နစကအနေဖြင့် လျှပ်စစ်ကားများမြန်ဆန်စွာတင်သွင်းနိုင်ရန် အရင်းအနှီးနည်းပါးသည့် အရောင်းစာချုပ်ဖြင့် တင်သွင်းမှုကို အစမ်းသဘောခွင့်ပြုထားခြင်းကြောင့် (CBU) ကုမ္ပဏီများ၏ EV ကားများ ဈေးကွက်အတွင်း အများအပြားရောင်းချနေရမှုများရှိသည်။
သို့သော် နောက်ပိုင်းတွင် ရောင်းချပြီးနောက် လုပ်ပေးရမည့်ဝန်ဆောင်မှုနှင့် အပိုပစ္စည်းမရှိသည့်ကားများသည်လည်း မြန်မာဈေးကွက်အတွင်း စုပုံဝင်ရောက်မှုရှိနေသည်။
မကြာသေးမီက တရုတ်နိုင်ငံထုတ် Neta EV ကား၏ မိခင်ကုမ္ပဏီသည် ကားထုတ်လုပ်မှုရပ်နားပြီး ဒေဝါလီခံကြောင်း ကြေညာပြီးနောက်ပိုင်းတွင် EVကားများနှင့် ပက်သက်၍ မြန်မာစျေးကွက် အတွင်းတွင်လည်း ရိုက်ခတ်မှုရှိခဲ့သည်။
ထိုသို့ရိုက်ခတ်မှုနှင့်အတူ EVကားဝယ်ယူသူများကို စျေးကွက်၌လည်း ထင်ယောင်ထင်မှား ဖြစ်စေရန် ပြုလုပ်လာမှုများလည်းရှိနေသည်ဟု စုံစမ်းသိရှိရသည်။
လက်ရှိတွင် EVစျေးကွက်၌ တာဝန်ယူမှု တာဝန်ခံမှုမရှိသည့် အချို့သော CBU ကား အမျိုးအစားများကို ကားပွဲစားများ၊ ကားအရောင်းစင်တာများမှ မသိနားမလည်သည့် သုံးစွဲသူပြည်သူများထံ အလွယ်တကူရောင်းချမှုများသည် ပိုမိုများပြားလာနေသည်။
“ကိုယ့်ဆီမှာ လက်ထဲ instockလည်းမရှိသေးဘူး၊ ဒါပေမယ့် အရပ်ပြောဆို ကြိုတင်အော်ဒါ preorderပေါ့ဗျာ၊ Booking Fee ကြိုကောက်ပြီး စျေးကွက်ထဲဖြန့်တယ်၊ မှာတဲ့ကား ပြည်တွင်းကို ရောက်ပြီ လက်ထဲရောက်ပြီဆို ဒေါ်လာပေါက်တဲ့စျေးအတိုင်း စျေးအလိုက်ပေးရတယ်၊ စျေးတွေလည်းမတန်တဆ၊ အာမခံချက်နည်း၊ အဲ့ဒီလို ဝယ်ယူသုံးစွဲသူတွေကို ထင်ယောင်ထင်မှားဖြစ်အောင် ပြောဆိုရောင်းချနေတာမျိုးတွေရှိတယ်၊ စျေးကွက်ဖျက်နေတာတွေပေါ့”ဟု EV ကားလောကနှင့် နီးစပ်သူတစ်ဦးက မှတ်ချက်ပေးသည်။
ထိုနည်းတူ တချို့သော CBU ကား brand များသည် ဝယ်ယူသူများထံ ရောင်းချပြီးလျှင် တာဝန်ကင်းသည်ဟူသော ပုံစံများလည်း လုပ်ဆောင်နေကြောင်းလည်း သိရသည်။
“တချို့က ကားပဲတင်သွင်းလိုပြီး တာဝန်ယူမှုမရှိဘူး၊ EV က ဆီကားလို တင်သွင်းပြီးရင် ပြီးရောလုပ်လို့မရဘူး။ Car Workshop ပို့လို့ရတဲ့ဟာမဟုတ်သေးဘူး။ အဓိက ဘတ္ထရီပိုင်း၊ ဘော်ဒီပိုင်း၊ နည်းပညာပိုင်း၊ Software ပိုင်းဆို Update က အမြဲလုပ်ရတာ။ ဒါတွေကို နည်းပညာကျွမ်းကျင် ဝန်ဆောင်မှုပေးနိုင်မှအဆင်ပြေမှာ” ဟု ကားတင်သွင်းသူတစ်ဦးက မှတ်ချက်ပေးသည်။
စျေးကွက်အတွင်း ယုံကြည်စိတ်ချခိုင်မာနေသော Brand များသည် ထိုကဲ့သို့ မလုပ်ဆောင်သော်လည်း စျေးကွက်ဖျက်သူ ဝိသမလောဘသမားများကို သတိထားရန်လိုကြောင်းလည်း သူက ပြောသည်။ အာမခံမှုမသေချာသည့် အရောင်းများဝင်ရောက်နေခြင်းကြောင့် ဝန်ဆောင်မှုအပြည့်ပေးသည့် တင်သွင်းသူများပါအခက်အခဲဖြစ်နေကြောင်းလည်း ကြားသိနေရသည်။
ထို့ကြောင့် ဝယ်သူအများစု EV ဝယ်ယူရန် စိတ်ပျ-က်ကာ ဆီကားများထံသို့ ပြောင်းလဲဝယ်ယူမှုများရှိလာသည်ဟုလည်း သူက ဆက်ရှင်းပြသည်။
EV ကားများကို တင်သွင်းရောင်းချသည့်ကုမ္ပဏီများသည် Overseas Distribution Agreement (ODA) စာချုပ် နှင့် Sales Contract ဟူ၍ ၂ မျိုးရှိရာမှ ODA စာချုပ်သည် Aftersales Service နှင့် official 3s Showroom များတည်ဆောက်၍ တာဝန်ခံရသည့်အတွက် အရင်းအနှီး ပိုမိုများပြားသည်။
အမျိုးသားအဆင့် လျှပ်စစ်သုံးမော်တော်ယာဉ်နှင့် ဆက်စပ်လုပ်ငန်းများဖွံ့ဖြိုးတိုးတက်ရေးဦးဆောင်ကော်မတီ အနေဖြင့် EV Pilot Project အဖြစ်လုပ်ဆောင်ခဲ့သည့် နှစ်နှစ်ကျော်ကာလအတွင်း လက်ရှိအချိန်အထိ ပြည်ပမှ EV ကားအစီးလိုက် တင်သွင်းသည့် (CBU) ကုမ္ပဏီ (၈၀)ကျော်အထိရှိနေကြောင်းလည်း သိရသည်။