တတိယနိုင်ငံသားများကို Package Tour ဖြင့် တာချီလိတ်-မယ်ဆိုင် ဝင်/ထွက်ပေါက်မှ ဝင်ရောက်ခွင့်ပြုထားပြီးဖြစ်ဟု ဒုဝန်ကြီးပြော
နေပြည်တော်၊ စက်တင်ဘာ ၂၂
ရှမ်းပြည်နယ် (အရှေ့ပိုင်း) ရှိ ယခင်က နိုင်ငံခြားခရီးသွားများ လှည့်လည်သွားလာခွင့်ရှိခဲ့သည့် မြို့နယ်များသို့ ပြည်ပခရီးသွားများ စနစ်တကျ ပြန်လည်ဝင်ရောက်လည်ပတ်ခွင့်ပြုရန် အစီအစဉ်ရှိ၊ မရှိကို စက်တင်ဘာ ၂၁ ရက်က ကျင်းပသည့် တတိယအကြိမ် ပြည်သူ့လွှတ်တော်အစည်းအဝေးတွင် ကျိုင်းတုံမြို့နယ် ပြည်သူ့လွှတ်တော်ကိုယ်စားလှယ် ဦးသန်းထွန်းဦးက မေးမြန်းခဲ့သည်။
ယင်းမေးမြန်းမှုနှင့်ပတ်သက်၍ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ဒုတိယဝန်ကြီး ဦးရဲထွန်းဦးက သတ်မှတ်ချက်များနှင့် ကိုက်ညီသည့် တတိယနိုင်ငံသားများကို Package Tour အစီအစဉ်ဖြင့် တာချီလိတ်-မယ်ဆိုင် ဝင်/ထွက်ပေါက်မှ ဝင်/ထွက်ခွင့်ပြုထားပြီး တာချီလိတ်-ကျိုင်းတုံ ခရီးစဉ်လမ်းကြောင်းအတိုင်း လည်ပတ်ခွင့်ပြုလျက်ရှိကြောင်း ပြန်လည်ဖြေကြားခဲ့သည်။
ကိုဗစ်-၁၉ ရောဂါဖြစ်ပွားမှုကြောင့် ၂၀၂၀ ပြည့်နှစ်တွင် တာချီလိတ်နယ်စပ်ဂိတ်ကို ယာယီပိတ်ထားခဲ့ပြီး ၂၀၂၃ ခုနှစ်တွင် ပြန်လည်ဖွင့်လှစ်ကာ သတ်မှတ်လုပ်ထုံးလုပ်နည်းများနှင့်အညီ စိစစ်ဝင်/ထွက်ခွင့်ပြုခဲ့ကြောင်း သိရသည်။
သို့သော် ရှမ်းပြည်နယ်အရှေ့ပိုင်းနှင့် မြောက်ပိုင်းဒေသများတွင် အွန်လိုင်းလိမ်လည်မှုများ ထိန်းချုပ်တားဆီးရေးအတွက် တတိယနိုင်ငံသားများကို ဗီဇာအမျိုးမျိုးဖြင့် တာချီလိတ် အမှတ် (၁) ချစ်ကြည်ရေးတံတားမှ ဝင်/ထွက်ခွင့်အား ၂၀၂၃ ခုနှစ် ဇွန်လမှစ၍ ကန့်သတ်ခဲ့ပြီး အပြည်ပြည်ဆိုင်ရာလေဆိပ်များနှင့် ကော့သောင်း အပြည်ပြည်ဆိုင်ရာဝင်/ထွက်ပေါက်မှသာ ဝင်/ထွက်ခွင့်ပြုခဲ့ကြောင်း ဒုတိယဝန်ကြီးက ရှင်းလင်းပြောကြားခဲ့သည်။
ယင်းနောက် ကမ္ဘာ့ခရီးသွားလုပ်ငန်းနေ့ အထိမ်းအမှတ်နေ့မှစတင်၍ ယဉ်ကျေးမှု၊ ဟိုတယ်နှင့် ခရီးသွားလာရေးဝန်ကြီးဌာန၏ စိစစ်တင်ပြချက်အရ သတ်မှတ်ချက်များနှင့် ကိုက်ညီသည့် တတိယနိုင်ငံသားများကို Package Tour အစီအစဉ်ဖြင့် တာချီလိတ်-မယ်ဆိုင် ဝင်/ထွက်ပေါက်မှ ပြန်လည်ဝင်/ထွက်ခွင့်ပြုခဲ့ခြင်းဖြစ်သည်။
ထိုသို့ ဝင်ရောက်လာသူများအနေဖြင့် ပြည်ထဲရေးဝန်ကြီးဌာနက သတ်မှတ်ထားသည့် ကန့်သတ်နယ်မြေများမှအပ တာချီလိတ်-ကျိုင်းတုံ ခရီးစဉ်လမ်းကြောင်းအတိုင်း လည်ပတ်ခွင့်ရှိပြီး ၂၀၂၃ ခုနှစ် အောက်တိုဘာမှ ယခုအချိန်အထိ တတိယနိုင်ငံသား ၃၄ ဦးနှင့် ထိုင်းနိုင်ငံသား ၂,၇၄၆ ဦး ဝင်ရောက်ခဲ့ပြီးဖြစ်ကြောင်း သိရသည်။
လက်ရှိတွင် ထိုင်းနိုင်ငံသားများကို နိုင်ငံကူးလက်မှတ်နှင့် ဗီဇာဖြင့်လည်းကောင်း၊ တတိယနိုင်ငံသားများကို Package Tour အစီအစဉ်ဖြင့်လည်းကောင်း သတ်မှတ်ချက်များနှင့်အညီ ဝင်/ထွက်ခွင့်ပြုလျက်ရှိကြောင်း သိရသည်။