ရွေးကောက်ပွဲတွင် နိုင်ငံရေးပါတီအားလုံးဝင်ရောက်ယှဉ်ပြိုင်စေလိုသော်လည်း ဥပဒေနှင့်ညီညွတ်မှသာ ဝင်ရောက်ယှဉ်ပြိုင်ခွင့်ရရှိမည်ဖြစ်ကြောင်း UEC ဥက္ကဋ္ဌ ဦးသန်းစိုးက ပြောကြားခဲ့သည်။
ပြည်ထောင်စုရွေးကောက်ပွဲကော်မရှင် (UEC) နှင့် နိုင်ငံရေးပါတီများ ယမန်နေ့ အောက်တိုဘာ(၁၈)ရက်က တွေ့ဆုံစဉ် ယခုလို ပြောကြားခဲ့ခြင်း ဖြစ်သည်။
နိုင်ငံရေးပါတီများအနေဖြင့် လုပ်ငန်းများဆောင်ရွက်ရာတွင် ပိုမိုလွယ်ကူစေရန်အတွက် သတ်မှတ်ကာလအတွင်း တင်ပြရမည့် ပါတီဝင်အင်အား၊ ဖွင့်လှစ်ရမည့် ပါတီရုံးခန်းအရေအတွက်များကို ပြင်ဆင်ဖြေလျှော့ပေးခဲ့သော်လည်း မတင်သွင်းနိုင်သည့် ပါတီ (၄)ပါတီကို ဖျက်သိမ်းခဲ့ရကြောင်းလည်း UEC ဥက္ကဋ္ဌ ပြောသည်။
ထို့ပြင် နိုင်ငံရေးပါတီများအနေဖြင့် PR မဲဆန္ဒနယ်များအတွက် ဦးစားပေးအစီအစဉ်အတိုင်း ဖော်ပြထားသည့် ကိုယ်စားလှယ်လောင်းအမည်စာရင်းကို နိုဝင်ဘာ (၃၀)ရက် မတိုင်မီ ကော်မရှင်သို့ပေးပို့နိုင်ရေးအတွက်လည်း UCE က ထပ်မံအသိပေးထားကြောင်း သိရသည်။
လာမည့်ရွေးကောက်ပွဲ အပိုင်း(၁)ကို ဒီဇင်ဘာ(၂၈)ရက်တွင် မြို့နယ်(၁၀၂)မြို့နယ်၌ စတင်ကျင်းပမည်ဖြစ်ပြီး ရွေးကောက်ပွဲ ဆက်လက်ကျင်းပမည့် အပိုင်းလိုက်နေ့ရက်များကိုလည်း ထုတ်ပြန်ပေးသွားမည်ဖြစ်ကြောင်း သိရသည်။