ဟုမ္မလင်း၊ ဇူလိုင် ၂၁
ချင်းတွင်းမြစ်ရေသည် ဟုမ္မလင်းမြို့၌ စိုးရိမ်ရေမှတ်သို့ ရောက်ရှိနေပြီး နောက်တစ်ရက်အတွင်း ထပ်မံမြင့်တက်လာနိုင်သဖြင့် မြစ်ကမ်းအနီးနှင့် မြေနိမ့်ပိုင်းတွင် နေထိုင်သူများအနေဖြင့် ရေဘေးအန္တရာယ်ကို ကြိုတင်သတိပြုကြရန် မိုးလေဝသနှင့် ဇလဗေဒညွှန်ကြားမှုဦးစီးဌာနက သတိပေးထုတ်ပြန်ထားသည်။
မိုးလေဝသနှင့် ဇလဗေဒညွှန်ကြားမှုဦးစီးဌာန၏ ၂၀၂၆ ခုနှစ် ဇူလိုင် ၂၁ ရက် နံနက် ၈ နာရီထုတ် ရေကြီးမှုအခြေအနေ သတင်းအရ၊ ယနေ့ နံနက် ၆ နာရီ ၃၀ မိနစ် တိုင်းထွာချက်တွင် ဟုမ္မလင်းမြို့ရှိ ချင်းတွင်းမြစ်ရေသည် စိုးရိမ်ရေမှတ်သို့ ရောက်ရှိနေကြောင်း သိရသည်။
ထုတ်ပြန်ချက်အရ ချင်းတွင်းမြစ်ရေသည် နောက်တစ်ရက်အတွင်း ၁ ပေခန့် ထပ်မံမြင့်တက်လာနိုင်ပြီး ဟုမ္မလင်းမြို့၏ စိုးရိမ်ရေမှတ်အထက်တွင် ဆက်လက်တည်ရှိနိုင်ကြောင်း ဖော်ပြထားသည်။
ယင်းကြောင့် ဟုမ္မလင်းမြို့နယ်အတွင်းရှိ မြစ်ကမ်းအနီးနှင့် မြေနိမ့်ပိုင်းတွင် နေထိုင်သူများအနေဖြင့် ရေဘေးလွတ်ရာနေရာများသို့ ကြိုတင်ရွှေ့ပြောင်းနေထိုင်ခြင်း၊ သက်ဆိုင်ရာဌာနများ၏ လမ်းညွှန်ချက်များကို လိုက်နာခြင်းဖြင့် ရေဘေးအန္တရာယ်ကို ကြိုတင်ကာကွယ်ကြရန် မိုး/ဇလက တိုက်တွန်းထားသည်။