ကမ္ဘောဒီးယားဝန်ကြီးချုပ်ဟောင်း ဟွန်ဆန်က တောင်းဆိုသည့်အတိုင်း လုပ်ဆောင်ရန် ဒေသဆိုင်ရာ ထိုင်းတပ်မှူးတစ်ဦးကို သူကတို-က်တွန်းထားသည့် ဖုန်းပြောဆိုမှုပေါ-က်ကြားခဲ့ပြီးနောက်တွင် ဟွန်ဆန်နှင့် ပုဂ္ဂိုလ်ရေးဖုန်းပြောဆိုမှုကို ထပ်လုပ်တော့မည်မဟုတ်ကြောင်း ထိုင်းဝန်ကြီးချုပ် ပေတုံတန်ရှင်နာဝပ်ထရာက ပြောဆိုလိုက်သည်။
ဗုဒ္ဓဟူးနေ့က ထွက်ပေါ်လာသည့် ကိုးမိနစ်စာ အသံဖိုင်သည် သူ၏ အသံဖြစ်ကြောင်း မစ္စပေတုံတန်က ဗုဒ္ဓဟူးနေ့တွင်ပင်ဝန်ခံခဲ့သည်။ သူနှင့် ဟွန်ဆန်သည် စကားပြန်တစ်ဦးအကူအညီဖြင့် တနင်္ဂနွေနေ့က ထိုင်း၊ ခမာ ဘာသာစကားတို့သုံးကာ ဖုန်းဆက်သွယ်ပြောဆိုခဲ့ခြင်း ဖြစ်သည်။
အသံဖိုင်အစတွင် သာကြောင်းမာကြောင်း၊ တစ်ဦးနှင့်တစ်ဦး နှုတ်ခွန်းဆက် ပြောဆိုခဲ့ကြပြီးနောက်တွင် နှစ်နိုင်ငံအကြား ဆက်ဆံရေးယိုယွင်းစေခဲ့သည့် နယ်စပ်အငြင်းပွားမှုအကြောင်း ဆွေးနွေးခဲ့ကြသည်။
နှစ်နိုင်ငံစလုံးတွင် ငြိမ်းချမ်းစေရန် သူနှင့်ဟွန်ဆန်တို့ တူညီသော သဘောထားရှိကြကြောင်း မစ္စပေတုံတန်က ပြောဆိုထားခဲ့သည်။
ဟွန်ဆန်ကို “ဦးလေး” ဟု သူကသုံးနှုန်းပြောဆိုခဲ့ကာ ဟွန်ဆန်အနေဖြင့် မိမိတို့ အတို-က်အခံတစ်ဦးဖြစ်သော ဒုတိယစစ်တိုင်းမှူးကဲ့သို့ မိမိတို့နှင့် သဘောထားကွဲလွဲသူများ၏ စကားကို နားမဝင်စေလိုကြောင်း၊ သူပြောခဲ့သော စကားများကြောင့် ဝမ်းနည်း စိတ်မကောင်းမဖြစ်စေလိုကြောင်းနှင့် ယင်းပြောကြားချက်များသည် မိမိတို့၏ ရည်ရွယ်ချက်မဟုတ်ပါကြောင်း ပေတုံတန်က ပြောဆိုထားခဲ့သည်။
ပေတုံတန်ပြောဆိုသည့် ဒုတိယတိုင်းမှူးဆိုသည်မှာ ထိုင်းအရှေ့မြောက်ပိုင်းဒေသကို တာဝန်ယူရသည့် ဒုတိယစစ်တိုင်းမှူး ဒုတိယဗိုလ်ချုပ်ကြီး Boonsin Paadklang ဖြစ်သည်။ ထိုင်းနိုင်ငံသည် တို-က်ရန်အသင့်ဖြစ်ပြီဟု ဒုဗိုလ်ချုပ်ကြီး၏ ပြောဆိုခဲ့မှုကြောင့် ဟွန်ဆန်ကို ဒေါသထွက်စေခဲ့သည်။
သူ့အနေဖြင့် ဟွန်ဆန်နှင့် ပုဂ္ဂိုလ်ရေးအရ အလွတ်သဘောပြောဆိုရာတွင် စိတ်တည်ငြိမ်စေရန် ကြိုးစားခဲ့ရသည်ဟု ပေတုံတန်က ပြောဆိုခဲ့သည်။
စကားပြောဆိုခြင်း အတတ်ပညာအရ ထုတ်မပြောသင့်ကြောင်း ကာကွယ်ရေးဝန်ကြီး၊ ဝန်ကြီးချုပ်၏ အတွင်းရေးမှူးချုပ်တို့နှင့်အတူ မိုက်ခရိုဖုန်းရှေ့တွင် ရပ်ရင်းပေတုံတန်က ပြောဆိုခဲ့သည်။
“နိုင်ငံတော်ငြိမ်းချမ်းရေးကို ထိန်းသိမ်းဖို့ ရည်ရွယ်ချက်ရှိတယ်လို့ ကျမယူဆပြီး ပျော့ပြောင်းတဲ့ စကားလုံးတွေ သုံးခဲ့ပါတယ်” ဟု သူကပြောဆိုပြီး သူသည်ပုံမှန်အားဖြင့် ပုဂ္ဂိုလ်ရေးအရ ပြောဆိုကြရာတွင် ဟွန်ဆန်ကို ဦးလေးဟု ခေါ်ဆိုလေ့ရှိကြောင်းလည်း ပြောကြားခဲ့သည်။
ဟွန်ဆန်ကလည်း ဇွန်လ ၁၅ ရက်က ၁၇ မိနစ်ကြာ ဖုန်းပြောဆိုမှုကို အသံသွင်းထားခဲ့ကြောင်း ဆိုရှယ်မီဒီယာပို့စ်တွင် အတည်ပြုပြောဆိုခဲ့သည်။ သူ့အနေဖြင့် နားလည်မှုလွဲမှားခြင်းများ မဖြစ်လိုသောကြောင့် ထိုင်းအာဏာပိုင်များထံ အသံဖိုင်အပြည့်အစုံကို ပေးအပ်သွားမည်ဖြစ်ကြောင်း ဟွန်ဆန်က ပြောကြားခဲ့သည်ဟု ခမာတိုင်းမ်စ်သတင်းဌာနက ဖော်ပြခဲ့သည်။
အသံဖိုင်ကောက်နှုတ်ချက် ပေါ-က်ကြားခဲ့သည်ဆိုသည်ကိုမူ သူကငြင်းဆိုခဲ့ပြီး သူသည်အသံဖိုင်ကို နိုင်ငံမှ တာဝန်ရှိသူ ၈၀ ခန့်ကို မျှဝေခဲ့ကြောင်း ပြောကြားခဲ့သည်။
Ref: ဘန်ကောက်ပို့စ်