အမေရိကန်ရေတပ်သား ထောင်ပေါင်းများစွာပါဝင်သော လေယာဉ်တင်သင်္ဘောကြီးသည် တနင်္ဂနွေနေ့တွင် ထိုင်းနိုင်ငံမှ ပြန်လည်ထွက်ခွာသွားပြီဖြစ်ကြောင်း အေအက်ဖ်ပီသတင်းထောက်များက ပြောကြားခဲ့သည်။ ပင်လယ်ပြင်တွင် ကိုးလကြာ တာဝန်ထမ်းဆောင်ခဲ့ရသည့် လေယာဉ်တင်သင်္ဘောပေါ်တွင် လူနေမှုအခြေအနေများ ယိုယွင်းလာသည်ဆိုသော သတင်းများထွက်ပေါ်လာပြီးနောက် ဆိပ်ကမ်းကပ်ခဲ့သော ၎င်း၏ခရီးစဉ်ကို အဆုံးသတ်ခဲ့သည်။
ယူအက်စ်အက်စ် အေဘရာဟမ်လင်းကန်းပေါ်ရှိ သင်္ဘောသား ၅,၀၀၀ သည် အရှေ့အလယ်ပိုင်းဒေသတွင် ရက်ရှည်တာဝန်ထမ်းဆောင်ပြီးနောက် ငါးရက်ကြာ အနားယူအပန်းဖြေရန်အတွက် ဗုဒ္ဓဟူးနေ့တွင် ဘန်ကောက်အနီးရှိ အပန်းဖြေမြို့ ဖြစ်သော ပတ္တယား၏ မြောက်ဘက်တွင် ဆိုက်ကပ်ခဲ့သည်။
ထိုင်းနိုင်ငံ၏ ခရီးသွားဝင်ရောက်မှုနည်းပါးသော ရာသီတွင် ၎င်းတို့ရောက်ရှိလာခြင်းသည် ကမ်းခြေများ၊ ညပိုင်းဖျော်ဖြေရေးနေရာများအပြင် လိင်ခရီးသွားလုပ်ငန်း အချက်အချာအဖြစ်လည်း နာမည်ဆိုးဖြင့်ကျော်ကြားသော ပတ္တယားရှိ စီးပွားရေးလုပ်ငန်းများအတွက် မျှော်လင့်ချက်မြင့်တက်စေခဲ့သည်။
လင်းကန်းသည် ပတ္တယားမှ ကားဖြင့် မိနစ် ၃၀ ခန့်မောင်းသွားရသော လမ်ချာဘန်းဆိပ်ကမ်းမှ နံနက် ၁၁း၀၀ နာရီခန့်တွင် ထွက်ခွာသွားသည်ကို အေအက်ဖ်ပီသတင်းထောက်များ မြင်တွေ့ခဲ့ရသည်ဟု ဆိုသည်။
ဖြစ်နိုင်ခြေရှိသော ပြဿနာများအတွက် စိုးရိမ်မှုများရှိခဲ့သော်လည်း ဆိပ်ကမ်းခရီးစဉ်သည် ပြဿနာများများစားစားမရှိဘဲ တနင်္ဂနွေနေ့တွင် ပြီးဆုံးသွားကြောင်း ဒေသခံရဲတပ်ဖွဲ့က ပြောကြားခဲ့သည်။
“အရာအားလုံး အဆင်ပြေပါတယ်” ဟု ပတ္တယားရဲဌာန အကြီးအကဲ အာနက် ဆရာထောင်ယိုးက အေအက်ဖ်ပီကို ပြောကြားခဲ့သည်။
“ပထမဆုံးနေ့က အမေရိကန်တွေ အချင်းချင်း အချင်းများခဲ့တာကလွဲလို့ ဖမ်းဆီးတာတွေ၊ အငြင်းပွားစရာတွေ မရှိခဲ့ပါဘူး” ဟု ၎င်းက ပြောကြားခဲ့သည်။
စာရင်းသွင်းထားသော အမေရိကန်များသည် ၎င်းတို့၏ ခရီးစဉ်အတွင်း ဘတ်သန်း ၁၀၀(ဒေါ်လာ ၃ သန်း) အထိ သုံးစွဲခဲ့ကြောင်း ပတ္တယားမြို့တော်ဝန် ပိုရာမတ်စ် ငမ်ပီချေးစ်က တနင်္ဂနွေနေ့တွင် ပြောကြားခဲ့သည်။
Ref: ဘန်ကောက်ပို့စ်