နိုင်ငံတော်အနေဖြင့် အပူပိုင်းဒေသ၏ဂေဟစနစ်ပိုမိုကောင်းမွန်လာစေရေး၊ အပူပိုင်းဒေသစိမ်းလန်းစို ပြည်ရေးနှင့် ရာသီဥတုမျှတကောင်းမွန်စေရေးတို့ကို စီမံချက်များဖြင့်ဆောင်ရွက်နေသည်ဟု နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ဇူလိုင် ၄ ရက်နံနက်ပိုင်းက နေပြည်တော်၊ ဒက္ခိဏသီရိမြို့နယ်၊ ရန်အောင်မြင်ကြိုး ဝိုင်း၌ကျင်းပသည့် ၂၀၂၅ ခုနှစ်၊ ဒုတိယအကြိမ် မိုးရာသီသစ်ပင်စိုက်ပျိုးပွဲတွင် ပြောကြားခဲ့ခြင်းဖြစ် သည်။
မြန်မာနိုင်ငံ၏အပူပိုင်းဒေသဟုသတ်မှတ်ထားသည့် မန္တလေး၊ မကွေး၊ စစ်ကိုင်းတိုင်းတို့နှင့် အောက်ပိုင်းဒေသတို့သည် နိုင်ငံ၏စိုက်ပျိုးရေးအတွက် အရေးပါသည့်ဒေသဖြစ်ကာ ဒေသခံပြည်သူ သန်းပေါင်းများစွာ၏ အသက်မွေးဝမ်းကျောင်းဖွံ့ဖြိုးတိုးတက်ရေးအတွက်အဓိကကျသော အခြေခံကောင်းများရှိသည့် ဒေသများဖြစ်သော်လည်း မိုးခေါင်ရေရှားမှု၊ ပူပြင်းခြောက်သွေ့သည့် ရာသီဥတုနှင့် ရေရရှိမှုနည်းပါးခြင်းများကြောင့် စိုက်ပျိုးမွေးမြူရေးနှင့်သစ်ပင်များရှင်သန်ကြီးထွားအောင်မြင်ရန်ခက်ခဲသည်ဟု ပြောသည်။
” အထူးသဖြင့် ၂၀၂၄ ခုနှစ်မှာ ရာသီဥတုပြောင်းလဲမှုကြောင့်ဖြစ်ပေါ်လာတဲ့ အယ်လ်နီညိုအကျိုးသက် ရောက်မှုအရပြင်းထန်တဲ့ အပူချိန်မြင့်မားမှုဒဏ်ကို ခံစားခဲ့ရတာကို အားလုံးအသိဘဲဖြစ်ပါတယ်။ ဒါ့ကြောင့် နိုင်ငံတော်အနေနဲ့ အပူပိုင်းဒေသရဲ့ ဂေဟစနစ်ပိုမိုကောင်းမွန်လာစေဖို့၊ အပူပိုင်းဒေသစိမ်း လန်းစိုပြည်ဖို့နဲ့ ရာသီဥတုမျှတကောင်းမွန်စေဖို့တွေကို စီမံချက်တွေနဲ့ဆောင်ရွက်နေပါတယ်”ဟု နစက ဥက္ကဋ္ဌက ပြောသည်။
ထိုသို့ဆောင်ရွက်ရာ၌ သစ်တောဧရိယာများတိုးပွားလာစေရေး၊ ရေနှင့်မြေဆီလွှာထိန်းသိမ်းရေးအတွက် လမ်းဘေးဝဲယာတွင် သစ်ပင်စိုက်ပျိုးခြင်း၊ တစ်ရွာ(၂)ဧကဖြင့် ကျေးရွာထင်းစိုက်ခင်းများ တည်ထောင်ခြင်းအပါအဝင် (၁၃)ခရိုင်စိမ်းလန်းစိုပြည်ရေးလုပ်ငန်းများကို နည်းလမ်းမျိုးစုံဖြင့် အရှိန်အဟုန်မြှင့်ဆောင်ရွက်လျက်ရှိသည်ဟု ပြောသည်။
ထို့ပြင် နိုင်ငံရေရှည်ဖွံ့ဖြိုးတိုးတက်ရေး၊ ပြည်သူ များစားရေရိက္ခာဖူလုံပြီး ကျန်းမာပျော်ရွှင်ရေးနှင့် သဘာဝဘေးအန္တရာယ်တစ်ချို့မှကာကွယ်နိုင်ရန် သစ်ပင်သစ်တောများ၏အခန်းကဏ္ဍသည် အဓိကကျကာ Green City, Clean City, Smart City နှင့် Green Village များဖြစ်စေရန် သစ်ပင်သစ် တောများသည် အလွန်အရေးကြီးသည့် အစိတ်အ ပိုင်းများဖြစ်သည်ဟု ပြောသည်။