အခေါက်ရွှေ (၁) ကျပ်သား (၂၈) သိန်းအထိ ဈေးတက်လာ၊ (၃) ရက်အတွင်း (၃) သိန်းဝန်းကျင်အထိ တက်လာခြင်းဖြစ်
ပြည်တွင်း ရွှေဈေးကွက်ကို ထိန်းချုပ်ရန် အခက်အခဲဖြစ်နေပြီး ယနေ့ ပေါက်ဈေးအရ ရက်ပိုင်းအတွင်း ကျပ် (၃) သိန်းဝန်းကျင် မြင့်တက်သွားကြောင်း ရွှေဈေးကွက် အတွင်းမှ သိရသည်။
ဩဂုတ်လ (၁၃) ရက် ညနေ အပိတ်ဈေးအရ ဈေး ကွက်အတွင်း၌ (၁၆) ပဲရည် အကယ်ဒမီ မီးလင်းရွှေ (၁) ကျပ်သားလျင် (၂၈) သိန်း ဈေးပေါက်နေပြီး (၃) ရက်အတွင်း ကျပ် (၃)သိန်းခွဲဝန်းကျင် ဈေးမြင့်တက်သွားခြင်း ဖြစ်သည်။
ရန်ကုန် ရွှေလုပ်ငန်းရှင်အသင်း၏ ယနေ့ ဩဂုတ်လ (၁၃) ရက် ညနေပိုင်းအထိ ရည်ညွှန်းရွှေဈေးနှုန်းမှာ (၁) ကျပ်သားလျင် ၂၁၀, ၁၀၀၀ ကျပ် သတ်မှတ်ထားသော်လည်း ဈေးကွက်တွင် မည်သည့်ဆိုင်ကမှ အဆိုပါ ဈေးနှုန်းအတိုင်း ရောင်းဝယ်ခြင်း မလုပ်ကြပေ။
” အရောင်းအဝယ် လုပ်ချင်တယ်ဆိုရင် ဆိုင်ကိုရောက်တဲ့အချိန် ဈေးကွက်ပေါက်ဈေးနဲ့ တွက်ပြီး အရောင်းအဝယ် လုပ်မှာ ဖြစ်ပါတယ်” ဟု ရန်ကုန်မြို့ရှိ နာမည်ကြီး ရွှေဆိုင်တစ်ဆိုင်မှ တာဝန်ရှိသူတစ်ဦးက ယနေ့ ညနေပိုင်းတွင် ပြောသည်။
ပြည်တွင်း ရွှေဈေးနှုန်း မြင့်တက်ရခြင်းမှာ သယ်ယူစရိ တ်များ မြင့်တက်ခြင်း၊ ကုန်ထုတ်လုပ်မှု စရိတ်များ မြင့်တက်ခြင်းနှင့် အထွေထွေ ဝန်ဆောင်စရိတ်များ မြင့်တက်လာခြင်းကြောင့် ဖြစ်သည်ဟု ရွှေလုပ်ငန်းရှင်အသင်းများက ပြောဆိုနေသော်လည်း နိုင်ငံခြားငွေ ဈေးနှုန်း နှင့် မြန်မာ ကျပ်ငွေ တန်ဖိုးထိုးကျနေမှုကို မထိန်းချုပ်နိုင်ခြင်းသည် အဓိက အကြောင်းရင်း ဖြစ်သည်ဟု သုံးသပ်မှုများလည်း ရှိနေသည်။
ဈေးကွက်အတွင်း ရွှေကုန်ကြမ်း အလုံအလောက်ရှိသည့် အတွက် ရွှေဈေးနှုန်း အဆမတန်မြင့်တက်မည် မဟုတ်ကြောင်း ပြီးခဲ့သည့် ဇူလိုင်လကုန်ပိုင်းအတွင်းက ရန်ကုန် တိုင်း ရွှေလုပ်ငန်းရှင်များ အသင်းဥက္ကဋ္ဌက ပြောကြားထားသော်လည်း ယင်းသို့ ပြောဆိုပြီးနောက် ကျပ် (၆) သိန်းဝန်းကျင်အထိ တဟုန်ထိုး မြင့်တက်လာခြင်း ဖြစ် သည်။
ယင်းကဲ့သို့ ဈေးနှုန်းမတည်မငြိမ်ဖြစ်ပေါ်နေသည့်အတွ က် ရန်ကုန်အခြေစိုက် နာမည်ကျော် ရွှေဆိုင်အချို့ အ ရောင်းအဝယ် ရပ်နားထားကြောင်းလည်း သိရသည်။
” ဒီနေ့ ရွှေဈေးလည်း မဖွင့်ပါဘူး။ အရောင်းအဝယ်လည်း မလုပ်ဘူး။ နားထားပါတယ်” ဟု အဆိုပါ ရပ်နားထားသ ည့် ရွှေဆိုင်တာဝန် ရှိသူက ပြောသည်။
ဩဂုတ်လ (၁၃) ရက် ရန်ကုန်ရွှေအသင်း ရည်ညွှန်းဈေးနှုန်းမှာ (၁၆) ပဲရည် အကယ်ဒမီ မီးလင်းရွှေ (၁)ကျပ် သားလျင် ၂၁၀၁၀၀၀ ကျပ် သတ်မှတ်ထား ဈေးကွက် ပေါက်ဈေးမှ ၂၈၀၀၀၀၀ ကျပ် ဝန်းကျင်နှင့် (၁၅) ပဲရည် (၁) ကျပ်သားလျင် ၂၆၀၀၀၀၀ ကျပ်အထက် ပေါက်ဈေး ရှိနေကြောင်း သိရသည်။