ရုရှားနှင့်မြောက်ကိုရီးယားကိုချိတ်ဆက်မည့်တံတား စတင်တည်ဆောက်

ရုရှားနှင့် မြောက်ကိုရီးယားတို့သည် နှစ်နိုင်ငံအကြား မဟာဗျူဟာမြောက် ဆက်ဆံရေး ခိုင်မာစေရန် ကြိုးပမ်းမှု တစ်စိတ်တစ်ပိုင်းအဖြစ် နူမန်းမြစ်ဖြတ်ကားလမ်းတံတားကို ဧပြီလ ၃၀ ရက် နေ့တွင် စတင်တည်ဆောက်နေပြီဖြစ်ကြောင်း ရုရှားဝန်ကြီးချုပ်က ပြောကြားလိုက်သည်။

ကိုရီးယားစစ်ပွဲအပြီး ၁၉၅၉ ခုနှစ်တွင် စတင်ဖွင့်လှစ်ခဲ့သည့် ရထားလမ်းတံတားဖြစ်သော လက်ရှိ “ချစ်ကြည်ရေးတံတား” အနီးတွင် ယခုတံတားကို တည်ဆောက်နေခြင်းဖြစ်သည်။

တံတားသည် ရုရှား-မြောက်ကိုရီးယား ဆက်ဆံရေးတွင် အရေးပါသော ဖြစ်ရပ်တစ်ခုဖြစ်သည်ဟု တံတားသစ်တည်ဆောက်ခြင်း အခမ်းအနားတွင် ရုရှားဝန်ကြီးချုပ် မီခေးလ် မစ်ရှူစတင်က ပြောကြားသည်ဟု နိုင်ငံပိုင် တာ့စ်သတင်းဌာနက ရေးသားဖော်ပြခဲ့သည်။

“အရေးပါမှုဟာ အင်ဂျင်နီယာလုပ်ငန်းပိုင်းထက် ကျော်လွန်ပြီး ချစ်ကြည်ရင်းနှီးမှု၊ အိမ်နီးချင်းကောင်း ဆက်ဆံရေး ခိုင်မာစေမှုနှင့် ဒေသတွင်း ပူးပေါင်းဆောင်ရွက်မှု ကို မြှင့်တင်မှု စသည့်ကျွန်ုပ်တို့၏ ဘုံဆန္ဒကို ကိုယ်စားပြုပါတယ်” မစ်ရှူစတင်က ပြောဆိုခဲ့သည်။

လမ်းတံတားအသစ်သည် မီတာ ၈၅၀ ရှည်လျားမည်ဖြစ်ပြီး ရုရှားအဝေးပြေးလမ်းစနစ်နှင့် ချိတ်ဆက်မည်ဖြစ်သည်။ ၂၀၂၄ ခုနှစ်က သမ္မတ ဗလာဒီမာပူတင်၏ မြောက်ကိုရီးယားနိုင်ငံခရီးစဉ်အတွင်း တံတားတည်ဆောက်ရေးအတွက် သဘောတူညီမှုရခဲ့သည်။

တံတားအသစ်သည် ၂၀၂၆ ခုနှစ် နွေရာသီတွင် အသုံးပြုရန် အသင့်ဖြစ်လိမ့်မည်ဟု ရုရှားသတင်းစာ Kommersant က ဖော်ပြခဲ့သည်။

တံတားအသစ်ကြောင့် လုပ်ငန်းရှင်များအတွက် သယ်ယူပို့ဆောင်မှု ပမာဏ သိသိသာသာ တိုးလာစေမည်ဖြစ်ကာ သယ်ယူပို့ဆောင်ရေး စရိတ်စကများ လျှော့ချနိုင်မည်ဖြစ်ကြောင်းနှင့် ကုန်သွယ်မှုနှင့် စီပွားရေးဆက်ဆံမှု ချဲ့ထွင်ရာတွင် အထောက်အကူဖြစ်စေမည့် ထုတ်ကုန်ပစ္စည်း အမျိုးမျိုး၏ ယုံကြည်စိတ်ချရသော တည်ငြိမ်သော ထောက်ပံ့ ဖြည့်တင်းမှုများကို ရစေလိမ့်မည်ဟု မစ်ရှူစတင်က ဆက်လက် ပြောကြားခဲ့သည်။

Ref: အေးရှားဝမ်း