အောက်တိုဘာ ၁၅
လဝိုတိုဘီ လာကီ-လာကီ မီးတောင်ပေါက်ကွဲ၍ သည်ပြာများ ကောင်းကင်သို့ ၁၀ ကီလိုမီတာ (၆.၂ မိုင်) ခန့် လွင့်စင်သွားပြီးနောက် အင်ဒိုနီးရှား အာဏာပိုင်များက မီးတောင်အရေးပေါ်သတိပေးချက်ကို အမြင့်ဆုံးအဆင့်သို့ တိုးမြှင့်လိုက်သည်။
ဗုဒ္ဓဟူးနေ့တွင် အသေအပျောက် သို့မဟုတ် ပျ-က်စီးမှု သတင်းများကိုချက်ချင်းမရရှိသော်လည်း အာဏာပိုင်များက ဖလော်ရာကျွန်းအရှေ့ဘက်ရှိ ဒေသခံများနှင့် ခရီးသွားများကို တောင်ပေါ်မှရှောင်ရှားရန်နှင့် ဘေးလွတ်နိုင်သောနေရာသို့ ရွှေ့ပြောင်းရေးအတွက် ကြိုတင်ပြင်ဆင်ထားရန် သတိပေးထားသည်။
“ပြည်သူတွေအနေနဲ့ ဒေသန္တရအစိုးရရဲ့ ညွှန်ကြားချက်တွေကိုလိုက်နာပြီး မယုံကြည်ရတဲ့သတင်းအရင်းအမြစ်တွေကပြောနေတဲ့ ပြဿနာတွေကို မယုံသင့်ပါဘူး” ဟု နိုင်ငံ၏ မီးတောင်ဗေဒနှင့် ဘူမိအန္တရာယ်လျော့ပါးရေးဗဟိုဌာနမှ သတိပေးချက်တစ်ခုတွင် ရေးသားဖေါ်ပြထားသည်။
မီးတောင်သည် ဗုဒ္ဓဟူးနေ့ နံနက် ၁ နာရီ ၃၅ မိနစ် (အင်္ဂါနေ့ ၁၈ နာရီ ၃၅ မိနစ်) တွင် ကိုးမိနစ်ခန့် ပေါက်ကွဲခဲ့ကြောင်း အင်ဒိုနီးရှားဘူမိဗေဒအေဂျင်စီက နှစ်နာရီစောပြီး ပေါက်ကွဲပြီးနောက် သတင်းထုတ်ပြန်ချက်တွင် ဖော်ပြထားသည်။
ဘူမိဗေဒအေဂျင်စီအကြီးအကဲ မူဟာမက် ဝဖစ်ကလူများသည် မီးတောင်ပေါက်ကွဲသည့်နေရာမှ အနည်းဆုံး ၆ ကီလိုမီတာမှ ၇ ကီလိုမီတာ (၃.၇ မှ ၄.၃ မိုင်) အကွာတွင် ရှိနေသင့်ပြီး မီးတောင်မှ ပစ္စည်းများ ၁,၅၈၄ မီတာ (၅,၀၈၀ ပေ) မြင့်သော တောင်ထိပ်ထက် ကောင်းကင်သို့ ၁၀ ကီလိုမီတာ (၆.၂ မိုင်) ထိပစ်လွှတ်ခဲ့ကြောင်း ပြောကြားခဲ့သည်။
“မိုးသည်းထန်စွာရွာပါက မီးတောင်အနီးရှိနေထိုင်သူများသည် မီးတောင်ရွှံ့နွံများထွက်နိုင်ချေကို သတိထားသင့်သည်” ဟု ဝဖစ်ကပြောကြားပြီး မီးတောင်ပေါက်ကွဲမှုမှ ပြာများ ပျံ့နှံ့သွားပါက လေဆိပ်လုပ်ငန်းများနှင့် လေယာဉ်ခရီးစဉ်များကို အနှောင့်အယှက်ဖြစ်စေနိုင်ကြောင်း ထပ်လောင်းပြောကြားခဲ့သည်။
အာဏာပိုင်များသည် လဝိုတိုဘီ၏ အနောက်ဘက် ၆၀ ကီလိုမီတာ (၃၇ မိုင်) အကွာရှိ မူမာရီ ရှိ ဖရန်စီစကွစ် ခါဗီးရတ်စ် စီဒါ လေဆိပ်တွင်လုပ်ငန်းများကို ရပ်ဆိုင်းထားကြောင်း လေဆိပ်ကအင်စတာဂရမ်ပို့စ်တွင် ဖော်ပြထားသည်။ လေဆိပ်ကို ကြာသပတေးနေ့အထိ ပိတ်ထားပါသည်။
ဇူလိုင်လတွင်လည်း အလားတူပင် မီးတောင်ပေါက်ကွဲခဲ့ပြီး အမြင့် ၁၈ ကီလိုမီတာ (၁၁ မိုင်) အထိ ပြာများတက်ခဲ့သဖြင့် ဘာလီအပန်းဖြေကျွန်းရှိ နိုင်ငံတကာလေဆိပ်တွင် လေယာဉ်ခရီးစဉ်များကို ဖျ-က်သိမ်းခဲ့ရသည်။
၂၀၂၄ ခုနှစ် နိုဝင်ဘာလတွင် မီးတောင်ပေါက်ကွဲမှုကြောင့် ဒေသခံကျေးရွာများတွင် နေထိုင်သူ ၁၀ ဦး ေ-သဆုံးခဲ့ပြီး အိမ်ခြေထောင်ပေါင်းများစွာ ပျ-က်စီးခဲ့ကြောင်း သတင်းများအရ သိရသည်။
မီးတောင် ၁၂၀ ကျော်ရှိသည့် အင်ဒိုနီးရှားနိုင်ငံသည် ဂျပန်နိုင်ငံမှ အရှေ့တောင်အာရှတစ်လျှောက်နှင့် ပစိဖိတ်မြစ်ဝှမ်းတစ်လျှောက် ပြင်းထန်သောငလျင်လှုပ်ခတ်မှုနယ်မြေဖြစ်သည့် ပစိဖိတ်မီးကွင်းတွင် တည်ရှိသည်။
Ref: အယ်လ်ဂျားဇီးယား