ရွေးကောက်ပွဲကျင်းပပြီးချိန်၌ လွှတ်တော်များအထမြောက်စေရေးအတွက်ဆောင်ရွက်ရမည်ဟု နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ယနေ့ မေ ၂၃ ရက်မွန်းလွဲပိုင်းက တြိဂံဒေသတိုင်းစစ်ဌာနချုပ်၊ ကျိုင်းတုံတပ်နယ်မှ အရာရှိ၊ စစ်သည်၊ မိသားစုဝင်များအားတွေ့ဆုံအမှာစကားပြောကြားစဥ် ထည့်သွင်းပြောကြားခဲ့ခြင်းဖြစ်သည်။
ရွေးကောက်ပွဲနှင့်ပတ်သက်၍ ပါတီစုံဒီမိုကရေစီအထွေထွေရွေးကောက်ပွဲ ကို အမြန်ဆုံးပြုလုပ်နိုင်ရန် ကြိုတင်ပြင်ဆင်ခြင်းများကိုဆောင်ရွက်လျက်ရှိပြီး သန်းခေါင်စာရင်းကောက်ယူပြီးသည့်အတွက် ယခုနှစ်ကုန်ပိုင်းတွင် ကျင်းပပြုလုပ်သွားမည်ဟု နစကဥက္ကဌက ထည့်သွင်းပြောကြားသည်။
ထို့ပြင် သန့်ရှင်းသောရွေးကောက်ပွဲဖြစ်စေရေးအတွက် ဆန္ဒမဲပေးရာ၌ Electronic Voting Machine ဖြင့် မဲပေးနိုင်ရေးကိုဆောင်ရွက်လျက်ရှိကာ ယင်း Electronic Voting Machine ဖြင့်မဲပေးခြင်းသည် မဲစာရင်းမှားယွင်းမှုများကို အနည်းဆုံးဖြစ်စေနိုင်သည်ဟု ပြောသည်။
” ရွေးကောက်ပွဲကျင်းပပြီးချိန်မှာ ပြည်ထောင်စုအဆင့်နဲ့ တိုင်းဒေသကြီးပြည်နယ်လွှတ်တော်တွေခေါ်ယူရာမှာ လွှတ်တော်အထမြောက်စေဖို့အတွက်ဆောင်ရွက်ကြရပါမယ်။ ရွေးကောက်ပွဲအောင်မြင်စွာကျင်းပနိုင်ဖို့ကို အားလုံးကဝိုင်းဝန်းကြိုးပမ်းဆောင်ရွက်ကြရပါမယ်” ဟု နစက ဥက္ကဋ္ဌကမှာ ကြားသည်။
ထို့အတူ ဆန္ဒမဲပေးရာ၌ ဒေသနှင့် နိုင်ငံတော်၏အကျိုးကိုအမှန်တကယ်ဖော်ဆောင်ပေးနိုင်သည့် ကိုယ်စားလှယ်လောင်းများကိုရွေးချယ်ရန်လိုကာ တပ်မတော်အနေဖြင့်လည်း နိုင်ငံဖွံ့ဖြိုးတိုးတက်ရေး၊ ရွေးကောက်ပွဲအောင်မြင်စွာကျင်းပနိုင်ရေးနှင့် တည်ငြိမ်အေးချမ်းရေးအတွက် အမာခံအနေဖြင့် ဆောင်ရွက်ပေးရမည်ဟု နစက ဥက္ကဋ္ဌက မှာကြားခဲ့သည်။