အခွန်ထမ်း ပြည်သူများ အခွန်ပေးဆောင်ရာတွင် အွန်လိုင်းငွေပေးချေမှုစနစ်ဖြင့်သာ အခွန်ပေးဆောင်ရမည်ဖြစ်ပြီး အခွန်ပေးဆောင်မှုဆိုင်ရာ လုပ်ဆောင်ချက်များကို အွန်လိုင်းမှတစ်ဆင့် ဝင်ရောက်ကြည့်ရှုနိုင်မည့် Taxpayer Portal အား တိုးချဲ့ ဆောင်ရွက်လျက်ရှိကြောင်း စီမံကိန်းနှင့် ဘဏ္ဍာရေးဝန်ကြီးဌာနက ဇူလိုင်လ (၁၁) ရက်တွင် အသိပေးကြေညာထားသည်။
ပြည်တွင်းအခွန်များဦးစီးဌာနသည် အခွန်ထမ်းပြည်သူများ အခွန်ပေးဆောင်ရာတွင် လွယ်ကူလျင်မြန်စေရန် ရည်ရွယ်၍ ပုဂ္ဂလိကဘဏ်များ၏ အီလက်ထရောနစ်ငွေပေးချေမှုနည်းလမ်းများ၊ မိုဘိုင်းငွေပေးချေမှုနည်းလမ်းများ (Mobile Banking, Mobile Payment)တို့ဖြင့် မြန်မာ နိုင်ငံတော်ဗဟိုဘဏ်၏ ငွေပေးချေမှုကွန်ယက်စနစ် CBM – Net မှ တဆင့်လည်းကောင်း၊ MPU Debit Card အသုံးပြု၍ အွန်လိုင်းမှလည်းကောင်း အခွန်ပေးဆောင်နိုင်ရေး ဆောင်ရွက်ထားရှိပြီးဖြစ်သည်ဟု ဖော်ပြထားသည်။
ထို့ကြောင့် ၂၀၂၁ ခုနှစ်၊ ဇူလိုင်လ ၁ ရက်မှစ၍ နိုင်ငံပိုင်ဘဏ်များတွင် ဘဏ်ငွေစာရင်းဖွင့်လှစ်ထားသော အခွန်ထမ်းများမှအပ အခွန်ထမ်းကြီးများဆိုင်ရာ အခွန်ရုံးများနှင့် ရန်ကုန်မြို့ရှိ အလယ်အလတ် အခွန်ထမ်းများဆိုင်ရာ အခွန်ရုံးများတွင် အခွန်ထမ်း ကုမ္ပဏီအဖွဲ့အစည်းများအနေဖြင့် အီလက်ထရောနစ် ငွေပေးချေမှုစနစ်များဖြင့်သာ အခွန်ပေးဆောင်ရန် တပြေးညီ လက်ခံကျင့်သုံးဆောင်ရွက်လျက်ရှိရာ ပူးပေါင်းပါဝင်ဆောင်ရွက်ကြရန် မေတ္တာရပ်ခံအသိပေးထားရှိပြီးဖြစ်ကြောင်း သိရသည်။
အီလက်ထရောနစ်ငွေပေးချေမှုနည်းလမ်းများ၊ မိုဘိုင်းငွေပေးချေမှု နည်းလမ်းများ (သို့မဟုတ်) MPU Debit Card ကို အသုံးပြု၍ အခွန်ပေးဆောင်ရာတွင် သက်ဆိုင်ရာ အီလက်ထရောနစ် ငွေရေးကြေးရေး ဝန်ဆောင်မှုလုပ်ငန်းများမှ အခွန်ပေးသွင်းပြီးကြောင်း အထောက်အထားကို ကနဦးထုတ်ပေးမည်ဖြစ်ပြီး မြန်မာ့စီးပွားရေးဘဏ်၊ ဘဏ်ခွဲများရှိ သက်ဆိုင်ရာ အခွန်ရုံးများ၏ ငွေစာရင်းများတွင် အခွန်ငွေလွှဲပြောင်းလက်ခံရရှိပြီးပါက ပြည်တွင်းအခွန်များဦးစီးဌာနမှ အခွန်ငွေပေးသွင်းပြီးကြောင်း အထောက်အထား (ပတခ(e-payment)) ကို အခွန်ထမ်းထံကို Email ပေးပို့အကြောင်းကြားလျက်ရှိသည်။
တစ်ဦးချင်းအခွန်ထမ်းများအပါအဝင် တစ်နိုင်ငံလုံးရှိ အခွန်ထမ်းများအနေဖြင့် ဘဏ်များ၏ ငွေပေးချေမှုစနစ် (Payment Channel) အသီးသီးမှတစ်ဆင့် အီလက်ထရောနစ်ငွေပေးချေမှု နည်းလမ်းများဖြင့် လွယ်ကူလျင်မြန်စွာ အခွန်ပေးဆောင်နိုင်ရန်အတွက် အီလက်ထရောနစ် အခွန်ပေးဆောင်မှုစနစ်သစ်များနှင့် အခွန်ထမ်းတစ်ဦးချင်းအနေဖြင့် မိမိတို့သက်ဆိုင်သည့် အခွန်ပေးဆောင်မှုဆိုင်ရာ လုပ်ဆောင်ချက်များကို အွန်လိုင်းမှတစ်ဆင့် ဝင်ရောက်ကြည့်ရှုနိုင်မည့် Taxpayer Portal ကို တိုးချဲ့အကောင်အထည်ဖော်ရန် စီစဥ်ဆောင်ရွက်လျက်ရှိကြောင်းလည်း စီမံကိန်းနှင့် ဘဏ္ဍာရေးဝန်ကြီးဌာနက ၎င်းတို့၏ ထုတ်ပြန်ချက်တွင် ဖော်ပြထားသည်။
သို့ဖြစ်၍ အခွန်ထမ်းကုမ္ပဏီအဖွဲ့အစည်းများအနေဖြင့် နိုင်ငံတော်သို့ ငွေသား/ချက်လက်မှတ်/ငွေပေးအမိန့်လွှာဖြင့် အခွန်ငွေပေးသွင်းမှုအစား ပိုမိုလွယ်ကူလျင်မြန်ပြီး လုံခြုံမှုရှိသည့် အီလက်ထရောနစ်ငွေပေးချေမှုစနစ်များဖြင့်သာ အခွန်ပေးနိုင်ရေးအတွက် ပူးပေါင်းပါဝင်ဆောင်ရွက်ပေးကြရန် စီမံကိန်းနှင့် ဘဏ္ဍာရေးဝန်ကြီးဌာနက ထပ်မံ၍ တိုက်တွန်းနှိုးဆော်ထားသည်။
