သီရိလင်္ကာသမ္မတ ဇူလိုင် ၁၃ တွင်နှုတ်ထွက်မည်ဟုကြေငြာ

သီရိလင်္ကာသမ္မတ ဇူလိုင် ၁၃ တွင်နှုတ်ထွက်မည်ဟုကြေငြာ

ကိုလံဘို၊ဇူလိုင် ၉

သီရိလင်္ကာသမ္မတ Gotabaya Rajapaksa သည် လာမည့်သီတင်းပတ်တွင် ရာထူးမှ နုတ်ထွက်ရန် သဘောတူခဲ့ကြောင်း လွှတ်တော်ဥက္ကဋ္ဌ Mahinda Abeywardana က ပြောကြားခဲ့သည်။၎င်းသည် ဒေါသထွက်နေသော ဆန္ဒပြလူအုပ်ကြီးလက် မှလွတ်မြောက်ရန် စနေနေ့ (ဇူလိုင် ၉ ရက်) တွင် ၎င်း၏အစိုးရနေအိမ်‌ေတာ် မှ ထွက်ခွာလာကာ လုံခြုံသည့်နေရာတွင်ရှိနေသည်ဟုသိရှိရသည်။

“ငြိမ်းချမ်းတဲ့ အသွင်ကူးပြောင်းရေးဖြစ်စေဖို့ သမ္မတက ဇူလိုင် ၁၃ ရက်မှာ ရာထူးက ဆင်းမယ်လို့ပြောခဲ့ပါတယ်” ဟု Abeywardana က ရုပ်မြင်သံကြား ကြေညာချက်တွင်ပြောကြားခဲ့သည်။
“ဒါကြောင့် ပြည်သူတွေအနေနဲ့ တရားဥပဒေကိုလေးစားလိုက်နာပြီး ငြိမ်းချမ်းရေးကို ထိန်းသိမ်းကြပါလို့လည်း မေတ္တာရပ်ခံပါတယ်” ဟု၎င်းကဆိုသည်။

ဆယ်စုနှစ်ခုနစ်ခုအတွင်း အဆိုးရွားဆုံး စီးပွားရေးအကျပ်အတည်းကြောင့် ကိုလံဘိုမြို့ရှိ သမ္မတနေအိမ်‌ေတာ် ကို စနေနေ့တွင် ထောင်နှင့်ချီသောဆန္ဒပြသူများက ၀င်ရောက်စီးနင်းခဲ့ကြသည်။

သမ္မတအိမ်တော်တံခါးကို တိုက်ဖွင့်ပြီးနောက် ရာနှင့်ချီသောလူများသည် ၎င်း၏ အခန်းများတစ်လျှောက် လျှောက်သွားနေ သည်ကို လူမှုမီဒီယာတွင်တိုက်ရိုက်ထုတ်လွှင့်ခဲ့သည်ကို မြင်တွေ့ရပြီး ဆူညံနေသော လူအုပ်ထဲမှအချို့သည် ခြံဝင်းအတွင်းရှိ ရေကန်ထဲသို့ခုန်ဆင်း‌ကာ ဆန္ဒထုတ်‌ဖော်နေကြသည်။

သမ္မတသည် လက်မတင်လေးပင် ထွက်ပြေးသွားခဲ့ပြီး ၎င်းလွတ်မြောက်ရန် တပ်ဖွဲ့ဝင်များက သေနတ်ကိုမိုး‌ပေါ်ထောင်ဖောက်၍ လမ်းရှင်းကာ ကူညီဆောင်ရွက်ပေးခဲ့ရသည်။ဆန္ဒပြသူများသည် Rajapaksa ကို ဆက်ခံမည့် ပထမဆုံးသော ၀န်ကြီးချုပ် Ranil Wickremesinghe ၏ နေအိမ်သို့လည်း ၀င်ရောက်စီးနင်းကာမီးရှို့ဖျက်ဆီးခဲ့ကြသည်။ဝန်ကြီး ချုပ် သည်လည်း လုံခြုံရာအရပ်တွင်တိမ်းရှောင်နေရသည်ဟုဆိုသည်။

Wickremesinghe သည် ယခုဖြစ်ပေါ်နေသော ဆူပူအုံကြွမှုကို မည်သို့လုပ်ဆောင်ရမည်ကိုဆုံးဖြတ်ရန် နိုင်ငံရေးပါတီအများအပြားနှင့် အစောပိုင်းကတွေ့ဆုံဆွေးနွေးခဲ့သည်။

“Wickremesinghe သည် ၎င်းအနေဖြင့်ဝန်ကြီးချုပ်ရာထူးမှနုတ်ထွက်ပြီး နိုင်ငံရေးပါတီများအားလုံးပါဝင်သော ကြားဖြတ် အစိုးရတစ်ရပ်ကို ဖွဲ့စည်းရန်ဆန္ဒရှိကြောင်း ပါတီ ခေါင်းဆောင်များအား ပြောကြားခဲ့သည်” ဟု ၎င်း၏ရုံးမှထုတ်ပြန်ချက်တွင်ပါရှိသည်။

သမ္မတနှင့် ဝန်ကြီးချုပ် ရာထူးမှ နှုတ်ထွက်ခြင်းအပါအဝင် ပါတီများမှခေါင်းဆောင်များ အစည်းအဝေးတွင် ဆုံးဖြတ်ချက် အများအပြားချမှတ်ခဲ့ပြီး ယာယီသမ္မတတစ်ဦးကို ခုနစ်ရက်အတွင်း လွှတ်တော်သို့ ခေါ်ဆောင်တင်‌မြှောက်သွားမည်ဖြစ်ကြောင်း လွှတ်တော် ဥက္ကဋ္ဌ Mahinda Yapa Abeywardena က ပြောကြားခဲ့သည်။

လက်ရှိပါလီမန်သည် ဝန်ကြီးချုပ်အသစ်နှင့် ကြားဖြတ်အစိုးရကို ခန့်အပ်နိုင်သည်ဟု လွှတ်တော်ဥက္ကဋ္ဌရုံးကထုတ်ပြန်သည့်စာတွင်ဖော်ပြထားသည်။

“အချိန်တစ်ခု သတ်မှတ်ပြီးတဲ့အချိန်မှာတော့ ပြည်သူတွေက ပါလီမန်အသစ်ကို ရွေးကောက်တင်မြှောက်ဖို့ ရွေးကောက်ပွဲတစ်ခုကျင်းပနိုင်ပါတယ်” ဟုလည်း၎င်းကဆိုသည်။

လက်ရှိတွင် သီရိလင်္ကာသည် စီးပွားရေးအကျပ်အတည်းကြုံနေရပြီး ငွေကြေးဖောင်းပွခြင်း၊အစားအစာနှင့်လောင်စာဆီပြတ်လပ်ခြင်း၊စီးပွားရေးစနစ်တစ်ခုလုံးပြိုလဲနေခြင်း၊ဆေးဝါးအပါအဝင်အခြားသွင်းကုန်များအတွက် နိုင်ငံခြားငွေပြတ်လပ်ကာ ပြည်ပကြွေးမြီများတင်နေခြင်းတို့ကြောင့် နိုင်ငံတစ်ဝှမ်းဆန္ဒပြပွဲများဖြစ်ပေါ်လာကာ သမ္မတအိမ်တော်နှင့်အစိုးရရုံးများကိုပြည်သူများက ယခုလိုဝင်ရောက်စီးနင်းကြခြင်းဖြစ်သည်။

Source – CNA