လွန်ကဲသောရာသီဥတုဖြစ်စဉ်နှင့်ဆက်စပ်၍ သေဆုံးသူ ၂၀ ကျော်ရှိနေပြီဖြစ်သော တောင်ကိုရီးယားနိုင်ငံ၏ အပူလှိုင်းကျရောက်မှုသည် ကြာသပတေးနေ့၌ ဆိုးလ်မြို့တွင် အထွတ်အထိပ်သို့ ရောက်ရှိမည်ဟု မျှော်လင့်ရပြီး မြို့တော်တွင် အပူချိန် ၃၉ ဒီဂရီစင်တီဂရိတ်အထိ ရောက်ရှိနိုင်ကြောင်း ခန့်မှန်းထားသည်။
“ကျွန်တော်တို့ တစ်ခါမှ မကြုံဖူးသေးတဲ့ အပူလွန်ကဲမှုဟာ နေ့စဉ်နဲ့အမျှ ဆက် တိုက်ဖြစ်နေပါတယ်။ တစ်ချိန်က နိုင်ငံခြားသတင်းတွေမှာသာ မြင်တွေ့ခဲ့ရတဲ့ အပူလှိုင်းအခြေအနေတွေဟာ အခုဆိုရင် ကျွန်တော်တို့အတွက် လက်တွေ့မျက်မြင်ဖြစ်လာပါပြီ” ဟု ကြာသပတေးနေ့က ပြုလုပ်သော အပူလှိုင်းတုန့်ပြန်ဆောင်ရွက်ရေး အစည်းအဝေးတွင် သမ္မတ လီက ပြောကြားခဲ့သည်။
အပူလှိုင်းလျော့ကျသွားချိန်အထိ ရရှိနိုင်သမျှ ဝန်ထမ်းနှင့် အရင်းအမြစ်အားလုံးကို စုစည်းရန် လီက ဝန်ကြီးဌာနများနှင့် ဒေသန္တရအစိုးရများကို အမိန့်ပေးခဲ့ပြီး လူ့အသက်များကို ကာကွယ်ရန်နှင့် ဘေးကင်းစေရန်၊ အကာအကွယ်မဲ့သော နိုင်ငံသားများအတွက် ပိုမို ကောင်းမွန်စွာ ကာကွယ်ပေးရန်နှင့် အပူဆုံးအချိန်နာရီများအတွင်း ပြင်ပလုပ်သားများအတွက် အနားယူချိန်များကို ပိုမိုတင်းကျပ်စွာ ပြဌာန်းရန် အလေးပေးပြောကြားခဲ့သည်။
ခန့်မှန်းအပူချိန်သည် နိုင်ငံ၏ နောက်ဆုံးဖြစ်ပေါ်ခဲ့သော သမိုင်းဝင်အပူလှိုင်းကာလအတွင်း ၂၀၁၈ ခုနှစ် သြဂုတ်လက စံချိန်တင်ခဲ့သည့် ၃၉ ဒဿမ ၆ ဒီဂရီစင်တီဂရိတ်နီးပါးကို ရောက်ရှိနိုင်သည်။
ဆိုးလ်မြို့သည် နောက်ထပ်အပူလွန်ကဲသော ညတစ်ညကို ဖြတ်သန်းခဲ့ရပြီးနောက် မြို့တော်၏ ခေတ်သစ်သမိုင်းတွင် အပူဆုံးနေ့များထဲမှ တစ်ခုကို ကြုံတွေ့ရနိုင်ကြောင်း မိုးလေဝသခန့်မှန်းသူများက ပြောဆိုလာချိန်တွင် သတိပေးချက်ထွက်လာခြင်းဖြစ်သည်။
ကိုရီးယားမိုးလေဝသစီမံခန့်ခွဲရေးဌာန(ကေအမ်အေ) ၏ အဆိုအရ ရပ်ကွက်အချို့တွင် ညဘက်အပူချိန်သည် ၃၀ ဒီဂရီစင်တီဂရိတ်အောက် အနည်းငယ်သာကျဆင်းခဲ့ပြီး လူများစွာသည် ချောင်းများ၊ ကုန်တိုက်များနှင့် အခြား လေအေးပေးစက်တပ်ဆင်ထားသော နေရာများတွင် အပူရှောင်နေကြကြောင်း မီဒီယာများက ပြသခဲ့သည်။
Ref: စီအင်န်အေ