လာအိုတွင် အရက်အဆိပ်သင့်၍ ခရီးသွားနှစ်ဦး ထပ်မံသေဆုံး

လာအိုနိုင်ငံ Vang Vieng မြို့တွင် အဆိပ်သင့်သော အရက်ကို သောက်သုံးမိရာမှ သြစတြေးလျ ဆယ်ကျော်သက်တစ်ဦး သေဆုံးခဲ့ပြီး ယင်းဖြစ်ရပ်သည် မိဘတိုင်းအတွက် အိပ်မက်ဆိုးဖြစ်သည်ဟု သြစတြေးလျ ဝန်ကြီးချုပ်က ကြာသပတေးနေ့တွင် ပြောကြားလိုက်သည်။ အဆိုပါမြို့တွင်ပင် အရက်အဆိပ်သင့်မှုကြောင့် အမေရိကန်နိုင်ငံသားတစ်ဦးလည်း သေဆုံးခဲ့သည်ဟု အမေရိကန်နိုင်ငံခြားရေးဝန်ကြီးဌာနက အတည်ပြုခဲ့သဖြင့် သေဆုံးသူ လေးဦးအထိ ရှိလာခဲ့သည်။

အသက် ၁၉ နှစ်အရွယ် ဘီယန်ကာ ဂျုံးစ်သည် လာအိုမြို့တော် ဗီယန်ကျင်းမှ ကားလမ်းခရီးဖြင့် နှစ်နာရီခန့်သွားရသည့် နာမည်ကျော် ခရီးသွားမြို့ Vang Vieng တွင် ပြီးခဲ့သည့် သီတင်းပတ်၌ နာမကျန်းဖြစ်ခဲ့သည်။

နိုဝင်ဘာ ၁၃ ရက်တွင် သူ့ကို အိမ်နီးချင်းထိုင်းနိုင်ငံ Udon Thani ပြည်နယ်ရှိ ဆေးရုံတစ်ခုသို့ ပို့ဆောင်ကုသခဲ့ပြီးနောက် ကြာသပတေးနေ့(နိုဝင်ဘာ ၂၁) တွင် သေဆုံးခဲ့ခြင်း့ဖြစ်သည်ဟု ပြည်နယ်ရဲအရာရှိတစ်ဦးက ပြောဆိုခဲ့သည်။

သူသည် အရက်အတုသောက်သုံးမိရာမှ မက်သနော အဆိပ်သင့်သေဆုံးရခြင်းဖြစ်သည်ဟု သူ့ကို စစ်ဆေးခဲ့သည့် ဆရာဝန်က ပြောဆိုကြောင်း ရဲအရာရှိက ရိုက်တာသတင်းဌာနကို ပြောခဲ့သည်။

“သူ့ ခန္ဓာကိုယ်ထဲမှာ မီသနောပမာဏ မြင့်မားနေတာကြောင့် ဦးနှောက်ကို ရောင်ရမ်းစေခဲ့ပါတယ်” ဟု ဆိုခဲ့သည်။

ဂျုံးစ်သည် ဒိန်းမတ်နှစ်ဦးနှင့် အမေရိကန်တစ်ဦးပြီးလျှင် အဆိပ်သင့်အရက်ကြောင့် သေဆုံးရသည့် စတုတ္ထမြောက်နိုင်ငံခြား ခရီးသွားဖြစ်သည်ဟု သြစတြေးလျမီဒီယာက ဖော်ပြခဲ့သည်။

အသက် ၁၉ နှစ်အရွယ်ပင်ဖြစ်သော ဂျုံးစ်၏ သူငယ်ချင်း ဟိုလီဘိုးလက်စ်သည်လည်း ဘန်ကောက်ရှိ ဆေးရုံတစ်ခုတွင် စိုးရိမ်ရသည့် အခြေအနေဖြင့် တက်ရောက်နေရကာ အောက်ဆီဂျင်ပေးထားရသည်ဟု သူမ၏ မိသားစုက အစောပိုင်းတွင် ပြောဆိုထားသည်။

လာအိုနိုင်ငံတွင် အရက်တုကိစ္စသည် ပြဿနာတစ်ရပ်ဖြစ်နေပြီး ယင်းနိုင်ငံတွင် အရက်သေစာ သောက်သုံးပါက သတိပြုကြရန် သြစတြေးလျနှင့် ဗြိတိန်အစိုးရများက ၎င်းတို့နိုင်ငံသားများကို သတိပေးထားသည်။

Ref: အေပီ။ ဘန်ကောက်ပို့စ်