ရှမ်းပြည်နယ်၏ စိုက်ပျိုးရေးကဏ္ဍတွင်​ ရင်းနှီးမြှုပ်နှံမှုပြုလုပ်ရန် လုပ်ငန်းရှင်များကို ဖိတ်ခေါ်

ပြောင်းလုပ်ငန်းရှင်ကြီးများအနေဖြင့် ရှမ်းပြည်နယ်၏ အဓိကစိုက်ပျိုးရေး ထွက်ကုန်များဖြစ်သည့် ပြောင်းသီးနှံအပြင် အခြားကော်ဖီ၊ လက်ဖက်၊ ကြက်သွန်ဖြူနှင့် စားဖိုဆောင်သီးနှံများကို ပြည်တွင်းရောင်းဝယ်မှုသာမက ပြည်ပသို့ တင်ပို့ခြင်းလုပ်ငန်းများအတွက် လာရောက်ရင်းနှီးမြှုပ်နှံကြစေလိုကြောင်း ရှမ်းပြည်နယ်ဝန်ကြီးချုပ် ဦးအောင်ဇော်အေးက ပြောကြားသည်။

ဇူလိုင်လ လကုန်ပိုင်းက ရှမ်းပြည်နယ်တောင်ပိုင်း၊ တောင်ကြီးမြို့၊ ကုန်သည်များနှင့် စက်မှုလက်မှုလုပ်ငန်းရှင်များအသင်း (SSSCCI)၌ ကျင်းပပြုလုပ်ခဲ့သည့် မြန်မာနိုင်ငံ ပြောင်းလုပ်ငန်းအသင်း၏ ၂၀၂၂-၂၀၂၅ ခုနှစ် ဒုတိယအကြိမ် နှစ်ပတ်လည် အသင်းသားစုံညီအစည်းအဝေးတွင် ဝန်ကြီးချုပ်က ထည့်သွင်းပြောကြားခဲ့ခြင်းဖြစ်သည်။

ရှမ်းပြည်နယ်အနေဖြင့် ပြောင်းစိုက်ပျိုးမှုမှာ တစ်နိုင်ငံလုံး စိုက်ပျိုးမှု၏ (၆၀) ရာခိုင်နှုန်းခန့်ရှိသဖြင့် အဓိက ပြည်နယ်တစ်ခုဖြစ်ကြောင်း၊ ပြောင်းသီးနှံစိုက်ပျိုးထုတ်လုပ်ရာတွင် အရေအတွက်ထက် အရည်အသွေးကောင်းသည့် သီးနှံများရရှိရေးအတွက် လိုအပ်သည့် သွင်းအားစုများ၊ မျိုးကောင်း မျိုးသန့်များ ရရှိရန်လိုအပ်သလို စိုက်ပျိုးမှု စနစ်သည်လည်း စနစ်ကျရန် အရေးကြီးသည်ကို တွေ့ရှိရကြောင်းနှင့် ရင်းနှီးမြှုပ်နှံမှုများအတွက် ရှမ်းပြည်နယ်အစိုးရအဖွဲ့မှ ကူညီဆောင်ရွက်ပေးသွားမည်ဖြစ် ကြောင်းလည်း ပြောကြားခဲ့သည်။ 

မြန်မာနိုင်ငံ ပြောင်းလုပ်ငန်းရှင်အသင်းမှ တာဝန်ရှိသူများအနေဖြင့် ပြောင်းအသင်းဝင်များမှ အခြေခံပြီး ပြောင်းစိုက်တောင်သူတစ်ရပ်လုံး မျိုးကောင်းမျိုးသန့်ရရှိရေး အပါအဝင် အရည်အသွေးမှန်ကန်သည့် သွင်းအားစုဖြန့်ဖြူးသည့်လုပ်ငန်းရှင်များနှင့် ဆက်သွယ်ဆောင်ရွက်ပြီး ပူးပေါင်းဆောင်ရွက်စေလိုကြောင်းလည်း ၎င်းက ဆက်လက်ပြောကြားခဲ့သည်။

ပြည်ပသို့ တင်ပို့ရာတွင် ပင်လယ်ရေကြောင်းအပြင် တရုတ်နိုင်ငံသို့ မူဆယ်၊ ချင်းရွှေဟော်ဒေသများ၊ ထိုင်းနိုင်ငံသို့ မြဝတီမြို့နှင့် တာချီလိတ်မြို့တို့မှ တင်ပို့နေပြီး ယခုအခါ တာချီလိတ် နယ်စပ်ကုန်သွယ်ရေးစခန်းတွင် စစ်ဆေးခံ၍ လာအို၊ ထိုင်းနှင့် မြန်မာ နယ်စပ်ဒေသ ဝမ်ပုံဆိပ်ကမ်းမှတစ်ဆင့်လည်း လမ်းကြောင်းအသစ်အနေဖြင့် တင်ပို့နိုင်မည်ဖြစ်ကြောင်း သိရသည်။