ရန်ကုန်တိုင်းအတွင်း၌ အလုပ်အကိုင်အခွင့်အလမ်း(၅,၀၀၂)ဦးအတွက် အလုပ်အကိုင်များရရှိမည့် ရင်းနှီးမြှုပ်နှံမှုလုပ်ငန်း(၈)ခုကို ရန်ကုန်တိုင်းဒေသကြီးရင်းနှီးမြှုပ်နှံမှုကော်မရှင်မှ ယနေ့ သြဂုတ် ၂၇ ရက်က လုပ်ကိုင်ခွင့်ပြုခဲ့ကြောင်း သိရသည်။
ဟိုတယ်နှင့် ခရီးသွားလာရေးကဏ္ဍတွင် ရာနှုန်း ပြည့် မြန်မာနိုင်ငံသားရင်းနှီးမြှုပ်နှံမှုလုပ်ငန်း(၁)ခု၊ စက်မှုကဏ္ဍတွင် ရာနှုန်းပြည့် မြန်မာနိုင်ငံသားရင်းနှီးမြှုပ်နှံမှုလုပ်ငန်း(၂)ခု၊ ရာနှုန်းပြည့် နိုင်ငံခြားရင်းနှီးမြှုပ်နှံမှုလုပ်ငန်း(၄)ခုနှင့် ဖက်စပ်နိုင်ငံခြားရင်းနှီးမြှုပ်နှံမှုလုပ်ငန်း(၁)ခုတို့ကို လုပ်ကိုင်ခွင့်ပြုခဲ့ခြင်းဖြစ်ကြောင်း သိရသည်။
ရင်းနှီးမြှုပ်နှံမှုလုပ်ငန်းများသည် ဟိုတယ်ဝန် ဆောင်မှုလုပ်ငန်း၊ ၉၂ ရာခိုင်နှုန်းအား ပြည်ပသို့တင်ပို့၍ ၈ ရာခိုင်နှုန်းအား ပြည်တွင်း၌ရောင်းချမည့် ဆန်ဖြူ၊ ဆန်ကွဲသန့်စင်ခြင်း၊ အရောင်တင်ခြင်းနဲ့ တင်ပို့ရောင်းချခြင်းလုပ်ငန်း၊ ဆန်ကြိတ်ခွဲဖွတ်ချော သန့်စင်ထုတ်လုပ်ပြီးပြည်ပသို့ ၁၀၀ ရာခိုင်နှုန်းတင်ပို့ရောင်းချခြင်းလုပ်ငန်း၊ CMP စနစ်ဖြင့် wearing apparel အမျိုးမျိုးချုပ်လုပ်ခြင်းလုပ်ငန်းနှင့် CMP စနစ်ဖြင့် အဝတ်အထည်အမျိုးမျိုးချုပ်လုပ်ခြင်း လုပ်ငန်းတို့ကိုလုပ်ဆောင်သွားမည်ဖြစ်ကာ အလုပ်အကိုင်အခွင့်အလမ်း(၅,၀၀၂)ဦး အလုပ်အကိုင်များရရှိမည်ဖြစ်ကြောင်း သိရသည်။
အဆိုပါ ရင်းနှီးမြှုပ်နှံမှုလုပ်ငန်းများ၏ မတည်ငွေ ရင်းပမာဏမှာ ငွေကျပ်(၉,၄၆၆ ဒသမ ၅၉၀)သန်းနှင့် အမေရိကန်ဒေါ်လာ(၇ ဒသမ ၀၉၅)သန်းဖြစ် ကြောင်း သိရသည်။