်ကျယ်ပြန့်ပြန့်ရရှိနိုင်သော အရင်းအမြစ်အသစ်တစ်ခုဖြစ်သည်ဟု ဖိလစ်ပိုင်နိုင်ငံရှိ ထိပ်တန်းသုတေသနအင်စတီကျူမှ သိပ္ပံပညာရှင်များက ပြောကြားလိုက်သည်။
အရေပြားအစားထိုးခြင်းသည် မီးလောင်ဒဏ်ရာများ၊ ထိခိုက်နာများ၊ နာတာရှည်အနာများနှင့် ကင်ဆာတို့ကို ကုသရန်အတွက် ခွဲစိတ်မှုတစ်ခုဖြစ်သည်။
သို့သော်လည်း လူ၊ ဝက်နှင့် အရေပြားတုကဲ့သို့ အစဉ်အလာ အရေးပြားအစားထိုးမှုရင်းမြစ်များသည် ငွေကုန်ကြေးကျများပြီး အထူးသဖြင့် ဖိလစ်ပိုင်ကဲ့သို့ ဆင်းရဲသောနိုင်ငံများတွင် အလွယ်တကူ မရရှိနိုင်ပေ။
ဖိလစ်ပိုင်နိုင်ငံမှ ဆရာဝန်များသည် လူ့အရေပြားကဲ့သို့ ကောင်းမွန်ကြောင်း သက်သေပြထားနိုင်သည် Nile တိလားပီးယားငါးအရေခွံကို အစားထိုးပတ်တီးတစ်ခုအဖြစ် ၂၀၁၅ ခုနှစ်က၍ အသုံးပြုခဲ့ကြသည်။
အမှိုက်အဖြစ်သာ စွန့်ပစ်လေ့ရှိသည့် ငါးတိန်းအရေခွံသည် အသုံးဝင်သည့် အလားအလာများစွာရှိနေသည်ဟု မနီလာမြို့တော်ရှိ Ateneo ရေနှင့် ငါးလုပ်ငန်းအရင်းအမြစ်ဓါတ်ခွဲခန်းမှ သုတေသီများက ပြောကြားခဲ့သည်။
မိမိတို့၏ လေ့လာချက်အရ ပိုးသတ်ထားသော ငါးတိန်းအရေခွံသည် ကော်လာဂျင်မြင့်မားမှုကို ထိန်းထားပြီး အဏုဇီဝပိုးမွှားများစွဲကပ်မှုကင်းစင်ကာ တိလားပီးယားအရေခွံနှင့် ယှဉ်နိုင်စွမ်းရှိကြောင်း တွေ့ရှိခဲ့သည်ဟု ဦးဆောင်သုတေသီ ဒေါက်တာ Janice Ragaza က ပြောဆိုခဲ့သည်။
တိလားပီးယားအရေခွံကဲ့သို့ပင် ငါးတိန်းအရေခွံသည် အစိုဓါတ်နှင့် ပရိုတိန်းဆုံးရှုံးခြင်းကို ကာကွယ်ပေးသောကြောင့် အနာကျက်မြန်စေပြီး ပိုးဝင်ခြင်းကို ကာကွယ်ပေးသည်ဟု ဆိုထားသည်။
ငါးတိန်းအရေခွံသည် တိလားပီးယားကဲ့သို့ပင် တိရိစ္တာန်ရောဂါ ကူးစက်နိုင်ခြေမြင့်မားသော ဝက်၊ ဖားပြုတ်အရေပြားများထက် ပိုကောင်းသည်။ ထို့အပြင် ဝက်၊ နွား၊ သိုးများမှ ထုတ်ယူရရှိသော ကော်လာဂျင်နှင့် ဆက်စပ်သည့် ယဉ်ကျေးမှုနှင့် ဘာသာရေးဆိုင်ရာ အတားအဆီးများကိုလည်း ငါးတိန်းက ကျော်လွှားနိုင်သည်။
လူ့အရေပြားဘဏ်များသည် အလှူရှင်များအပေါ်တွင် ကြီးကြီးမားမား မှီခိုနေရသည်လည်းဖြစ်သည်။
Ref: သည်စထရိတ်တိုင်းမ်စ်