ဈေးကွက်အတွင်း ဈေးကစားသူများကို တိကျစွာသိရှိနိုင်ရန်အတွက် ရွှေအတုံး၊ ရွှေခဲရောင်းဝယ်မှုအား Online Trading ဖြင့် ဆောင်ရွက်ပြီး ဈေးနှုန်းနှင့် ငွေပေးချေမှုများကို စိစစ်သွားမည်ဖြစ်ကြောင်း ဗဟိုဘဏ်ဥက္ကဋ္ဌ ဒေါ်သန်းသန်းဆွေက ပြောသည်။
ယမန်နေ့ ဩဂုတ်လ (၁၂) ရက်က မြန်မာနိုင်ငံတော် ဗဟိုဘဏ် ဥက္ကဋ္ဌ ဒေါ်သန်းသန်းဆွေ ဦးဆောင်၍ ရွှေနှင့် ငွေကြေးဈေးကွက် စောင့်ကြည့်၊ ထိန်းသိမ်း၊ ကြပ်မတ်ရေးလုပ်ငန်းကော်မတီ ဥက္ကဋ္ဌ၊ အတွင်းရေးမှူးနှင့် ဌာနဆိုင်ရာ ညွှန်ကြားရေးမှူးချုပ်များ၊ အဖွဲ့ဝင်များ တွေ့ဆုံဆွေးနွေးပွဲတွင် ထည့်သွင်းပြောကြားခဲ့ခြင်းဖြစ်သည်။
နိုင်ငံခြားငွေကြေးဈေးကွက်တွင် Online Trading အစီအစဉ်ဆောင်ရွက်သကဲ့သို့ ရွှေတုံး၊ ရွှေခဲရောင်းဝယ်မှုများအတွက် Online Trading အစီအစဉ် ဆောင်ရွက်ရန်လိုအပ်ပြီး ရွှေဈေးကွက်တည်ငြိမ်ခိုင်မာရေးအတွက် အလေးချိန်သတ်မှတ်ချက် စံချိန်စံညွှန်း၊ အရည်အသွေး သတ်မှတ်ချက်စံချိန် စံညွှန်းနှင့် ဈေးနှုန်းသတ်မှတ်တွက်ချက်သည့် လုပ်ငန်းအစီအစဉ်များအတိုင်း တရားဝင်မှတ်ပုံတင်လက်မှတ်ရှိသူများသာ Online Trading အစီအစဉ်တွင် တရားဝင် စံချိန်စံညွှန်း သတ်မှတ်ချက်များနှင့်အညီ ရောင်းဝယ်ခွင့်ပြုမည်ဟုလည်း သိရသည်။
ကြီးကြပ်စစ်ဆေးသူများ အနေဖြင့်လည်း ဈေးနှုန်းများ မတည်ငြိမ်စေရန်နှင့် ကမောက်ကမဖြစ်စေရန် ဈေးကစားသူများတွင် ရွှေဆိုင်များပါဝင်နေခြင်း ရှိ/ မရှိ၊ သက်ဆိုင်ရာ လုပ်ငန်းလိုင်စင်များနှင့် လိုအပ်သည့် မှတ်ပုံတင်လက်မှတ်များ ရှိ/ မရှိ၊ အမှန်တကယ် တရားဝင်အရောင်းအဝယ်ပြုလုပ်နေသည့် ဈေးနှုန်းများ၊ ငွေပေးချေသည့် နည်းလမ်းများစသည့်အချက်များကို သေချာစွာစိစစ်ရန် လိုအပ်ကြောင်း ၎င်းကဆိုသည်။
လက်ရှိတွင် ပြည်တွင်း ရွှေဈေးကွက်အတွင်း ဈေးနှုန်းအဆမတန် မြင့်တက်လျှက်ရှိရာ မီးလင်းအခေါက်ရွှေ တစ်ကျပ်သားလျှင် (၃၇) သိန်းကျပ်ကျော်အထိ မြင့်တက်နေပြီး ယင်းကဲ့သို့ မြင့်တက်နေရခြင်းမှာ ဒေါ်လာဈေးမတည်ငြိမ်မှု၏ အကျိုးဆက်ကြောင့်ဖြစ်ကြောင်း သုံးသပ်မှုများလည်း ရှိသည်။
ပြီးခဲ့သည့် လဆန်းပိုင်းက စတင်ခဲ့သည့် နှစ်သောင်းတန်ငွေစက္ကူသစ် ဂယက်နှင့် အာရှလမ်းသစ်ပျက်စီးမှုကြောင့် ထိုင်း – မြန်မာ ကုန်သွယ်မှုရပ်တန့်စေခဲ့သည့် ဖြစ်စဉ်ဂယက်ကြောင့် နိုင်ငံခြားငွေကြေး ဈေးကွက်အတွင်း ဈေးနှုန်းများ မတည်မငြိမ်ဖြစ်ပေါ်လျှက်ရှိရာ အမေရိကန်ဒေါ်လာဈေးနှုန်းမှာ တစ်ဒေါ်လာလျှင် မြန်မာငွေ (၃၆၀၀) ကျော်အထိ မြင့်တက်နေခြင်း ဖြစ်သည်။
ယင်းကဲ့သို့ ဒေါ်လာဈေး မြင့်တက်မှုကို အကြောင်းပြကာ မဟုတ်မမှန်သတင်းများ ထုတ်လွှင့်ကာ ရွှေဈေးကစားသူများက ဈေးစွဲတင်မှုများ လုပ်ဆောင်နေခြင်းကြောင့် ပြည်တွင်း ရွှေဈေးနှုန်းမှ အဆမတန် မြင့်တက်လာခြင်း ဖြစ်ကြောင်း သုံးသပ်မှုများလည်း ရှိသည်။
ယင်းကဲ့သို့ ရွှေဈေး ကစားသူများ၏ မဟုတ်မမှန်ဈေးနှုန်း ဖော်ပြပြီး အကျိုးအမြတ်ရရှိစေရန် မသမာသော နည်းလမ်းဖြင့် ဆောင်ရွက်နေသူများအား စစ်ဆေးဖော်ထုတ်ပြီး သက်ဆိုင်ရာ ဥပဒေများနှင့်အညီ ထိရောက်စွာအရေး ယူဆောင်ရွက်နိုင်ရေး လုပ်ဆောင်ရန်လည်း ဗဟိုဘဏ် ဥက္ကဋ္ဌက အစည်းအဝေးတက်ရောက်လာသည့် သက်ဆိုင်ရာ တာဝန်ရှိသူများအား မှာကြားခဲ့ကြောင်း သိရသည်။
