လတ်တလောဖြစ်ပွါးနေသည့် ရှမ်းမြောက်တိုက်ပွဲများကြား ကျောက်မဲ၊ နောင်ချိုမှ စစ်ရှောင်လာရသည့် ပြည်သူများကို လားရှိုးမြို့ခံများက နေထိုင်နိုင်ရန် နေစရာများ စျေးနှုန်းလျှော့သလို အခမဲ့ဖြင့်လည်း ပြန်လည်ကူညီပေးနေကြသည်။
“နောင်ချို – ကျောက်မဲ – သီပေါမှ စစ်ဘေးရှောင်မိဘပြည်သူများကို အိမ်ထောင်စုလေးပြပြီး အခမဲ့လာရောက် စစ်ရှောင်လို့ရပါသည်။ ရေမီးအစုံ (၁၆)ခန်း ရှိထားပါတယ်။ နေရာကတော့ လားရှိုးမြို့၊ ရပ်ကွက်(၉)၊ နယ်မြေ(၁)၊ ဓမ္မပါလကျောင်းရှေ့၊ 09264169627/ 09259586970” ဟု လားရှိုးမြို့ခံတစ်ဦးက ဖော်ပြထားသည်။
ထို့အပြင် ကျောက်မဲ-နောင်ချိုဘက်၌ နှစ်ဖက်တိုက်ပွဲ ဖြစ်နေသောကြောင့် စစ်ရှောင်နေရသော ပြည်သူများကို ပုံမှန်သုံးသိန်းဖြင့်ငှါးရမ်းသည့် နေအိမ်အခန်းများကို နှစ်သိန်းဖြင့် ငှါးရမ်းပေးခြင်း၊ စားစရာဝတ်စရာများ လှူဒါန်းပေးခြင်းတို့ကိုလည်း လားရှိုးမြို့ခံများက ပြုလုပ်ပေးနေကြသည်။
“ကိုယ်ချင်းစာတယ်လေ၊ စစ်ရှောင်ရတာ လွယ်တာမှတ်လို့၊ သူများဆီနေရတာ ဒုက္ခတွေ အန်တီတို့ အသိဆုံးပါ” ဟု ထိုအမျိုးသမီးကြီးက ပေါ်ပြူလာနယူးကို ပြောသည်။
တချို့ မြို့ခံများသည်လည်း “သီပေါ – ကျောက်မဲမှ စစ်ရှောင်များနဲ့ လားရှိုးမြို့မှ ခက်ခဲကြတဲ့သူများ လူမျိုးဘာသာမရွေး ရွှေကံ့ကော်ဆိုင်မှာ ဆံပင်အခမဲ့ လာညှပ်လို့ ရပါကြောင်း၊ ဆိုင်ထိလာဖို့အတွက် ခက်ခဲသူများတွက် ကားကြိုပို့စနစ်ဖြင့် စီစဉ်ပေးပါမည်” ဟု ဖော်ပြကာ နိုင်သည့်ဘက်မှ ကူညီပေးနေကြသည်ကို တွေ့ရသည်။
အခန်းများကို အခမဲ့ငှါးရမ်းသူလည်း များပြားပြီး “နောင်ချို -ကျောက်မဲ -သီပေါမှ စစ်ရှောင်များလားရှိုးမြို့၊ ရပ်ကွက်(၁)၊ နယ်မြေ(၈)၊ စက်မှူ့လယ်ယာတွင် စစ်ရှောင်အစစ်အမှန်ဖြစ်ပါက(၆)လတိတိ အခမဲ့ စစ်ရှောင်နိုင်ပါတယ်။ အိမ်ထောင်စုတော့ ပြပေးရပါမယ်။ စုစုပေါင်း(၁၁)ခန်းရှိပါတယ်။ 09262612346 /092058209” ဟုလည်း နောက်ထပ်တဦးက ဖော်ပြထားသည်။
လက်ရှိတွင် နောင်ချိုမြို့ကို တပ်မတော်ဘက်မှ ပြန်လည်သိမ်းပိုက်ထားနိုင်ခဲ့ပြီဖြစ်ကာ လုံခြုံရေးအဖွဲ့ဝင်များသည် နောင်ချိုမြို့အတွင်းသို့ ယာယီနေရပ်စွန့် ခွာနေရသူများအား အန္တရာယ်ကင်းစွာပြန်လည်ဝင်ရောက်နေထိုင်နိုင်ရေးနှင့် အစိုးရအုပ်ချုပ်မှုယန္တရားများအမြန်ဆုံးလည်ပတ်နိုင်ရေး၊ ဂျီနီဗာကွန်ဗင်းရှင်းနှင့်အညီ လက်နက်ကိုင်အဖွဲ့ဝင်များထောင်ထားခဲ့သော မြေမြှုပ်မိုင်းများကိုရှင်းလင်းဖော်ထုတ်ခြင်းများကိုပြုလုပ်ပေးလျက်ရှိကြောင်း သိရသည်။