ရွှေဆံပင် ဆရာတော် ဦးဆောင်သော စေတနာရှင် အလှုရှင်များသည် လာမည့် မတ်လ (၁၁)ရက် နှင့် (၁၂)ရက်တွင်ရှမ်းပြည်နယ် တောင်ပိုင်းရှိ အင်းလေးဒေသ ရေဘေးပြန်လည် ထူထောင်ရေးနှင့် ရှင်ပြုအလှူ ပြုလုပ်သွားမည်ဖြစ်ကြောင်း သိရသည်။
“အင်းလေးက က-လေးတွေတင် မကဘူး။ ကယားဘက်ကနေ အင်းလေးထဲမှာ စစ်ရှောင်နေတဲ့ က-လေးတွေရောပါတယ်။ ကယားဘက်က ကလေ-းမိဘတစ်ယောက်ကပြောတယ်။ သူတို့ကလေ-းရှင်ပြုဖို့ထားတဲ့ ပိုက်ဆံက ပြေးရင်းလွှားရင်းသုံးလို့ ကုန်သွားလို့ ရှင်မပြုနိုင်တော့ဘူး ထင်နေကြ၊ အားငယ်နေကြတာ၊ အခုလိုဘုန်းဘုန်းက ရှင်ပြုပေးမယ်ဆိုတော့ ဝမ်းသာပြီး မျက်ရည်တောင်ကျတယ်လို့ပြောတယ်” ဟု ရွှေဆံပင် ဆရာတော်အရှင်ဝေပုလ္လက မိန့်ကြားသည်။
အင်းလေး ရေဘေးအတွက် အရေးပေါ်ကာလက လိုအပ်ချက်များကို စေတနာရှင်များ၏ အလှူမေတ္တာဖြင့် ကျပ်သိန်း(၁၀၀၀)ကျော် အကုန်ကျခံကာ ထိရောက်စွာ လှူဒါန်းခဲ့ပြီး ပြန်လည်တည်ထောင်ရေးတွင်လည်း လိုအပ်နေသောအင်းလေးတောင်ပိုင်းက ရေတန်းရွာကို ဦးစားပေးကာ အလှူခံရရှိထားသည့်ကျပ်သိန်း (၃၀၀) ကျော်ဖြင့်အကျိုးဆောင်ဆရာတော် ဦးအာစိဏ္ဏနှင့် ဒေသခံရွာသားများ၏ ကူညီဝိုင်းဝန်းမှုဖြင့် အိမ် (၂၂)လုံး တည်ဆောက်ပြုပြင်ပေးနိုင်ခဲ့ကြောင်း သိရသည်။
အလှူရှင်များအနေဖြင့် မိမိတို့လှူဒါန်းထားသော အိမ်များကို အိမ်ရှင်များနှင့် မြင်တွေ့ပီတိယူရင်း ရေတန်းရွာဝန်းကျင် ကျေးရွာ (၆) ရွာက ရှင်မပြုနိုင်သေးသော ကလေး (၆၅) ဦးကို ရှင်ပြုပွဲကျင်းပနိုင်ရန် စီစဉ်နေခြင်းဖြစ်သည်။
ရှင်ပြုပွဲအလှုအတွက် မည်သူမဆို ရှင်ဒါယကာ၊ ရှင်ဒါယိကာမအဖြစ် ခံယူလိုပါက ရှင်တစ်ပါးလျင် ကျပ်သုံးသိန်းလှူဒါန်းကုသိုလ်ပါဝင်နိုင်ကြောင်း ရွှေဆံပင်ဆရာတော်နှင့်အဖွဲ့ကအသိပေးထားသည်။
ရှင်ပြုပွဲတွင် ကျေးရွာ (၆)ရွာမှ လူဦးရေ (၂၀၀၀) ခန့်ကိုထမင်းစတုဒီသာ (၄) နပ် ကုသိုလ်ပြုကြမည်ဖြစ်၍ စတုဒီသာ တစ်နပ်လျင် ကျပ်သိန်း(၃၀) ဖြင့် တဦးတည်းသော်လည်းကောင်း၊ စွမ်းနိုင်သရွေ့ထည့်ဝင်ကာစုပေါင်း၍သော်လည်း ကောင်းကုသိုလ်ပါဝင်နိုင်ကြရန်လည်းအသိပေးထားသည်။
ကုသိုလ်ပါဝင်လိုသူများအနေဖြင့် ဖုန်းနံပါတ် ၀၉၇၇၇၀၀၀ ၅၂၈ နှင့် ၀၉၇၇၇၀၀၀၅၂၉ သို့ ဆက်သွယ်နိုင်သလို kpay နံပါတ် ၀၉၄၀၀၄၇၁၄၂၂ (ရှင်ဝေပုလ္လ) ထံသို့ တိုက်ရိုက် ဆက်သွယ်ကုသိုလ် ပြုနိုင်ကြောင်း သိရသည်။