နွယ်ဒါလီထွန်းက ဘိုဘိုအင်တာတိန်းမန့်က စီစဉ်ရိုက်ကူးတဲ့ Ghost Hunter ရုပ်သံဇာတ်လမ်းတွဲမှာ ပါဝင်ရိုက်ကူးထားဖူးပြီး ဒီဇာတ်လမ်းတွဲက သူ့ရဲ့ဒုတိယမြောက် ဇာတ်လမ်းတွဲ ဖြစ်ပါတယ်။ ပထမဆုံး ဇာတ်လမ်းတွဲ အတွေ့အကြုံနဲ့ ပတ်သက်ပြီး နွယ်ဒါလီထွန်းက …
” ဇာတ်လမ်းတွဲကျတော့ ရက်တွေအများကြီးပေးရတာပေါ့နော်။ ရက်တွေအများကြီး ပေးရတယ်ဆိုတာက အကုန်လုံးလူစုံ Main ငါးယောက် ရှိတယ်ဆို ငါးယောက်အားတဲ့ အချိန်ညှိပြီး ရိုက်ကူးရတာဆိုတော့ အချိန်လည်း ပိုပေးရတယ်၊ တစ်ခါတစ်လေ အခုဇာတ်လမ်းတွဲဆိုရင် သူကဇာတ်သိမ်းကို သေချာမသိသေးဘူး။ ရိုက်ရင်းရိုက်ရင်း ပြရင်းပြရင်းနဲ့မှ ပရိသတ်အရှိန် ဘယ်လိုဖြစ် လာမလဲ။ အဲ့ဒီလို Feedback ကို ကြည့်ပြီးတော့မှာ ဇာတ်သိမ်းကိုလုပ်မှာ၊ အဲဒီလိုပုံစံမျိုးဖြစ်နေတဲ့ အခါကျတော့ ဇာတ်လမ်းတစ်ခု လုံးကို ကြိုပြီးတော့ သိထားမျိုး မဟုတ်ဘူး ပေါ့နော်၊ အဲဒီလို သရုပ်ဆောင် ရင်းနဲ့ ပိုပြီးတော့ တာဝန်ပိုကြီးတယ်လို့ထင်တယ်” လို့ ဆိုပါတယ်။
Ghost Hunter ဇာတ်လမ်းတွဲ ရိုက်ကူးတုန်းက အမှတ်တရတွေနဲ့ ပတ်သက်ပြီး နွယ်ဒါလီထွန်းက “အမှတ်တရကတော့ သူက ရန်ကုန်မှာလည်းရိုက်တယ်၊ နယ်မှာလည်း ရိုက်တယ်၊ ပြီးတော့ အဲဒီတုန်းက သရဲလိုက်ဖမ်းတဲ့ ဇာတ်လမ်းတွဲဆိုတော့ ညဘက်တွေချည်း ရိုက်တာများတယ်။ မိုးလင်းပေါက်ဇာတ်ကားရိုက်ကူးရတာမျိုး တွေရှိတယ်။ တစ်လခွဲလောက်ဆိုတော့ နေ့နဲ့ညနဲ့တော့ မှားသွားတယ်” လို့ ပြောပါတယ်။ လတ်တလောမှာ နွယ်ဒါလီထွန်းက မဂ္ဂဇင်းကာဗာတွေကြော်ငြာတွေ ရိုက်ကူးနေပြီး ဖြိုးပြည့်စုံရဲ့ “မျှော်လင့်ချက်လေး “သီချင်း အမ်တီဗီမှာလည်း အလင်းရောင်နဲ့အတူတွဲဖက် ရိုက်ကူးထားပါတယ်။ အဆိုတော်လုပ်ဖို့ စိတ်ကူးမရှိသေးပေမယ့် ကိုယ်ကြိုက်တဲ့ သီချင်းကောင်းလေးတွေရှိရင်တော့ ဆိုဖြစ်မယ်လို့ သိရပါတယ်။
ထူးရွှေရည်ဝင်း၊ ဓာတ်ပုံ-မင်းမင်းထွန်း