ပြည်ထောင်စုမပြိုကွဲရေး၊ တိုင်းရင်းသားစည်းလုံး ညီညွတ်မှုမပြိုကွဲရေး၊ အချုပ်အခြာအာဏာ တည်တံ့ ခိုင်မြဲရေးဟူသော ဒို့တာဝန်အရေးသုံးပါးကို တပ်မတော်၏ အမျိုးသားရေးမူဝါဒအဖြစ် အမြဲ ဦးထိပ်ပန်ဆင်ပြီး နိုင်ငံတော်အတွက် အသက်ပေး ကာကွယ်စောင့်ရှောက်ကြရန် တပ်မတော်သားများအား ဗိုလ်ချုပ်မှူးကြီး မင်းအောင်လှိုင်က တိုက်တွန်း ပြောကြားလိုက်သည်။
မတ်လ (၂၇) ရက်က ကျရောက်သည့် (၇၉) နှစ်မြောက် တပ်မတော်နေ့ စစ်ရေးပြ အခမ်းအနားတွင် တက်ရောက် မိန့်ခွန်းပြောကြားစဉ် ပြောကြားခဲ့ခြင်း ဖြစ်သည်။
ယခုအခြေအနေများအရ တပ်မတော်၏ အင်အားချိနဲ့နေပြီဟု ခန့်မှန်းသုံးသပ်မှုများလည်း ရှိနေသော်လည်း တပ်မတော်ကာကွယ်ရေး ဦးစီးချုပ်က တပ်မတော်ကို အင်အားတောင့်တင်းပြီး စွမ်းရည်ထက်မြက်သည့် ခေတ်မီမျိုးချစ်တပ်မတော် တည်ဆောက်မည်ဟု ယမန်နေ့ညက ကျင်းပသည့် စစ်ရေးပြအခမ်းအနား မိန့်ခွန်းတွင် ထည့်သွင်း ပြောကြားခဲ့သည်။
ယင်းသို့ဆောင်ရွက်ရာတွင်လည်း နည်းပညာအခြေပြုသည့် ခေတ်မီတပ်မတော် ဖြစ်ရေးကို လေ့လာ၊ လေ့ကျင့်၊ လိုက်နာ ဆိုသည့် ဆောင်ပုဒ်အတိုင်း ကြိုးပမ်းဆောင်ရွက်သွားကြရန်လည်း မှာကြားခဲ့သည်။
ထို့အပြင် လတ်တလော အကောင်အထည်ဖော်ဆောင်ရွက်နေသည့် ပြည်သူ့စစ်မှုထမ်း ဥပဒေနှင့် အရန်တပ်ဖွဲ့ ဥပဒေတို့ကို အကောင်အထည်ဖော်ဆောင်ရွက်နေမှုကြောင့် တိုင်းပြည်၏ ကာကွယ်ရေး အင်အားမှာ အထိုက်အလျောက် မြင့်တက်လာမည်ဟုလည်း ၎င်းကဆိုသည်။
ယင်းမှတဆင့် နိုင်ငံတော်တည်ငြိမ်အေးချမ်းရေးနှင့် တရားဥပဒေစိုးမိုးရေးအတွင် လုပ်သင့်လုပ်ထိုက်သည်များကို တစ်ဆင့်ချင်း ဆောင်ရွက်သွားမည်ဟုလည်း ဗိုလ်ချုပ်မှူးကြီး မင်းအောင်လှိုင်က ပြောကြားခဲ့သည်။
ထို့အပြင် တပ်မတော်အနေဖြင့် နိုင်ငံတော်၏ အမျိုးသားရေးရည်မှန်းချက်(၂)ရပ် ဖြစ်သည့် တိုင်းပြည်သာယာဝပြောရေးနှင့် စားရေ ရိက္ခာ ဖူလုံရေးလုပ်ငန်းစဉ်များတွင် နိုင်ငံတော်အစိုးရ၊ တိုင်းရင်းသားပြည်သူ လူထုတို့နှင့်အတူ တက်ကြွစွာ ပူးပေါင်းဆောင်ရွက်သွားမည်ဖြစ်သည်။
ရွေးကောက်ပွဲအောင်မြင်စွာကျင်းပနိုင်ရန်ဆောင်ရွက်နေချိန် နှောင့်နှေးကြန့်ကြာမူဖြစ်စေသည့်ဒီမိုကရေစီအမည်ခံ ပြည်တွင်းအဖျက်သမားတွေနဲ့ ပြည်ပလက်ဝေခံ အကြမ်းဖက်အဖွဲ့အစည်းများကို တိုက်ဖျက် ချေမှုန်းသွားမည်ဟုလည်း ဗိုလ်ချုပ်မှူးကြီး မင်းအောင်လှိုင်က ပြောသည်။
ထို့အပြင် နိုင်ငံတော်၏ ပကတိလိုအပ်ချက်ဖြစ်သည့် တည်ငြိမ် အေးချမ်းရေး၊ စည်းလုံးညီညွတ်ရေးနှင့် ဖွံ့ဖြိုးတိုးတက်ရေး၊ ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စုကြီးပေါ်ထွန်းလာစေရေး အတွက် လွတ်လပ်ပြီး တရားမျှတသည့် ပါတီစုံ ဒီမိုကရေစီအထွေထွေ ရွေးကောက်ပွဲ ကျင်းပနိုင်ရေးအတွက် တပ်မတော်က လိုအပ်သည်များ ကူညီဆောင်ရွက်သွားမည်ဟုလည်း ယမန်နေ့ညပိုင်းက ပြုလုပ်သည့် တပ်မတော်နေ့ အထိမ်းအမှတ် စစ်ရေးပြအခမ်းအနားတွင် ဗိုလ်ချုပ်မှူးကြီး မင်းအောင်လှိုင်က ထည့် သွင်းပြောကြားသွားသည်။