သတ္ထု့တွင်းထွက်သဘောတူညီချက် ကန်နှင့် ယူကရိန်း လက်မှတ်ရေးထိုး

အမေရိကနှင့် ယူကရိန်းတို့သည် နှစ်လကြာ နှောင့်နှေးနေခဲ့သည့် သတ္ထု့တွင်းထွက်ဆိုင်ရာ သဘောတူညီချက်ကို ဗုဒ္ဓဟူးနေ့တွင် လက်မှတ်ရေးထိုးလိုက်ကြောင်း သိရသည်။ စစ်ရေးဆိုင်ရာ အကူအညီများ အဆုံးသတ်ခဲ့ပြီးနောက်တွင် ယခုသဘောတူညီချက်သည် ကိဗ်အတွက် ကတိကဝတ်ပုံစံသစ်ဖြစ်သည်ဟု အမေရိကန်သမ္မတ ဒေါ်နယ်ထရမ့်ပ်အစိုးရအဖွဲ့က ခေါ်ဆိုခဲ့သည်။

နည်းပညာသစ်များအတွက် အရေးပါပြီး အသုံးပြုရခြင်းမရှိသေးသည့် ၎င်း၏ ကိုယ်ပိုင်မြေရှား ဒြပ်စင် များအပေါ် အချုပ်အခြာအာဏာ အပြည့်အဝရှိခြင်းပါဝင်သော အချိန်ကြာမြင့်သည့် စေ့စပ်ညှိနှိုင်းမှုများအပြီးတွင် သဘောတူညီချက်သည် အဓိကအကျိုးစီးပွားများကို လုံခြုံစေခဲ့သည်ဟု ယူကရိန်းက ပြောကြားခဲ့သည်။

လွန်ခဲ့သည့် သုံးနှစ်ကျော်က ရုရှား၏ ကျူးကျော်မှုဖြစ်အပြီးတွင် အမေရိကန်သမ္မတဟောင်း ဂျိုးဘိုင်ဒင်လက်ထက် အမေရိကန်လက်နက်များ ပေးအပ်ခဲ့ရမှုအတွက် လျော်ကြေးအဖြစ် ထရမ့်ပ်က ယူကရိန်း၏ ကြွယ်ဝသော သတ္ထု့များကို ရယူပိုင်ခွင့်တောင်းခဲ့သည်။

ကနဦးတွင် ယူကရိန်းက တုံ့ဆိုင်းနေခဲ့သော်လည်း ထရမ့်က ကမ္ဘာတစ်ဝန်းရှိ အမေရိက၏ လုံခြုံရေး ကတိကဝတ်များကို ပြင်းပြင်းထန်တန် နောက်ပြန်ဆုတ်ရန် ကြိုးစားနေသောကြောင့် နောက်ပိုင်းတွင် အမေရိက၏ ရေရှည်ရင်းနှီးမြှုပ်နှံမှုကို ထိန်းထားရေးနည်းလမ်းအဖြစ် သဘောတူညီချက်ကို လက်ခံခဲ့သည်။

သဘောတူညီချက်နှင့် ပတ်သက်၍ ဝါရှင်တန်က ကြေညာရာတွင် ယူကရိန်းတွင် ရေရှည်တည်တံ့သော ငြိမ်းချမ်းရေးနှင့် သာယာဝပြောရေးအတွက် နှစ်ဖက်စလုံး၏ ကတိကဝတ်ကို ပြသခဲ့သည်ဟု ဘဏ္ဍာရေးဝန်ကြီး စကော့ဘက်စ်စန့်က ပြောကြားခဲ့သည်။

“ဒီသဘောတူညီချက်ဟာ ရေရှည်မှာ လွတ်လပ်မှု၊ အချုပ်အခြာနဲ့ သာယာဝပြောတဲ့ ယူကရိန်းကို ဗဟိုပြုသော ငြိမ်းချမ်းရေးလုပ်ငန်းစဉ်ကို ထရမ့်ပ်အစိုးရအဖွဲ့က ကတိကဝတ်ပြုထားတယ်ဆိုတာ ရုရှားကို ရှင်းရှင်းလင်းလင်း အချက်ပြပါတယ်” ဟု ဘက်စ်စန့်က ဆိုခဲ့သည်။

“ဒါ့အပြင် ရုရှားစစ်ယန္တရားကို ငွေကြေး သို့မဟုတ် အထောက်အပံ့တွေပေးတဲ့ ဘယ်နိုင်ငံ၊ ဘယ်ပုဂ္ဂိုလ်မျှ ယူကရိန်းနိုင်ငံ ပြန်လည်တည်ဆောက်ရေးကနေ အကျိုးခံစားခွင့်ရှိမှာ မဟုတ်ပါဘူး” ဟု ၎င်းက ဆက်လက် ပြောကြားခဲ့သည်။

Ref: ယဟျူးနူးစ်