လူ့အခွင့်အရေးကိစ္စများမထိခိုက်စေဘဲ မြန်မာနိုင်ငံနှင့်အလွတ်သဘောထိတွေ့ဆက်ဆံမှု ပြန်လုပ်ဆောင်သင့်ကြောင်း မလေးရှားဝန်ကြီးချုပ် ပြောကြား

ကွာလာလမ်ပူ၊ဇူလိုင် ၂၆

မြန်မာနိုင်ငံကို အကြီးအကျယ်ဝေဖန်ခဲ့သည့် မလေးရှားနိုင်ငံသည် အာဆီယံအဖွဲ့ဝင်နိုင်ငံများအား လူ့အခွင့်အရေးကို မနစ်နာစေဘဲ မြန်မာ နှင့် အလွတ်သဘောထိတွေ့ဆက်ဆံမှုမျိုးအား ပြုလုပ်ခွင့်ပြုရေးကိုတင်ပြဆွေးနွေးခဲ့ကြောင်း ဗုဒ္ဓဟူးနေ့ကထုတ်ဖော်ပြောကြားခဲ့သည်။

မလေးရှားဝန်ကြီးချုပ် အန်နဝါအီဘရာဟင်သည် နှစ်နိုင်ငံတွေ့ဆုံရန်အတွက် ကွာလာလမ်ပူ၌ရောက်ရှိနေသည့် ဖိလစ်ပိုင်သမ္မတဖာဒီနန်မားကို့စ်ဂျူနီယာနှင့် ယခုကိစ္စအားဆွေးနွေးဖြစ်ခဲ့ကြောင်းလည်း ပြောကြားခဲ့သည်။ သို့သော် ဖိလစ်ပိုင်သမ္မတကမူ တစ်စုံတစ်ရာမှတ်ချက်ပြု ပြောကြားခြင်းမျိုးမရှိခဲ့ပေ။

မလေးရှားသည် မြန်မာအစိုးရကို ပြင်းပြင်းထန်ထန်ဝေဖန်ခဲ့ပြီး စစ်အစိုးရ၏လုပ်ရပ်များကို ပြင်းပြင်းထန်ထန်ရှုံ့ချရန်လည်း ယခုလအစောပိုင်းက အာဆီယံကိုတိုက်တွန်းခဲ့သေးသည်။

ထိုင်းနိုင်ငံသည် မြန်မာနှင့် အလွတ်သဘောတွေ့ဆုံဆွေးနွေးမှုကို ပြုလုပ်ရန်လိုအပ်သည်ဟုဆိုကာ အလွတ်သဘောဆွေးနွေးမှုကိုလက်ခံကျင်းပခဲ့သော်လည်း မလေးရှားနှင့်အာဆီယံတို့ကမူ ယခင်ကတည်းကမြန်မာအစိုးရနှင့်ထိတွေ့ဆက်ဆံမှုတိုင်းကိုပယ်ချခဲ့သူများဖြစ်ကြသည်။

ထိုင်းနိုင်ငံအနေဖြင့်မူ မြန်မာနိုင်ငံနှင့်ထိတွေ့ဆက်ဆံရန် နှစ်နိုင်ငံလမ်းကြောင်းဖောက်လုပ်ထားပြီးဖြစ်သည်။ထိုင်းနိုင်ငံခြားရေးဝန်ကြီး ဒွန်ပရာမုဒ်ဝီနိုင်ကလည်း ထိန်းသိမ်းခံထားရသောဒေါ်အောင်ဆန်းစုကြည်နှင့် ယခုလအစောပိုင်းကတွေ့ဆုံခဲ့ပြီး‌ နှစ်ဦးတွေ့ဆုံစဉ်၌ ပွင့်ပွင့်လင်းလင်းဆွေးနွေးရန်လည်းပြောဆိုခဲ့သည်ဟုသိရသည်။ 

၎င်းသည် ဒေါ်အောင်ဆန်းစုကြည်ထံဝင်ရောက်ခွင့်ရရှိထားသည့် တစ်ဦးတည်းသောနိုင်ငံခြားအစိုးရ အရာရှိတစ်ဦးဖြစ်ပြီး အစောပိုင်းကအာဆီယံအထူးသံတမန်များ၏ ဒေါ်အောင်ဆန်းစုကြည်နှင့်တွေ့ဆုံရန်တောင်းဆိုမှုများကိုမူ တပ်မတော်အစိုးရကငြင်းဆိုထားခဲ့သည်။

ဒေါ်အောင်ဆန်းစုကြည်နှင့် ၎င်း၏တွေ့ဆုံမှုသည် ငြိမ်းချမ်းသောပြေလည်မှုရရှိရန်ချဉ်းကပ်မှုတစ်ခုဖြစ်သည်ဟု ဒွန်ကပြောကြားခဲ့သည်။မြန်မာ၌အကြမ်းဖက်မှုများတိုးမြင့်လာခြင်းကြောင့် မြန်မာဒုက္ခသည်အများအပြား ထိုင်းနိုင်ငံထဲသို့ဝင်လာမည်ကိုစိုးရိမ်သဖြင့် ထိုင်းနိုင်ငံသည် မြန်မာ့ အကျပ်အတည်းဖြေရှင်းရန် ပို၍ အားစိုက်ဆောင်ရွက်နေခြင်းဖြစ်သည်ဟုလည်း အာဆီယံသံတမန်များကပြောကြားခဲ့သည်။

Ref 1 : ရိုက်တာ
Ref 2 : အေပီ