လာမည့်ရွေးကောက်ပွဲသည် PR စနစ်ဖြင့်ကျင်းပမည်ဖြစ်၍ ရွေးကောက်ပွဲအသိပညာပေးခြင်းအား ပိုမိုပြုလုပ်ရမည်
လာမည့်ရွေးကောက်ပွဲသည် PR စနစ်ဖြင့်ကျင်းပမည်ဖြစ်၍ ရွေးကောက်ပွဲအသိပညာပေးခြင်းနှင့်ရွေးကောက်ပွဲနှင့်ပတ်သက်၍ ဆောင်ရွက်ရမည့်အရာများကို ပိုမိုပြုလုပ်ရမည်ဟု ရွေးကောက်ပွဲကော်မရှင်အဖွဲ့ဝင်ဦးခင်မောင်ဦးကပြောသည်။
နေပြည်တော်၌ သြဂုတ် ၁၇ ရက်(ယနေ့)မွန်းလွဲ ၁ နာရီက ပြုလုပ်သည့် နစက သတင်းထုတ်ပြန်ရေးအဖွဲ့၏ ၁၉ ကြိမ်မြောက် သတင်းစာရှင်းလင်းပွဲတွင် ပြောကြားခဲ့ခြင်းဖြစ်သည်။
“ပြည်သူလူထုနဲ့မဲဆန္ဒရှင်အသိပညာပေးခြင်းကအရေးကြီးပါတယ် နောင်ကျင်းပမယ့်ရွေးကောက်ပွဲဟာ PR စနစ်နဲ့ကျင်းပမှာဖြစ်တဲ့အတွက် ရွေးကောက်ပွဲနဲ့ပတ်သက်ပြီး ဆောင်ရွက်ရမဲ့ဟာတွေ အသိပညာပေးဖို့တွေပိုပြီးလိုအပ်ပါတယ်”ဟု UEC အဖွဲ့ဝင်ဦးခင်မောင်ဦးကပြောသည်။
ထို့ကြောင့် UEC မှအသိပညာပေးခြင်းလုပ်ငန်းများအား ကြိုတင်ပြင်ဆင်ဆောင်ရွက်၍လုပ်ဆောင်လျက်ရှိကာ နိုင်ငံပိုင်သတင်းစာများ၊နိုင်ငံပိုင်ရုပ်မြင်သံကြားလိုင်းများ၊နိုင်ငံပိုင်ရေဒီယိုလိုင်းများမှတဆင့် ပုံမှန်ဆောင်ရွက်လျက်ရှိသည်ဟုပြောသည်။
“အခုစတင်ပြီး နိုင်ငံပိုင်သတင်းစာတွေမှာ ဆောင်းပါးတွေ ထည့်ပြီးဆောင်ရွက်နေပါတယ် ကော်မရှင်အဖွဲ့ခွဲတွေကိုလည်း ကျွန်တော်တို့က အသိပညာပေးတာတွေလုပ်နေပါပြီ နယ်မြေအလိုက်ဆောင်ရွက်ခြင်းဆိုတဲ့နည်းနဲ့ ဆောင်ရွက်နေပါတယ်”ဟု UEC အဖွဲ့ဝင်ဦးခင်မောင်ဦးကပြောသည်။
အလားတူ ပါတီများ၊ကိုယ်စားလှယ်လောင်းများမှလည်း ရွေးကောက်ပွဲအသိပညာပေးခြင်းများအား ဆောင်ရွက်လျက်ရှိကာ CSO အဖွဲ့များမှလည်း ဆောင်ရွက်မှုများရှိနေကြောင်း သိရသည်။
“ပါတီအလိုက်ဆောင်ရွက်တာရှိတယ် ကိုယ်စား လှယ်လောင်းတွေကလည်း ဆောင်ရွက်နေပါတယ် အရင်တုန်းကလည်းဆောင်ရွက်ခဲ့ပါတယ် မီဒီယာတွေကနေတဆင့် လုပ်ဆောင်ရင်လည်းပိုပြီးထိရောက်မှာဖြစ်တဲ့အတွက် ရွေးကောက်ပွဲအသိပညာပေးတာတွေကိုဆောင်ရွက်သွားမှာပါ”ဟု UEC အဖွဲ့ဝင်ဦးခင်မောင်ဦးကပြောသည်။
ထိုသို့ ဆောင်ရွက်ခြင်းအား ဥပဒေ၊နည်းဥပဒေဘောင်များဖြင့် အတည်ပြုပြဌာန်းပြီးပါက အသင့်စီစဥ်ထားတဲ့အတိုင်း UEC မှဆောင်ရွက်သွားမည်ဖြစ်ကြောင်း UEC အဖွဲ့ဝင်ဦးခင်မောင်ဦး၏ပြောကြားချက်အရ သိရသည်။