အယ်လ်အေတွင်လဝကစီမံချက်ကိုဆန္ဒပြ‌နေ၍ အစောင့်တပ်များ ချထား

အမေရိကန်ပြည်ထောင်စု လော့ဆန်းဂျလိစ်မြို့တွင် လူဝင်မှုကြီးကြပ်ရေးကို ကြပ်မတ်သော စီမံချက်များကို ဆန့်ကျင်သည့် ဆန္ဒပြမှုများတွင် ဆန္ဒပြသူများနှင့် အာဏာပိုင်များအကြား ရုန်ရင်းဆန်ခတ်ဖြစ်မှုများ ပေါ်ပေါက်နေသောကြောင့် ထရမ့်ပ်အစိုးရအဖွဲ့က ကယ်လီဖိုးနီးယားနိုင်ငံတော် အစောင့်တပ်များကို ဖြန့်ကြက်ချထားလိုက်ကြောင်း အိမ်ဖြူတော်က သတင်းထုတ်ပြန်သည်။

ပြည်နယ်အတွင်း လူဝင်မှုကြီးကြပ်ရေးနှင့် အကောက်ခွန် ကြပ်မတ်ရေးစီမံချက်များကို ဆန့်ကျင်မှုများ ဆက်လက်ဖြစ်ပွားနေချိန်တွင် ကယ်လီဖိုးနီးယား၌ ဥပဒေမဲ့လုပ်ရပ်များကို ဖြေရှင်းရန်အတွက် နိုင်ငံတော်အစောင့်တပ်ဖွဲ့ဝင် ၂,၀၀၀ ကို ဖြန့်ကြက်ချထားရေး စာချွန်လွှာကို သမ္မတဒေါ်နယ်ထရမ့်ပ်က လက်မှတ်ရေးထိုးခဲ့သည်ဟု အိမ်ဖြူတော်ပြန်ကြားရေးအတွင်းဝန် ကာရိုလင်းလီဗစ်က စနေနေ့ညပိုင်း သတင်းထုတ်ပြန်ချက်တွင် ပြောဆိုခဲ့သည်။

“ဒီအကြမ်းဖက်ဖြစ်စဉ်တွေအရ ကယ်လီဖိုးနီးယားရဲ့ ဒီမိုကရက်ခေါင်းဆောင်တွေဟာ နိုင်ငံသားတွေကို ကာကွယ်ရမယ့် သူတို့တာဝန်ကို လုံးလုံးလျားလျား စွန့်လွှတ်လိုက်ပါပြီ” ဟု လီဗစ်က ပြောကြားခဲ့သည်။ ထို့ကြောင့်ပင် ဥပဒေမဲ့လုပ်ရပ်များကို ဖြေရှင်းရန်အတွက် နိုင်ငံတော်အစောင့်တပ်ဖွဲ့ဝင် ၂,၀၀၀ ကို တပ်ဖြန့်ရန် သမ္မတအမိန့်ကို သမ္မတထရမ့်ပ်က လက်မှတ်ရေးထိုးလိုက်ခြင်းဖြစ်သည်ဟု လီဗစ်က ဆိုခဲ့သည်။

လော့ဆန်းဂျလိစ်တွင် ပြည်ထောင်စုတရားဥပဒေစိုးမိုးရေးကို အထောက်အကူပေးရန်အတွက် နိုင်ငံတော်အစောင့်တပ်ကို ကာကွယ်ရေးဝန်ကြီးဌာနက ချက်ချင်းခေါ်ယူထားသည်ဟု ကာကွယ်ရေးဝန်ကြီး Pete Hegseth က X ပေါ်တွင် ပို့စ်တင်၍ ပြောဆိုခဲ့သည်။ ထို့အပြင် အကြမ်းဖက်မှုများ ဆက်လက်ဖြစ်ပွားနေပါက Camp Pendleton တွင် တာဝန်ကျနေသည့် မရိန်းတပ်သားများကို ခေါ်ယူသွားမည်ဖြစ်ကြောင်းနှင့် ၎င်းတို့ကို တပ်လှန့်ထားကြောင်းကိုလည်း ပြောကြားခဲ့သည်။

ကယ်လီဖိုးနီးယားပြည်နယ် အုပ်ချုပ်ရေးမှူး ဂါဗင်နူးဆမ်းက စနေနေ့အစောပိုင်းတွင် ပြောဆိုခဲ့ရာ၌ ဖက်ဒရယ်အစိုးရသည် ကယ်လီဖိုးနီးယားနိုင်ငံတော်အစောင့်တပ်ကို လွှဲပြောင်းရယူရန် လုပ်ဆောင်နေပြီး ယင်းလုပ်ရပ်သည် ရည်ရွယ်ချက်ရှိရှိဖြင့် ချဲ့ကားမှုဖြစ်ကြောင်းနှင့် တင်းမာမှုများကို ပိုမိုမြင့်တက်စေမည်သာဖြစ်ကြောင်း ပြောကြားခဲ့သည်။

ကယ်လီဖိုးနီးယား ဒေသဆိုင်ရာ အာဏာပိုင်များအနေဖြင့် အကူအညီမလိုအပ်ကြောင်း နူးဆမ်းက ပြန်လည်ပြောကြားခဲ့သည်။

Ref: အေဘီစီ