လက်ရှိဘဏ္ဍာနှစ် လေးလအတွင်း GACC နည်းလမ်းဖြင့် တရုတ်နိုင်ငံသို့ မြန်မာ့ရေထွက်ကုန် တန်ချိန် ၂၁,၀၀၀ ကျော် တင်ပို့နိုင်ခဲ့

​​မြန်မာ-တရုတ် နှစ်နိုင်ငံ အစိုးရအကြား သဘောတူညီချက်အရ တရုတ်နိုင်ငံအကောက်ခွန်အထွေထွေအုပ်ချုပ်မှုအာဏာပိုင်အဖွဲ့ (GACC) နည်းလမ်းဖြင့် မြန်မာနိုင်ငံမှ ရေထွက်ကုန်ပစ္စည်းများကို ပုံမှန်တင်ပို့လျက်ရှိရာ ၂၀၂၆-၂၀၂၇ ဘဏ္ဍာရေးနှစ် ဧပြီလမှ ဇူလိုင်လအထိ ၄ လတာကာလအတွင်း တန်ချိန် ၂၁,၀၀၀ ကျော် တင်ပို့နိုင်ခဲ့ကြောင်း ငါးလုပ်ငန်းဦးစီးဌာနမှ သိရသည်။​

မြန်မာနိုင်ငံမှ ထွက်ရှိသည့် သဘာဝနှင့် မွေးမြူရေး ရေထွက်ကုန်များကို GACC နည်းလမ်းဖြင့် တင်ပို့နိုင်ရေးအတွက် ၂၀၂၄ ခုနှစ်၊ စက်တင်ဘာလ ၁၅ ရက်နေ့တွင် နှစ်နိုင်ငံအစိုးရအကြား သဘောတူလက်မှတ်ရေးထိုးခဲ့ခြင်းဖြစ်သည်။​

၂၀၂၅-၂၀၂၆ ဘဏ္ဍာနှစ် ရေထွက်ကုန်ပစ္စည်း စုစုပေါင်း တန်ချိန် ၆၉,၆၇၄.၆၅ တန်၊ တန်ဖိုးအားဖြင့် အမေရိကန်ဒေါ်လာ ၁၅၄.၅၄၄ သန်း တင်ပို့နိုင်ခဲ့သည်။

၂၀၂၆-၂၀၂၇ ဘဏ္ဍာနှစ်၏ ဧပြီ လမှ ဇူလိုင်လအထိ တန်ချိန် ၂၁,၀၂၁.၈၃ တန်၊ တန်ဖိုး အမေရိကန်ဒေါ်လာ ၄၇.၅၅၉ သန်းဖိုး တင်ပို့ထားပြီးဖြစ်သည်။

​​လက်ရှိတွင် GACC နည်းလမ်းအရ အထူးခွင့်ပြုချက်ရရှိထားသည့် စက်ရုံ၊ အလုပ်ရုံများနှင့် မွေးမြူရေးကန်များမှာ ရေထွက်ကုန် စက်ရုံ ၈၉ ရုံ၊ အရှင်သိုလှောင်ရုံ (Warehouse) ၂၉ ရုံ၊ ငါးမှုန့်စက်ရုံ  ၇ ရုံ၊ မွေးမြူရေးကန် – ၄ ကန် တို့ ဖြစ်ကြသည်။

​​ထို့​​ပြင် သဘာဝအတိုင်း ဖမ်းဆီးရမိသည့် ရေချို/ရေငန် ငါး၊ ပုစွန်၊ ဂဏန်းများ၊ ငါးမှုန့်နှင့် အစာများကို အရှင်တင်ပို့ခြင်း၊ ရေခဲရိုက်တင်ပို့ခြင်း၊ အေးခဲ ပုံစံဖြင့် တင်ပို့ခြင်း၊ ပုစွန်ခြောက် အစရှိသည့် အခြောက်ပြုလုပ် တင်ပို့ခြင်းနှင့် ပြုတ်ပြီး တင်ပို့ခြင်း စသည့် နည်းလမ်းမျိုးစုံဖြင့် တင်ပို့လျက်ရှိသည်။​

အဆိုပါ ရေထွက်ကုန်များကို ကုန်းလမ်း၊ ရေလမ်းနှင့် လေကြောင်းလိုင်းများမှတစ်ဆင့် တရုတ်နိုင်ငံရှိ ကွမ်ကျိုး၊ နန်နင်း၊ ယူနန်၊ ကွမ်မင်း၊ ချုံချင့်၊ ရှန်တူး၊ ဇန်ကန်၊ ကွမ်တောင်း၊ မာရိုမာ၊ ရှန်ဟိုင်း၊ နန်ချားနှင့် ရီယန်ကျင်း စသည့် မြို့ကြီးများသို့ အဓိက တင်ပို့လျက်ရှိကြောင်း ငါးလုပ်ငန်းဦးစီးဌာန ညွှန်ကြားရေးမှူး ဦးထွန်းသိန်း၏ ပြောကြားချက်အရ သိရသည်။