အနီးစခန်းလေဆိပ်သည် ရတနာပုံဆိုက်ဘာစီးတီးကို ကမ္ဘာ့အဆင့်မီ Silicon Valley ဖြစ်စေရေး၏ အဓိကလေကြောင်းတံခါးပေါက်ဖြစ်လာမည်ဟု နိုင်ငံတော်သမ္မတ ပြော

ပြင်ဦးလွင်မြို့ရှိ အဆင့်မြှင့်တင်တည်ဆောက်ပြီးစီးခဲ့သည့် အနီးစခန်းလေဆိပ်သည် ရတနာပုံဆိုက်ဘာစီးတီးကို ကမ္ဘာ့အဆင့်မီ Silicon Valley တစ်ခုအဖြစ် ဖော်ဆောင်ရာတွင် အဓိကကျသည့် လေကြောင်းဆက်သွယ်ရေးတံခါးပေါက် ဖြစ်လာမည်ဖြစ်ပြီး အနာဂတ်တွင် လေယာဉ်ကြီးများ ဆင်းသက်နိုင်သည့် ခေတ်မီလေဆိပ်တစ်ခုအဖြစ် ဆက်လက်အဆင့်မြှင့်တင်သွားမည်ဖြစ်ကြောင်း နိုင်ငံတော်သမ္မတ ဦးမင်းအောင်လှိုင်က ယနေ့ (ဇူလိုင် ၁၁ ရက်) တွင် ပြောကြားခဲ့သည်။

အနီးစခန်းလေဆိပ်ဖွင့်ပွဲအခမ်းအနားတွင် နိုင်ငံတော်သမ္မတက ပြင်ဦးလွင်မြို့သို့ ခရီးသွားဧည့်သည်များ အချိန်တိုအတွင်း အဆင်ပြေချောမွေ့စွာ လာရောက်နိုင်ရေးနှင့် လေဆိပ်တစ်ခု၏ အင်္ဂါရပ်များ ပြည့်စုံစေရေးအတွက် ၂၀၂၃ ခုနှစ်မှစတင်ကာ အဆင့်မြှင့်တင်ရေးစီမံကိန်းကို အကောင်အထည်ဖော်ခဲ့ကြောင်း ပြောကြားခဲ့သည်။

အဆိုပါစီမံကိန်းအရ တစ်နှစ်လျှင် ခရီးသည် ၁၀၀,၀၀၀ ဝင်ထွက်အသုံးပြုနိုင်သည့် နှစ်ထပ်လေဆိပ်အဆောက်အဦသစ်၊ Boeing 737-800 အမျိုးအစား လေယာဉ်သုံးစီး တစ်ပြိုင်နက်ရပ်နားနိုင်သည့် လေယာဉ်ရပ်နားနေရာ၊ လေကြောင်းထိန်းမျှော်စင်သစ်တို့ကို တည်ဆောက်ခဲ့သည့်အပြင် လေယာဉ်ဆင်းသက်မှုအထောက်အကူပြု လမ်းညွှန်စက်များ၊ လေယာဉ်ပြေးလမ်း မီးအလင်းရောင်စနစ်များနှင့် လေကြောင်းလမ်းညွှန်စနစ်များကိုလည်း တပ်ဆင်ထားကြောင်း ပြောကြားခဲ့သည်။

ထို့ပြင် အနီးစခန်းလေဆိပ် ဖွင့်လှစ်နိုင်ခြင်းကြောင့် ပြည်တွင်း၊ ပြည်ပမှ နည်းပညာရှင်များနှင့် ရင်းနှီးမြှုပ်နှံသူများသည် ရတနာပုံဆိုက်ဘာစီးတီးသို့ လျင်မြန်စွာ သွားလာနိုင်မည်ဖြစ်ကာ နိုင်ငံ၏ နည်းပညာဖွံ့ဖြိုးတိုးတက်ရေးနှင့် ဒစ်ဂျစ်တယ်စီးပွားရေးကဏ္ဍ ဖွံ့ဖြိုးတိုးတက်ရေးကို အရှိန်အဟုန်ဖြင့် အထောက်အကူပြုနိုင်မည်ဖြစ်ကြောင်း နိုင်ငံတော်သမ္မတက ပြောကြားခဲ့သည်။

ထို့အတူ ပြင်ဦးလွင်ဒေသမှ ပန်းမန်များ၊ ကော်ဖီ၊ စတော်ဘယ်ရီနှင့် အခြားလတ်ဆတ်မှုလိုအပ်သည့် အရည်အသွေးမြင့် စိုက်ပျိုးရေးထုတ်ကုန်များကို လေကြောင်းကုန်စည်ပို့ဆောင်ရေးစနစ်ဖြင့် ပြည်တွင်းသာမက ပြည်ပဈေးကွက်များသို့ အချိန်နှင့်တစ်ပြေးညီ တိုက်ရိုက်တင်ပို့နိုင်မည်ဖြစ်ကြောင်းလည်း ပြောကြားခဲ့သည်။

နိုင်ငံတော်သမ္မတက အနာဂတ်တွင် အနီးစခန်းလေဆိပ်ကို လေယာဉ်ကြီးများ ဆင်းသက်နိုင်သည့် ခေတ်မီလေဆိပ်တစ်ခုအဖြစ် ဆက်လက်ဖွံ့ဖြိုးတိုးတက်စေရန် စီစဉ်ထားပြီး လေယာဉ်များ အမြန်ဝင်ထွက်နိုင်သည့် Taxiway များ၊ ကုန်တင်လေယာဉ်ရပ်နားနေရာများ၊ ကုန်စည်သိုလှောင်ရုံများ အပါအဝင် အခြေခံအဆောက်အအုံများကိုလည်း အဆင့်ဆင့် တည်ဆောက်အဆင့်မြှင့်တင်သွားမည်ဖြစ်ကြောင်း ပြောကြားခဲ့သည်။

ထို့နောက် နိုင်ငံတော်သမ္မတက အနီးစခန်းလေဆိပ် အဆင့်မြှင့်တင်ရေးလုပ်ငန်းသည် နိုင်ငံတော်၏ အရေးပါသည့် အခြေခံအဆောက်အအုံစီမံကိန်းများအနက် တစ်ခုဖြစ်ပြီး အစိုးရသစ်၏ ပထမရက်(၁၀၀)စီမံကိန်းအတွင်း အောင်မြင်စွာ အကောင်အထည်ဖော်နိုင်ခဲ့ခြင်းဖြစ်ကြောင်း ပြောကြားကာ လေဆိပ်ကို ရေရှည်တည်တံ့စေရေး ဝိုင်းဝန်းထိန်းသိမ်းစောင့်ရှောက်ပြီး ဒေသဖွံ့ဖြိုးတိုးတက်ရေးနှင့် သယ်ယူပို့ဆောင်ရေးကဏ္ဍ ပိုမိုတိုးတက်စေရေးအတွက် ပူးပေါင်းဆောင်ရွက်ကြရန် တိုက်တွန်းပြောကြားခဲ့ကြောင်း သိရသည်။