တရုတ်ပြည်တွင်း၌ ခရီးသွားလျှင်တောင် နေရာမတူလျှင် ခံစားရသည့် အရသာတွေ မတူပေ။
တရုတ်ပြည် အရှေ့မြောက်ဘက်သည် ခမ်းနားသော မြောက်ဘက်ရှုခင်း၊ ရေခဲနှင့် နှင်းများ၊မြို့ကြီး ပြကြီး လူအုပ်ကြီးနှင့်ဝေးကွာသော အေးချမ်းသာယာသောမြေ၊ ရောင်စုံတောက်ပသောကမ္ဘာမှသည် ဖြူစင်သောအဖြူရောင်ကမ္ဘာကိုရောက်သလိုမျိုး၊ နှင်းထုများပြည့်နှက်နေသော ခေတ်သစ်မြို့ကြီး ဟာပင်း သည် ဆောင်းရာသီ ပွဲတော်ကြောင့်နာမည်ကျော်လေသည်။
ဆောင်းရာသီတွင် Harbin Ice and Snow Festival ကျင်းပလေ့ရှိပြီး နိုင်ငံတကာရေခဲပန်းပု ပြပွဲ ကအဓိကလည်ပတ်စရာပင်။
စတုရန်းမီတာ ၆သောင်း ကျယ်သော နတ်သမီးနယ်မြေထဲသို့ လျှောက်သွားကာ မယုံနိုင်စရာ အနုပညာမြောက်သည့် နှင်းပန်းပုများကို အနီးကပ်ကြည့်ရှု ဓါတ်ပုံရိုက်ကြရသည်က မမောနိုင်။
အေးမြသောနှင်းကို အသက် သွင်းပေးသော လက်မှုပညာသည်များ၏ စွမ်းရည်ကမအံ့သြဘဲ မနေနိုင် ဖြစ်စေမည်ဖြစ်သည်။
အနီးနားတွင်လည်း ဆိုက်ဘေးရီးယန်း ကျားဥယျာဥ်ရှိကာ မျိုးသုဉ်းလုနီးပါးဖြစ်နေသော ဆိုက်ဘေးရီးယားကျားများမွေးမြူရေးစင်တာရှိသည်။ ဆိုက်ဘေးရီးယား ကျားကောင်ရေ ၁၃၀၀ ကျော်ကို မွေးမြူထားသည်။ မတူညီသောကျားမျိုးစိတ်များ (ဆိုက်ဘေးရီးယားကျား၊ ကျားဖြူ၊ ခြင်္သေ့ဖြူ၊ ကျားသစ်၊ လီဂါစသည်ဖြင့်) ကိုလေ့လာကြည့်ရှုပြီး သဘာဝတရားအကြောင်း တွေးမိနေစေမည်။
Harbin International Ice and Snow Festival ကို ညဖက်လည်း ထပ်ထွက်ကြည့်လေ့ရှိကြသည်။
ရောင်စုံ LED မီးများဖြင့် အရောင်ခြယ်ထားသော ရေခဲနှင့် နှင်းပန်းပု ထောင်ကျော်ကပွဲတော်၏အဓိကအလှဖြစ်သည်။
ပွဲတော်တွေရဲ့လှုပ်ရှားတက်ကြွမှုကိုအာရုံနောက်သည်ဆိုပါကလည်းလူသူဝေးသည့်တောင်ပေါ်ဟော်တယ်များရှိသည်။တိတ်ဆိတ်ခြင်း၏အသံကို ခံစားရင်း လှို့ဝှက်သေားနှင်းက လူတွေကို ဖမ်းစားနိုင်လေသည်။
ကမ္ဘာ့အရှည်လျားဆုံးနှင်း လျှောစီးခြင်း၊ ရေခဲတောင်တက်ခြင်း၊ စကိတ်စီးခြင်းစသည်ဖြင့် ပျော်ရွှင်မှုတွေရွေးချယ်စရာပေါလှသည့် ဟာပင်းကို ဒီဆောင်းအမှီ သွားကြည့်နိုင်စေကြောင်းဆုတောင်းပါသည်။