ရုရှားနှင့် မဟာဗျူဟာမိတ်ဖက်ဆက်ဆံရေးကို အီရန် ပါလီမန် အတည်ပြု

မော်စကိုနှင့်တေရန်တို့အကြား နှစ် ၂၀ကြာရှည်သော မဟာဗျူဟာမြောက် မိတ်ဖက်ဆောင်ရွက်မှုကို အီရန်ပါလီမန်က ဗုဒ္ဓဟူးနေ့တွင် အတည်ပြုလိုက်ကြောင်း နိုင်ငံပိုင်မီဒီယာက ဖော်ပြခဲ့သည်။ သဘောတူညီချက်အရ ကာကွယ်ရေးဆိုင်ရာ ပူးပေါင်းဆောင်ရွက်မှု ကို ပိုမိုနီးကပ်စွာ ဆောင်ရွက်ရန်ဖြစ်ပြီး နှစ်နိုင်ငံဆက်ဆံရေး နက်ရှိုင်းလာမှုကို စာချုပ်ကပြသလိုက်သည်။
          
ရုရှားသမ္မတ ဗလာဒီမာပူတင်နှင့် အီရန်သမ္မတ မာဆွတ် ပီဇက်ရှ်ကီယန်တို့သည် မဟာဗျူဟာမြောက် မိတ်ဖက်ဆက်ဆံရေးစာချုပ်ကို ဇန်နဝါရီလ ၁၇ ရက်နေ့တွင် လက်မှတ်ရေးထိုးခဲ့ကြသည်။
        
ရုရှား လွှတ်တော်က အဆိုပါသဘောတူညီချက်ကို ဧပြီလတွင် အတည်ပြုထားခဲ့သည်။ သဘောတူညီချက်တွင် အပြန်အလှန်ကာကွယ်ရေးစာပိုဒ် မပါဝင်သော်လည်း နှစ်နိုင်ငံသည် ဘုံစစ်ရေးဆိုင်ရာ ခြိမ်းခြောက်မှုများကို ဆန့်ကျင်ရန်၊ ၎င်းတို့၏ စစ်ဖက်နည်းပညာဆိုင်ရာ ပူးပေါင်းဆောင်ရွက်မှု တိုးတက်စေရန်နှင့် စစ်ရေးလေ့ကျင့်မှုများတွင် ပါဝင်ရေးတို့တွင် လက်တွဲဆောင်ရွက်သွားကြမည်ဟု သဘောတူထားကြသည်။
              
သဘောတူစာချုပ်တွင် ဘဏ်အချင်းချင်း တိုက်ရိုက်ပူးပေါင်းဆောင်ရွက်မှုကို ခိုင်မာအားကောင်းစေခြင်းနှင့် ၎င်းတို့၏ နိုင်ငံတော် ဘဏ္ဍာရေးဆိုင်ရာ ထုတ်လုပ်မှုများကို မြှင့်တင်ခြင်းအားဖြင့် စီးပွားရေးမိတ်ဖက်ဆက်ဆံမှုကို မြှင့်တင်ရန်ရည်ရွယ်သည့် စာပိုဒ်များစွာလည်း ပါဝင်သည်။
           
အီရန်နှင့် ရုရှားဦးဆောင်သော Eurasian စီးပွားရေးသမဂ္ဂတို့အကြား လွတ်လပ်စွာကုန်သွယ်မှု သဘောတူညီချက်သည် ပြီးခဲ့သည့် သီတင်းပတ်တွင် စတင်အကျိုးသက်‌ရောက်ခဲ့ပြီး အနောက်နိုင်ငံများ၏ ပိတ်ဆို့အရေးယူမှုများကို ပြင်းထန်စွာခံစားနေရသည့် နှစ်နိုင်ငံအကြား ကုန်သွယ်မှုကို မြှင့်တင်ရန်အတွက် အခွန်အကောက်များကို လျှော့ချဖြတ်တောက်ခဲ့သည်။

Ref: အေးရှားဝမ်း