၂၀၂၅ – ၂၀၂၆ ပညာသင်နှစ်၊ အမျိုးသားယဉ်ကျေးမှု နှင့်အနုပညာတက္ကသိုလ်(ရန်ကုန်)တွင် ဂီတ၊ သဘင်၊ ပန်းချီ၊ပန်းပု၊ ရုပ်ရှင်နှင့်ပြဇာတ်၊ ယဉ်ကျေးမှုအမွေအနှစ်စီမံခန့်ခွဲမှုပညာ ပထမနှစ်သင်တန်းသားများကို ခေါ်ယူလျက်ရှိကြောင်း သိရသည်။
ဂီတပညာအထူးပြု ဝိဇ္ဇာဘွဲ့ (ဂီတ) (၄) နှစ်၊ သဘင်ပညာအထူးပြု ဝိဇ္ဇာဘွဲ့(သဘင်) (၄) နှစ်၊ ပန်းချီပညာအထူးပြု ဝိဇ္ဇာဘွဲ့(ပန်းချီ) (၄) နှစ်၊ ပန်းပုပညာအထူးပြု ဝိဇ္ဇာဘွဲ့(ပန်းပု) (၄) နှစ်၊ ရုပ်ရှင်နှင့် ပြဇာတ်ပညာအထူးပြု ဝိဇ္ဇာဘွဲ့(ရုပ်ရှင်နှင့်ပြဇာတ်) (၄) နှစ်၊ ယဉ်ကျေးမှုအမွေအနှစ် စီမံခန့်ခွဲမှုပညာအထူးပြု ဝိဇ္ဇာဘွဲ့(ယဉ်ကျေးမှုအမွေအနှစ်စီမံခန့်ခွဲမှု) (၄) နှစ် ဖွင့်လှစ်သင်ကြားပေးသွားမည်ဖြစ်ကြောင်း သိရသည်။
တက္ကသိုလ်ဝင်စာမေးပွဲကို မည်သည့်ဘာသာတွဲဖြင့် မဆို အောင်မြင်သူ ဖြစ်ရမည်ဖြစ်ပြီး သက်ဆိုင်ရာအထူးပြုဘာသာရပ်နှင့် ကိုက်ညီသော ကိုယ်အင်္ဂါကျန်းမာသန်စွမ်းသူ၊အနုပညာဝါသနာပါသူဖြစ်ရမည် ဖြစ်သည်။
တက္ကသိုလ်ဝင်ခွင့်လျှောက်ထားသူသည် နိုင်ငံသားစိစစ်ရေးကတ်ပြားအမှတ် (နိုင်)/ (ပြု)/(ဧည့်) ကိုင်ဆောင်ထားသူဖြစ်ရမည်ဖြစ်ပြီး လျှောက်လွှာပုံစံများကို အမျိုးသားယဉ်ကျေး မှုနှင့် အနုပညာတက္ကသိုလ်(ရန်ကုန်)၊ ၁/ဈ၊ အောင်ဇေယျလမ်း၊ (၂၆) ရပ်ကွက်၊ ဒဂုံမြို့သစ်တောင်ပိုင်း၊ ရန်ကုန်တိုင်းဒေသကြီးတွင် ဝယ်ယူ၍ နိုဝင်ဘာလ (၁၀) ရက်အထိ ရုံးချိန်အတွင်းလျှောက်ထားနိုင်ကြောင်း သိရသည်။
လျှောက်လွှာပုံစံနှင့်အတူ တက္ကသိုလ်ဝင်စာမေးပွဲအောင်မြင်ကြောင်း ထောက်ခံချက်၊ အမှတ်စာရင်းမူရင်း၊ မှတ်ပုံတင်မိတ္တူ၊ ရဲစခန်းထောက်ခံစာ၊ ရပ်ကွက်ထောက်ခံစာ၊ ကျန်းမာကြောင်းထောက်ခံစာ ပတ်စပို့အရွယ် ဓာတ်ပုံ (၇) ပုံတို့ကို ပူးတွဲတင်ပြရမည်ဖြစ်သည်။
၂၀၂၅ ခုနှစ်၊ နိုဝင်ဘာလ (၁၂) ရက် ၊ နံနက် (၉) နာရီတွင် စွယ်တော်ဆောင်တွင် လူတွေ့စစ်ဆေးမည်ဖြစ်ပြီး ဝင်ခွင့်ရစာရင်းကို နိုဝင်ဘာလ (၁၇)ရက်တွင် စွယ်တော်ဆောင်ရှိ ကြော်ငြာသင်ပုန်းတွင် ကြေညာ၍ကျောင်းအပ်လက်ခံသွားမည်ဖြစ်သည်။
ထို့ပြင် ၂၀၂၅ -၂၀၂၆ ပညာသင်နှစ် ပထမနှစ်သင်တန်းများကို ၂၀၂၅ ခုနှစ်၊ နိုဝင်ဘာလ စတုတ္ထပတ်တွင် စတင်ဖွင့်လှစ်သွားမည်ဖြစ်ကြောင်း သိရသည်။