ပြင်ပဈေးကွက်တွင် ရွှေဈေးနှုန်းမြင့်တက်လာချိန်တွင် နစက လက်အောက်ရှိ မြန်မာ့ကျောက်မျက်ရတနာရောင်း ဝယ်ရေးလုပ်ငန်းမှ ရွှေဒင်္ဂါးများကို တစ်ကျပ်သားလျင် (၂၅) သိန်းကျပ် ဈေးဖြင့် ရောင်းချပေးနေကြောင်း သိရသည်။
အဆိုပါ ရွှေဒင်္ဂါး အသစ်ထုတ်လုပ်ရောင်းချခြင်းမှာ ဇန်နဝါရီလ (၄) ရက်နေ့က ကျရောက်ခဲ့သည့် စိန်ရတုလွတ်လပ်ရေးနေ့ အထိမ်းအမှတ်အနေဖြင့် ရောင်းချပေးခြင်းဖြစ်ကြောင်း မြန်မာနိုင်ငံ ဗဟိုဘဏ်က ဇန်နဝါရီ (၆) ရက်တွင် ထုတ်ပြန်ကြေငြာထားသည်။
ဗဟိုဘဏ်၏ ထုတ်ပြန်ချက်အရ အဆိုပါ စိန်ရတု လွတ်လပ်ရေးနေ့အထိမ်းအမှတ် ရွှေဒင်္ဂါးများကို ဇန်နဝါရီလ (၅) ရက်မှ စတင်ကာ ရန်ကုန်၊ မန္တလေးနှင့် နေပြည်တော်ရှိ မြန်မာ့ကျောက်မျက်ရတနာ ရောင်းဝယ်ရေးလုပ်ငန်း၏ အရောင်းဆိုင်များတွင် ယခင် ပုံစံဟောင်းရွှေဒင်္ဂါးများနှင့်အတူ ရောင်းချပေးလျက်ရှိကြောင်းလည်း သိရသည်။
ဈေးနှုန်းအနေဖြင့် တစ်ကျပ်သားလျင် ၂၅ သိန်းနှုန်း ပေါက်ဈေးရှိပြီး အလျှော့တွက်လက်ခမှာ ၈၀၀၀၀ ကျပ်ဖြင့် တစ်ကျပ်သား ရွှေဒင်္ဂါး တစ်ပြားလျင် ၂၅၈၀၀၀၀ ကျပ်၊ ငါးမူးသား ရွှေဒင်္ဂါး တစ်ပြားလျင် ၁၂၉၂၀၀၀ ကျပ်ဖြင့်လည်းကောင်း၊ တစ်မတ်သား ရွှေဒင်္ဂါး တစ်ပြားလျင် ၆၄၇၀၀၀ ကျပ်ဖြင့်လည်းကောင်း အသီးသီး ရောင်းချပေးနေကြောင်း သိရသည်။
လက်ရှိ ပြင်ပဈေးကွက်တွင် အခေါက်ရွှေ တစ်ကျပ်သားလျှင် ၂၇၅၀၀၀၀ ကျပ် ဝန်းကျင်ဖြင့် အရောင်းအဝယ်ဖြစ်နေပြီး ရန်ကုန်ရွှေအသင်း၏ ယနေ့ရည်ညွှန်းဈေးနှုန်းမှာ တစ်ကျပ်သားလျင် ၂၁၉၀၀၀၀ ကျပ်ဖြစ်သည်။
အစိုးရ အနေဖြင့် ယခုကဲ့သို့ ရွှေဒင်္ဂါးပြားများ အသစ်သွန်းလောင်းကာ ရောင်းချပေးခြင်းသည် စုဆောင်းလိုသူများအတွက် ရည်ရွယ်ခြင်း ဖြစ်သည့် အတွက် ဈေးကွက်အတွင်း ဖြစ်ပေါ်နေသည့် ဈေးနှုန်းကို သိသိသာသာအပြောင်းအလဲ မဖြစ်စေနိုင်ကြောင်း ရွှေလုပ်ငန်းရှင်အချို့က သုံးသပ်ကြသည်။
” ရွှေဒင်္ဂါးတွေကတော့ စုဖို့အတွက်ပဲပေါ့နော် ။ ပြန်လည်ပြုပြင်ပြီးတော့ သုံးလို့မရဘူး။ပိုက်ဆံလိုပဲပေါ့နော်။ ဖျောက်ဖျက် ဖျက်ဆီးလို့မရဘူး။ ဝယ်ယူတဲ့အခါမှာလည်း မှတ်ပုံတင်တို့ ဘာတို့နဲ့ စည်းစနစ်တကျဝယ်ရတာဆိုတော့ ရင်းနှီးမြှုပ်နှံမှု တစ်ခုအနေနဲ့ စုလိုတဲ့သူတွေအတွက်တော့ အသုံးဝင်မှာပါ။ တကယ်အသုံးချပြီး အရောင်းအဝယ်လုပ်တဲ့သူတွေအတွက်တော့ မသက်ရောက်ဘူး ပေါ့နော်။ သူကတော့ ဒီဈေး ဖြစ်နေတဲ့အတွက် ဒါကတော့ ဈေးအခံတစ်ခုအနေနဲ့တော့ ဖြစ်သွားမှာပေါ့” ဟု ရန်ကုန်တိုင်းအတွင်းရှိ ရွှေလုပ်ငန်းရှင်တစ်ဦးက ပြောသည်။
ပြီးခဲ့သည့် ၂၀၂၂ ခုနှစ် စက်တင်ဘာလအတွင်းကလည်း တစ်ကျပ်သား (၃၇) သိန်းအထိ စံချိန်တင်မြင့်တက်ခဲ့သည့် ပြင်ပရွှေဈေးနှုန်းကို ထိန်းချုပ်နိုင်ရန် အစိုးရက ရွှေဒင်္ဂါးများ ထုတ်ရောင်းပေးခဲ့ပြီး အဆိုပါ ရွှေဒင်္ဂါးများကို လက်ရှိအချိန်ထိ ဆက်လက်ရောင်းချနေဆဲ ဖြစ်သည်။
၂၀၂၂ ခုနှစ်နှစ်ကုန်ပိုင်းအထိ (၂၆) သိန်းကျော်ဖြင့် တည်ငြိမ်နေခဲ့သည့် ပြည်တွင်းရွှေဈေးနှုန်းများသည် ပြီးခဲ့သည့် ဇန်နဝါရီ (၁) ရက်မှစတင်ကာ တစ်ကျပ်သား (၂၇) သိန်း အထက်သို့ ရောက်ရှိကာ ယနေ့ ဇန်နဝါရီ (၇) ရက်အထိ တက်ရိပ်ပြနေဆဲလည်း ဖြစ်သည်။
