ဟော်မုဇ်သို့ ရေတပ်သင်္ဘောများ မလွှတ်ပါ–သြစတြေးလျ

ကင်န်ဘာရာ၊ မတ်လ ၁၆ ရက်

ဟော်မုဇ်ရေလက်ကြားရှိ ရေနံတင်သင်္ဘောများကို အကာအကွယ်ပေးရန်အတွက် သြစတြေးလျအနေဖြင့် ရေတပ်သင်္ဘောများကို စေလွှတ်မည်မဟုတ်ကြောင်း ဝါရင့်အစိုးရဝန်ကြီးတစ်ဦးက တနင်္လာနေ့တွင် ပြောကြားခဲ့ကြောင်း သိရသည်။

သြစတြေးလျနိုင်ငံသည် အရှေ့အလယ်ပိုင်းတွင် ဖြစ်ပွားနေသော ပဋိပက္ခများကြောင့် ပေါ်ပေါက်လာသည့် “စီးပွားရေး အကျပ်အတည်း” အတွက် ကောင်းမွန်စွာ ပြင်ဆင်ထားပြီး ဒေသတွင်းသို့ စစ်သင်္ဘောစေလွှတ်မည်မဟုတ်ကြောင်း ဝန်ကြီးချုပ် အန်သိုနီ အယ်လ်ဘာနီးစ်၏ အစိုးရအဖွဲ့ဝင်ဖြစ်သူ အခြေခံအဆောက်အဦ၊ သယ်ယူပို့ဆောင်ရေး၊ ဒေသန္တရဖွံ့ဖြိုးတိုးတက်ရေးနှင့် ဒေသန္တရအစိုးရဝန်ကြီး ကတ်သရင်းကင်း က အေဘီစီ ရေဒီယိုသို့ ပြောကြားခဲ့သည်။

အစိုးရအနေဖြင့် အနည်းဆုံး သိုလှောင်ထားရမည့် စက်သုံးဆီပမာဏ သတ်မှတ်ချက်ကို လျှော့ချပေးခြင်းနှင့် ကန့်သတ်ချက်ထက်ပိုသော ဆာလဖာပါဝင်သည့် စက်သုံးဆီများကို အသုံးပြုနိုင်ရန် စံချိန်စံညွှန်းများကို ယာယီပြင်ဆင်ပေးခဲ့ပြီးနောက်၊ တနင်္လာနေ့အထိ သြစတြေးလျတွင် ဓာတ်ဆီ ၃၇ ရက်စာ၊ ဒီဇယ် ၃၀ ရက်စာနှင့် လေယာဉ်ဆီ ၂၉ ရက်စာ သိုလှောင်ထားရှိကြောင်း ဝန်ကြီးကင်းက ဆိုသည်။

“အရှေ့အလယ်ပိုင်းကြောင့် ဖြစ်ပေါ်လာတဲ့ စီးပွားရေး အကျပ်အတည်းကို ကျော်လွှားနိုင်ဖို့ ကျွန်မတို့နိုင်ငံမှာ ကောင်းကောင်းပြင်ဆင်ထားပါတယ်” ဟု ၎င်းက ပြောသည်။

ဖက်ဒရယ်အစိုးရသည် စနေနေ့တွင် နိုင်ငံသားများအနေဖြင့် ဘာရိန်း၊ အီရန်၊ အီရတ်၊ အစ္စရေး၊ ကူဝိတ်၊ လက်ဘနွန်၊ ပါလက်စတိုင်း၊ ကာတာ၊ ဆီးရီးယား၊ ယီမင်နှင့် အာရပ်စော်ဘွားများ ပြည်ထောင်စုနိုင်ငံများကို ဖြတ်သန်းသွားလာခြင်း မပြုရန် သတိပေးချက် ထုတ်ပြန်ခဲ့သည်။

နိုင်ငံခြားရေးနှင့် ကုန်သွယ်ရေးဝန်ကြီးဌာနသည် ယခင်ကတည်းက စမတ်ဒရာဘယ်လာ ဝန်ဆောင်မှုမှတစ်ဆင့် အဆိုပါနိုင်ငံများအားလုံးသို့ ခရီးမသွားရန် သတိပေးထားသော်လည်း၊ စနေနေ့တွင်မူ သြစတြေးလျနိုင်ငံသားများအနေဖြင့် လေဆိပ်မှ ထွက်ခွာရန် အစီအစဉ်မရှိလျှင်ပင် အဆိုပါနိုင်ငံများကို ခရီးတစ်ထောက် ဖြတ်သန်းခြင်း မပြုလုပ်သင့်ကြောင်း ထပ်မံပြောကြားခဲ့သည်။

ပဋိပက္ခများသည် ပိုမိုအရှိန်မြင့်လာနိုင်ဖွယ်ရှိပြီး လေကြောင်းခရီးစဉ်များမှာ ရုတ်တရက် ပြောင်းလဲခြင်း သို့မဟုတ် ရပ်တန့်ခြင်းများ ရှိနိုင်ကြောင်းလည်း ဖော်ပြထားသည်။

Ref: ရှင်ဟွာ