လူနေမှုစရိတ်သက်သာရေးနှင့် ပြည်တွင်းစီးပွားရေးပံ့ပိုးမည့် အစီအမံသစ်များ မလေးရှားဝန်ကြီးချုပ် ကြေညာ

ကွာလာလမ်ပူ၊ ဩဂုတ် ၃၁

မလေးရှားနိုင်ငံတွင် လူနေမှုစရိတ်မြင့်တက်မှုကို သက်သာစေရန် လေ-ာင်စာဆီဝယ်ယူခွဲတမ်း တိုးမြှင့်ပေးခြင်း၊ ကျောင်းများနှင့် အသေးစားစီးပွားရေးလုပ်ငန်းများအတွက် ရန်ပုံငွေတိုးမြှင့်ခြင်းတို့အပါအဝင် ပြည်တွင်းစီးပွားရေးကို ပံ့ပိုးမည့် အစီအမံသစ်များကို ဝန်ကြီးချုပ် အန်ဝါ အီဘရာဟင်မ်က ဩဂုတ် ၃၁ ရက်တွင် ထုတ်ဖော်ကြေညာခဲ့သည်။

အဆိုပါအစီအမံများကို စက်တင်ဘာ ၁ ရက်မှ စတင်အကောင်အထည်ဖော်ရန် မျှော်မှန်းထားကြောင်း အန်ဝါက ရုပ်မြင်သံကြားမိန့်ခွန်းတွင် ပြောကြားခဲ့ပြီး နိုင်ငံ၏ စီးပွားရေးတိုးတက်မှုအကျိုးအမြတ်များကို ပြည်သူများထံ ပြန်လည်ရောက်ရှိစေရမည်ဟု ဆိုသည်။

မလေးရှားစီးပွားရေးသည် ဒေသတွင်းနိုင်ငံအများစုထက် တိုးတက်မှုကောင်းမွန်နေပြီး ယခုနှစ် ဒုတိယသုံးလပတ်တွင် ပြည်တွင်းအသားတင်ထုတ်လုပ်မှု (GDP) ၆ ရာခိုင်နှုန်း တိုးတက်ခဲ့သော်လည်း လူနေမှုစရိတ်မြင့်မားမှုကို ဖြေရှင်းရန် အစိုးရအပေါ် ဖိအားများရှိနေသည်။

အစီအမံသစ်အရ မလေးရှားနိုင်ငံသားများ အသုံးများသည့် RON95 ဓာတ်ဆီဝယ်ယူခွဲတမ်းကို လက်ရှိ တစ်လလျှင် လီတာ ၂၀၀ မှ လီတာ ၃၀၀ အထိ တိုးမြှင့်ပေးမည်ဖြစ်သည်။ သတ်မှတ်အမျိုးအစားအချို့အတွက် ဒီဇယ်ဝယ်ယူခွဲတမ်းကိုလည်း တစ်လလျှင် လီတာ ၄၀၀ အထိ တိုးမြှင့်ပေးမည်ဖြစ်ကြောင်း အန်ဝါက ပြောကြားသည်။

ထို့ပြင် အသက် ၁၈ နှစ်မှ ၃၀ ကြား မလေးရှားနိုင်ငံသားများအတွက် အစိုးရ၏ AI အစီအစဉ်တစ်ရပ်ကို ဖွင့်လှစ်ပေးမည်ဖြစ်ပြီး Gemini Enterprise အပါအဝင် AI အပလီကေးရှင်းနှင့် ဝန်ဆောင်မှုအချို့ကို အခမဲ့အသုံးပြုခွင့် ပေးသွားမည်ဖြစ်သည်။

ကျောင်းများ ပြုပြင်ထိန်းသိမ်းရေး၊ ဒစ်ဂျစ်တယ်ကျန်းမာရေးစနစ် မြှင့်တင်ရေးနှင့် အသေးစားစီးပွားရေးလုပ်ငန်းများအတွက် အသေးစားချေးငွေနှင့် ဘဏ္ဍာရေးအထောက်အပံ့များကိုလည်း ရန်ပုံငွေတိုးမြှင့်ပေးမည်ဖြစ်သည်။

စီးပွားရေးလုပ်ငန်းများအတွက် e-invoicing စနစ်ဆိုင်ရာ ကင်းလွတ်ခွင့်ရရှိမည့် နှစ်စဉ်ဝင်ငွေသတ်မှတ်ချက်ကို ရင်းဂစ် ၃ သန်းအထိ တိုးမြှင့်ပေးသွားမည်ဖြစ်ကြောင်းလည်း သိရသည်။

အဂတိလိုက်စားမှုဆိုင်ရာ အမှုများမှ ပြန်လည်သိမ်းဆည်းရရှိသည့် ရန်ပုံငွေများကို ပညာရေးနှင့် ကျန်းမာရေးစောင့်ရှောက်မှုကဲ့သို့သော အစိုးရ၏ ပြည်သူ့အကျိုးပြုအစီအစဉ်များတွင် ပြန်လည်အသုံးပြုသွားမည်ဖြစ်ကြောင်း အန်ဝါက ပြောကြားသည်။

အန်ဝါဦးဆောင်သည့် ညွန့်ပေါင်းအစိုးရသည် ကတိပြုထားသည့် ပြုပြင်ပြောင်းလဲရေးများ အကောင်အထည်ဖော်မှုနှင့် အဂတိလိုက်စားမှု တိုက်ဖျက်ရေးဆိုင်ရာ ကိုင်တွယ်မှုတို့အပေါ် ဝေဖန်မှုများနှင့် ရင်ဆိုင်နေရပြီး မကြာသေးမီက ကျင်းပခဲ့သည့် ဒေသန္တရရွေးကောက်ပွဲ သုံးကြိမ်တွင်လည်း ဆက်တိုက်ရှုံးနိမ့်ခဲ့သည်။

Ref: Reuters