လာအိုဂူထဲ နောက်ဆုံးကျန်ရှိနေသူနှစ်ဦးရှာဖွေမှုလုပ်ငန်းစဉ်ရပ်ဆိုင်း

       
ရှာဖွေရေးနယ်မြေသည် မြေသားမတည်ငြိမ်ဖြစ်လာခြင်းနှင့် အသက်ရှင်သန်နိုင်သည့် မျှော်လင့်ချက်များ မှေးမှိန်လာခြင်းတို့ကြောင့် လာအိုနိုင်ငံရှိ ရေမြုပ်နေသော ဂူတစ်ခုအတွင်း နှစ်ပတ်ကျော် ပိတ်မိနေခဲ့သော အမျိုးသားနှစ်ဦးအတွက် ရှာဖွေကယ်ဆယ်မှုကို စနေနေ့တွင် ကယ်ဆယ်ရေးသမားများက ရပ်ဆိုင်းလိုက်သည်။
      
ဒေသခံအမျိုးသား ခုနစ်ဦးသည် နိုင်ငံအလယ်ပိုင်း Xaysomboun ပြည်နယ်ရှိ ဂူထဲသို့ လင်းနို့နှင့် ရွှေရှာဖွေရန်အတွက် မေလ ၂၀ ရက်နေ့တွင် ဝင်ရောက်သွားခဲ့ပြီးနောက် ရေကြီးရေလျှံမှုများဖြစ်ပွားခဲ့ကာ ၎င်းတို့ထွက်ပေါက် ပိတ်သွားခဲ့သည်။
       
  တစ်ပတ်အကြာတွင် ကယ်ဆယ်ရေးအဖွဲ့များက အမျိုးသားငါးဦးကို အသက်ရှင်လျက်ပြန်တွေ့ခဲ့ပြီးနောက် မေလ ၂၉ ရက်နေ့တွင် ရေငုပ်သမားများက တစ်ဦးကို စတင်ကယ်ထုတ်နိုင်ခဲ့သည်။ ဂူတွင်းမှ ရေများကို စုပ်ထုတ်ပြီးနောက် နောက်တစ်နေ့တွင် လေးဦးကို ထပ်မံကယ်ထုတ်နိုင်ခဲ့သည်။
        
လာအိုနှင့် နိုင်ငံတကာကယ်ဆယ်ရေးအဖွဲ့များ၏ အပြင်းအထန်ရှာဖွေနေသော်လည်း ကျန်နှစ်ဦးမှာ ပျောက်ဆုံးနေဆဲဖြစ်သည်။
        
  ထိုင်းကယ်ဆယ်ရေးအဖွဲ့ခေါင်းဆောင် ကန်ကတ် ဘွန်းကဝေါင်က ဂူတွင်းသို့ ဝင်ရောက်ရန်သည် အန္တရာယ်များလွန်းသောကြောင့် မည်သူ့ကိုမျှ ဝင်ခွင့်မပြုထားဟု စနေနေ့က ဆိုရှယ်မီဒီယာပို့စ်တွင် ပြောကြားခဲ့ပြီး ရေစုပ်ထုတ်သည့်လုပ်ငန်းကိုမူ အပြင်ဘက်မှ ဆက်လက်လုပ်ဆောင်သွားမည်ဟု ဆိုခဲ့သည်။
        
ကျန်ရှိနေသူနှစ်ဦး၏ လက်ရှိအခြေအနေကို မိမိတို့ မသိရှိရသော်လည်း ယခုအချိန်တွင် ဂူအတွင်းရှိ ရေမျက်နှာပြင်ကို လျှော့ချခြင်းသည် အကေင်းဆုံးနည်းလမ်းဖြစ်သည်ဟု ၎င်းက ဖေ့စ်ဘုတ်ပို့စ်တွင် ပြောကြားခဲ့သည်။
        
ဂူတွင်းရှိ နေရာအသီးသီးတွင် စားစရာများနှင့် အသက်ရှင်ရပ်တည်ရေးဆိုင်ရာ ပစ္စည်းများကို ထားပေးခဲ့ပြီး မထင်မှတ်ဖွယ်အခြေအနေမျိုးကြုံလာခဲ့ပါက ၎င်းတို့၏ လိမ္မာပါးနပ်မှုဖြင့် ဘေးကင်းစွာထွက်လာနိုင်လိမ့်မည်ဟု မိမိ ယုံကြည်ပါကြောင်း ၎င်းက ပြောကြားခဲ့သည်။

Ref: ဘန်ကောက်ပို့စ်