မွန်ပြည်နယ်၊ သထုံမြို့နယ်၊ သိမ်ဆိပ်ဘူတာနှင့် ဒုံဝန်းဘူတာအကြားတွင် ယမန်နေ့ ဇူလိုင် (၁၇) က ရထားလမ်း မိုင်းဖောက်ခွဲခံရမှုကြောင့် ခရီးသည် ၅၀၀ ကျော်ပါသည့် လူစီးရထားလမ်းချော်ကျမှု ဖြစ်ပွားခဲ့ကြောင်း နစက၏ ထုတ်ပြန်ချက်အရ သိရသည်။
ထုတ်ပြန်ချက်တွင် မော်လမြိုင်မှ ထွက်ခွာလာသည့် အမှတ် (၈၂) အစုန် မော်လမြိုင်-ရန်ကုန်လူစီးအမြန်ရထားသည် မိုင်တိုင်အမှတ်၊ ၁၂၃/၁၇-၁၅ သို့ နံနက် (၁၁)နာရီ (၁၀) မိနစ်အချိန်၌ ရောက်ရှိဖြတ်သန်းစဉ် ရထားလမ်းမိုင်းပေါက်ကွဲထားခြင်းကြောင့် သံလမ်း (၁) ပေခွဲခန့် ပြတ်တောက်နေကာ စက်ခေါင်းနှင့်အတူ ရထားတွဲဆိုင်းတွင်ပါရှိသော လူစီးတွဲ (၂) တွဲ လမ်းချော်ကျမှုဖြစ်ပွါးခဲ့သည်ဟု ဖော်ပြထားသည်။
ထိုသို့ ရထားလမ်းချော်ကျမှုကြောင့် ခရီးသည်နှင့် ဝန်ထမ်းထိခိုက်မှုမရှိသော်လည်း သိမ်ဆိပ်-ဒုံဝန်းလမ်းပိုင်းအား နံနက် (၁၁) နာရီ (၁၃) မိနစ်တွင် ယာယီပိတ်ထားခဲ့ရကြောင်းလည်း သိရသည်။
အမှတ် (၈၂) အစုန် လူစီးအမြန်ရထားပေါ်တွင် ရိုးရိုးတန်းခရီးသည် (၃၁၃) ဦးနှင့် အထက်တန်းခရီးသည် (၁၄၆) ဦး စုစုပေါင်း (၄၅၉) ဦးပါဝင်ပြီး ဆက်လက်ထွက်ခွာနိုင်ရေးအတွက် ကျိုက်ထိုတွင် ရောက်ရှိနေသော အမှတ် (၈၁)အဆန် လူစီးအမြန်ရထားသည် ရထားလမ်းချော်ကျသည့် နေရာသို့ ရောက်ရှိပြီး ညနေ (၄) နာရီခွဲတွင် ခရီးသည်များအား ရထားကူးပြောင်းပြီးစီး၍ ညနေ (၅) နာရီခွဲတွင် အမှတ် (၈၂) အစုန် လူစီးအမြန်ရထားအဖြစ် ရန်ကုန်မြို့သို့ ဆက်လက်ပို့ဆောင်ပေးခဲ့ကြောင်း သိရသည်။
ထို့နောက် အမှတ်(၈၁)အဆန် လူစီးအမြန်ရထားမှ ခရီးသည်များ ဆက်လက်ထွက်ခွာနိုင်ရေးအတွက် လမ်းချော်ကျသော အမှတ် (၈၂) အစုန်တွဲဆိုင်း၏ လမ်းချော်မကျသော တွဲများဖြင့် ခရီးသည်များအား ကူးပြောင်းပြီး ညနေ (၅) နာရီ (၁၅) မိနစ်တွင် သထုံဘူတာဘက်သို့ ဆက်လက်ထွက်ခွာပေးနိုင်ခဲ့ပါသည်။
အဆိုပါခရီးသည်များ အဆင်ပြေစွာဆက်လက်ပို့ဆောင်ပေးနိုင်ရေးအတွက် မော်လမြိုင်တွင်ရှိသော စက်ခေါင်းနှင့် အရန်တွဲဆိုင်းဖြင့် သထုံဘူတာမှ စောင့်ကြိုပြီး အမှတ် (၈၁) အဆန်ရထားအဖြစ် မော်လမြိုင်သို့ ဆက်လက်ပို့ဆောင်ပေးခဲ့ကြောင်းသိရသည်။
မိုင်းဖောက်ခွဲဖျက်စီးခံရမှုကြောင့် ရထားလမ်းချော်ကျမှုဖြစ်စဉ် ဖြစ်ပွားရာနေရာသို့ နယ်မြေဒေသတာဝန်ရှိသူများ၊ နယ်မြေခံလုံခြုံရေးတပ်ဖွဲ့ဝင်တို့က အချိန်နှင့်တစ်ပြေးညီ နယ်မြေရှင်းလင်းစစ်ဆေးနေကာ မြန်မာ့မီးရထားဝန်ထမ်းများမှ လမ်းချော်ကျသော ရထားစက်ခေါင်းနှင့် လူစီးတွဲ (၂) တွဲအားမတင်၍ လမ်းပိုင်းအားအမြန်ဆုံး ပြန်လည်ဖွင့်လှစ်နိုင်ရေး ဆောင်ရွက်လျက်ရှိသည်ဟု နစကသတင်းထုတ်ပြန်ရေးအဖွဲ့က ထုတ်ပြန်ထားသည်။
