ကရင်ပြည်နယ်သည် မိုးသည်းထန်စွာရွာသွန်းပြီး တောင်ကျရေများစီးဆင်းမှုများကြောင့် မြစ်ရေ၊ ချောင်းရေများ မြင့်တက်လာကာ ရေကြီးရေလျှံမှု၊ မြေပြိုမှုကဲ့သို့သော သဘာဝဘေးအန္တရာယ်များကို နှစ်စဉ် ကြုံတွေ့ရလေ့ရှိသည့်အတွက် သဘာဝဘေးအန္တရာယ်ကျရောက်လာပါက အမိန့်တစုံတရာစောင့်ဆိုင်းမနေဘဲ ကယ်ဆယ်ရေး လုပ်ငန်းများကို အချိန်နှင့်တပြေးညီဆောင်ရွက်ကြရန် ပြည်နယ်ဝန်ကြီးချုပ် ဦးစောမြင့်ဦးက ပြောသည်။
ဇူလိုင်လ (၂၅) ရက် မွန်းလွဲပိုင်းက ပြုလုပ်သည့် ကရင်ပြည်နယ်အစိုးရအဖွဲ့ သဘာဝဘေးအန္တရာယ်ဆိုင်ရာ စီမံခန့်ခွဲမှုအဖွဲ့ လုပ်ငန်းညှိနှိုင်းအစည်းအဝေးတွင် ၎င်းက ပြောကြားခဲ့ခြင်း ဖြစ်သည်။
ယခုနှစ်သည်ဝါထပ်သည့် နှစ်ဖြစ်သည့်အတွက် ရေကြီးရေလျှံမှုများ ဖြစ်ပေါ်လာနိုင်ချေရှိခြင်းကြောင့် ပေါင်းစပ်ညှိနှိုင်း စီစဉ်ထားရမည့် လုပ်ငန်းများ၊ ကြိုတင်ကာကွယ်ရေး၊ ကူညီကယ်ဆယ်ရေး၊ နေရာချထားပေးရေးနှင့် ပြန်လည် ထူထောင်ရေး လုပ်ငန်းများကို ထိထိရောက်ရောက် ဆောင်ရွက်နိုင်ရန် အစည်းအဝေးကျင်းပရခြင်းဖြစ်ကြောင်းလည်း ဝန်ကြီးချုပ်က ပြောသည်။
ကရင်ပြည်နယ်အတွင်းရှိ သံလွင်၊ လှိုင်းဘွဲ၊ ဂျိုင်း၊ သောင်ရင်း၊ ဒုံသမိ၊ ဇမိ၊ ဟောင်သရော၊ မြစ်ကမ်းဘေးတစ်လျှောက်ရှိ မြို့ရွာများသည် နှစ်စဉ်ရေကြီးရေလျှံလေ့ရှိသည့်အတွက် သက်ဆိုင်ရာ ခရိုင်၊ မြို့နယ်များအလိုက် လိုအပ်သည့် လူအင်အား၊ စားနပ်ရိက္ခာ၊ ယာဉ်၊ ယန္တရား၊ အထောက်အကူပြုပစ္စည်းများကို အသင့်စုဖွဲ့၍ ရေ၊ မီး၊ မိလ္လာကိစ္စမှ အစ လစ်ဟင်းမှုမရှိအောင် စီမံပြင်ဆင်ထားရန်လည်း ပြည်နယ်ဝန်ကြီးချုပ်က မှာကြားသည်။
“သဘာဝဘေးကျရောက်လာပါက မည်သည့်အမိန့်ကိုမျှ စောင့်ဆိုင်းစရာ မလိုဘဲ ထိခိုက်ဆုံးရှုံးမှု အနည်းဆုံးဖြစ်အောင် အချိန်နှင့်တစ်ပြေးညီ ကူညီကယ်ဆယ်ရေးလုပ်ငန်းများကို ဆောင်ရွက်နိုင်ပါတယ်” ဟု ဦးစောမြင့်ဦးက ပြောသည်။
အဆိုပါ အစည်းအဝေးသို့ ကရင်ပြည်နယ် သဘာဝဘေး အန္တရာယ်ဆိုင်ရာစီမံခန့်ခွဲမှု လုပ်ငန်းအဖွဲ့ (၁၂) ဖွဲ့မှ အတွင်းရေးမှူးများက သက်ဆိုင်ရာကဏ္ဍများအလိုက် ဆွေးနွေးတင်ပြကြပြီး အစည်း အဝေးသို့ ဗီဒီယိုကွန်ဖရင့်စနစ်ဖြင့် တက်ရောက်လာသော ဘားအံ၊ သံတောင်ကြီး၊ ကြာအင်းဆိပ်ကြီး၊ ကော့ကရိတ်၊ မြဝတီ၊ ဖာပွန်ခရိုင် စီမံအုပ်ချုပ်ရေးအဖွဲ့ ဥက္ကဋ္ဌများက သက်ဆိုင်ရာခရိုင်များအလိုက် သဘာဝဘေး ကြိုတင်ကာကွယ်ရေးအဖွဲ့များ ဖွဲ့စည်းဆောင်ရွက်ထားရှိမှု၊ ကယ်ဆယ်ရေးစခန်းများ ဖွင့်လှစ်နိုင်ရေး ပြင်ဆင်ထားရှိမှု၊ လူ၊ ယာဉ်၊ ယန္တရား၊ ရိက္ခာ၊ ဆေးဝါး စုဖွဲ့ပြင်ဆင်ထားမှု၊ ပြောင်းရွှေ့ နေရာချထားပေးနိုင်ရေးဇာတ်တိုက်လေ့ကျင့်မှု အစရှိသည့် သဘာဝဘေး ကြိုတင်ပြင်ဆင်ထားရှိမှု အခြေအနေများကို ရှင်းလင်းတင်ပြခဲ့ကြကြောင်းလည်း သိရသည်။
