ထိုင်းနိုင်ငံ ၊ နခွန်ပထုံခရိုင် ၊ ဘန်လင်းမြို့နယ်အတွင်းရှိ ဆည်တစ်ခုအတွင်း အဆုံးစီရင်သွားဖွယ်ယူဆရသည့် မြန်မာနိုင်ငံသား အမျိုးသားရုပ်အလောင်းနှင့် ၎င်း၏ အခက်အခဲများအား ထိုင်းဘာသာဖြင့် ရေးသားထားသည့် စာတစ်စောင်ကို တွေ့ရှိခဲ့ရကြောင်း သိရသည်။
အဆိုပါ သေဆုံးသူ မြန်မာနိုင်ငံသား၏ ရုပ်အလောင်းကို ပြီးခဲ့သည့် ဖေဖေါ်ဝါရီ (၂၀) ရက် တနင်္လာနေ့ ညပိုင်းက ဘန်လင်းမြို့နယ်အတွင်းရှိ ဆည်တစ်ခုအတွင်း တွေ့ရှိခဲ့ခြင်းဖြစ်ကြောင်း ထိုင်းလူမှုကွန်ရက်များတွင် စတင်ပျံ့နှံ့ခဲ့ခြင်း ဖြစ်သည်။
သေဆုံးသူသည် အသက် (၃၉) နှစ်အရွယ်ရှိ ကိုသန်းရွှေဆိုသူ မြန်မာနိုင်ငံသားဖြစ်ပြီး သေဆုံးသူ၏ အိပ်ဟု ယူဆရသည့် အိပ်တစ်လုံးနှင့် ထိုင်းဘာသာဖြင့်ရေးသားထားသည့် စာတစ်စောင်ကို စစ်ဆေးတွေ့ရှိခဲ့ရကြောင်း ထိုင်းလူမျိုးတစ်ဦးက ၎င်း၏လူမှုကွန်ရက်တွင် တနင်္လာနေ့ညပိုင်းက ဓာတ်ပုံများနှင့်တကွ ရေးသားဖြန့်ဝေခဲ့ခြင်းဖြစ်သည်။
“ကျွန်တော်မြန်မာပါ ခင်ဗျ။ နေစရာနေရာလဲမရှိ၊ စားစရာလဲမရှိလို့ ထမင်းနဲနဲလောက်ကျွေးကြပါ။ ကျွန်တော် ထိုင်းစကားမတတ်လို့ သနားကြပါဗျ။ ထမင်းလေး ရေလေးပေးသနားကြပါခင်ဗျ” ဟု ထိုင်းဘာသာဖြင့် ရေးသားထားသည့် စာတစ်ဆောင်ကို ၎င်းကျန်ရစ်ခဲ့သည့် အိပ်အတွင်းမှ တွေ့ရကြောင်း အဆိုပါ ထိုင်းလူမျိုးက ၎င်း၏လူမွန်ကွန်ရက်တွင် ရေးသားထားသည်။
အဆိုပါ ထိုင်းဘာသာဖြင့် ရေးသားထားသည့် စာကို သေဆုံးသူအား စာနာသည့် ထိုင်းလူမျိုးတစ်ဦးဦးမှ ၎င်းအကူအညီ ရရှိရန်အတွက် ရေးသားပေးခဲ့သည်ဟု ယူဆသုံးသတ်မှုများရှိနေပြီး ၎င်းသေဆုံးမှုနှင့် ပတ်သက်၍ အဆုံးစီရင်သွားဟန်ရှိကြောင်း သုံးသပ်မှုများလည်း ရှိနေခြင်းဖြစ်သည်။
အလောင်းတွေ့ရှိရာ ဘန်လင်းမြို့နယ်အတွင်းရှိဆည်သို့ နခွန်ပထုံခရိုင်နှင့် ဘန်လင်းမြို့နယ်ဒေသအာဏာပိုင်များနှင့် လူမှုကယ်ဆယ်ရေးအဖွဲ့များကသွားရောက်စစ်ဆေးခဲ့ပြီး ရင်ခွဲစစ်ဆေးမှုများပြုလုပ်နိုင်ရန် နခွန်ပထုံဆေးရုံကြီးသို့ ပို့ဆောင်ခဲ့ကြကြောင်း သိရသည်။
ထိုင်းနိုင်ငံအတွင်း အခင်းဖြစ်စဉ်မျိုး မကြာခဏ ဖြစ်ပွားတတ်ပြီး ပြီးခဲ့သည့် ၂၀၂၂ ခုနှစ် အတွင်းကလည်း မြန်မာအမျိုးသားတစ်ဦး တံတားပေါ်မှ ခုန်ချအဆုံးစီရင်ရန် ကြိုးပမ်းနေစဉ် ထိုင်းရဲတပ်ဖွဲ့ဝင်များက အချိန်ပေးဖြောင်းဖြကာ ကယ်ဆယ်ခဲ့ရသည့် ဖြစ်စဉ်တစ်ခု လူမှုကွန်ရက်နှင့် သတင်းများတွင် ပျံ့နှံ့ခဲ့သေးသည်။
ထိုင်းနိုင်ငံဥပဒေများအရ ထိုင်းနိုင်ငံအတွင်း တရားမဝင်ရောက်ရှိနေသူ မြန်မာနိုင်ငံသားများအနေဖြင့် အလုပ်လုပ်ကိုင်ခွင့် မရှိသည့်အပြင် စစ်ဆေးတွေ့ရှိပါက ဖမ်းဆီထောင်ချခံရမည့် အခြေအနေမျိုးလည်း ဖြစ်သည်။
ယင်းကဲ့သို့ ဥပဒေအရ တင်းကြပ်ထားသော်လည်း နှစ်နိုင်ငံနယ်စပ်မှတဆင့် ထိုင်းနိုင်ငံအတွင်းသို့ တရားမဝင် ဝင်ရောက်နေသည့် မြန်မာနိုင်ငံသားများ အမြောက်အများရှိနေပြီး နေ့စဉ်ရက်ဆက်နီးပါး ဆယ်နှင့်ချီကာ ဖမ်းဆီးခံနေရဆဲလည်း ဖြစ်သည်။
