လူသားမျိုးနွယ်အပေါ် ကျူးလွန်သော ရာဇဝတ်မှုစွဲချက်ဖြင့် နိုင်ငံတကာရာဇဝတ်တရားရုံး(အိုင်စီစီ) တွင် ထိန်းသိမ်းခံထားရသည့် ဖိလစ်ပိုင်သမ္မတဟောင်း ရိုဒရီဂိုဒူတာတေးသည် ၎င်း၏ မွေးရပ်မြို့ မြို့တော်ဝန်ရွေးကောက်ပွဲတွင် သောင်ပြိုကမ်းပြိုအနိုင်ရခဲ့ကြောင်း သိရသည်။
ရွေးကောက်ပွဲကော်မရှင်(Comelec) ၏ ရလဒ်များအရ ဒူတာတေးသည် မဲအရေအတွက် ၄၉,၀၀၀ ရထားသော သူ၏ အနီးကပ်ဆုံးပြိုင်ဘက်ကို ၄၀၅,၀၀၀ မဲဖြင့် အပြတ်အသတ်ဦးဆောင်ထားသည်ဟု ဒေသတွင်းမီဒီယာက ဖော်ပြသည်။
မဲ ၈၀ ရာခိုင်နှုန်းကို ရေတွက်ထားသည့် တရားဝင်မဟုတ်သေးသော စာရင်းအရ ဒူတာတေးသည် သူ၏ အနီးကပ်ဆုံးပြိုင်ဘက်ထက် မဲ ၈ ဆကျော်ပိုရကာ ဒါဗာအိုမြို့တော်ဝန်ရွေးကောက်ပွဲကို အနိုင်ရခဲ့ပြီဟု ဆိုသည်။
လူထောင်ချီေ-သဆုံးခဲ့သည့် သူ၏ မူးယ-စ်နှိမ်နင်းရေးစစ်ပွဲနှင့် ဆက်စပ်၍ မတ်လတွင် ဒူတာတေးကို သည်ဟိဂ်သို့ ပို့ဆောင်ခဲ့သည်။
နိုင်ငံတစ်ဝန်း ကြားဖြတ်ရွေးကောက်ပွဲတွင် အနိုင်ရခဲ့ခြင်းသည် တောင်ပိုင်းမြို့၌ အသက် ၈၀ အရွယ် သမ္မတဟောင်း၏ တာရှည်ခံသော သြဇာလွှမ်းမိုးမှုကို သက်သေပြခဲ့သည်။
ဒူတာတေး၏ ဖေ့စ်ဘုတ်အကောင့်ဟောင်းတွင် သူ့ကိုထောက်ခံသူများ၏ ဝမ်းမြောက်ဂုဏ်ယူကြောင်း မှတ်ချက်များဖြင့် ပြည့်နှက်နေပြီး ပြည်သူများအတွက် တာဝန်ပြန်ထမ်းဆောင်ပေးရန် အချို့ တောင်းဆိုထားခဲ့သည်။
“ဂုဏ်ယူပါတယ် အဖေ။ သူ့ကို အိမ်ပြန်ခေါ်ကြစို့” ဟု မှတ်ချက်တစ်ခုတွင် ရေးထားသည်။
ဒူတာတေးသည် အိုင်စီစီတွင် ရုံးတင်စစ်ဆေးခံရသည့် အာရှတိုက်မှ ပထမဆုံး နိုင်ငံခေါင်းဆောင်ဟောင်းဖြစ်လာနိုင်သည်။
အိုင်စီစီ၏ တောင်းဆိုချက်အရ ဖိလစ်ပိုင်ရဲများက သူ့ကို ရုတ်တရက်ဖမ်းဆီးခဲ့ခြင်းသည် သူ့ကို ထောက်ခံသူအသိုင်းအဝိုင်းအား ဒေါသထွက်စေခဲ့ပြီး နိုင်ငံခြားတရားရုံးတစ်ခု၏ တောင်းဆိုချက်အရ ပြန်ပေးဆွဲလိုက်ခြင်းဟု ခေါ်တွင်ခဲ့ကြသည်။
မူးယ-စ်ဆေးဝါး တိုက်ဖျက်ရေး ဖြိုခွင်းမှုများနှင့် ပတ်သက်၍ သူက ခုခံကာကွယ်ခဲ့ပြီး သူ့ကို ဖမ်းဆီးမှုသည် ဥပဒေနှင့် မညီဟု သူ၏ ရှေ့နေအဖွဲ့က ပြောကြားခဲ့သည်။
ဒူတာတေးသည် ၂၀၁၉ ခုနှစ်တွင် ဖိလစ်ပိုင်နိုင်ငံကို အိုင်စီစီမှ နုတ်ထွက်ခဲ့သော်လည်း ယင်းမတိုင်ခင်က ကျူးလွန်ခဲ့သော ရာဇဝတ်မှုများအတွက် တရားစီရင်ပိုင်ခွင့်ရှိသည်ဟု အိုင်စီစီက ပြောဆိုထားသည်။
Ref: အေဘီစီ