ရုရှားနျူကလီးယားတပ်ဖွဲ့များအသင့်ဖြစ်မှုလေ့ကျင့်ခြင်းကို ပူတင်ကြီးကြပ်

ရုရှားနျူကလီးယားတပ်ဖွဲ့များသည် ဗုဒ္ဓဟူးနေ့က သမ္မတ ဗလာဒီမာပူတင်ကိုယ်တိုင် ကြီးကြပ်သော တပ်ဖွဲ့၏ အသင့်ဖြစ်မှုစမ်းသပ်လေ့ကျင့်ခန်းကို လုပ်ဆောင်ခဲ့သည်ဟု ခရမ္မလင်က ပြောကြားခဲ့သည်။

“ဒီနေ့ စီစဉ်ထားတဲ့ အစီအစဉ်တစ်ခုကို ကျွန်တော်တို့ လုပ်ဆောင်နေပါတယ်။ စီစဉ်ထားတဲ့ နျူကလီးယားတပ်ဖွဲ့ရဲ့ ကွပ်ကဲမှုနဲ့ ထိန်းချုပ်မှု လေ့ကျင့်ခန်းတွေဖြစ်တယ်လို့ ကျွန်တော် အလေးပေးပြောကြားလိုပါတယ်” ဟု ထိပ်တန်း ဗိုလ်ချုပ်များနှင့် အွန်လိုင်းအစည်းအဝေးတွင် ပူတင်က ပြောကြားခဲ့သည်။

အဆိုပါ လေ့ကျင့်မှုတွင် နျူကလီးယားတပ်ဖွဲ့ အစိတ်အပိုင်းသုံးခုဖြစ်သည့် ကြည်း၊ ရေ၊ လေ သုံးဖွဲ့စလုံးပါဝင်ခဲ့ကြောင်း ရုရှားကာကွယ်ရေးဝန်ကြီးဌာနက ပြောကြားခဲ့သည်။

နိုင်ငံပိုင်စစ်တပ်ရုပ်သံလိုင်းဖြစ်သည့် Zvezda က ရုရှားမြောက်ပိုင်းရှိ Plesetsk Cosmodrome ပစ်လွှတ်ရေးစင်တာမှ Yars တိုက်ချင်းပစ်ပဲ့ထိန်းဒုံးကျည်တစ်စင်း ပစ်လွှတ်ခဲ့မှုနှင့် ဘာရန့်စ်ပင်လယ်ပြင်ရှိ နျူကလီးယားစွမ်းအင်သုံး Bryansk ရေငုပ်သင်္ဘောမှ Sineva ပဲ့ထိန်းဒုံးကျည်တစ်စင်း ပစ်လွှတ်ခဲ့သည့် ဗီဒီယိုများကို ထုတ်လွှင့်ပြသခဲ့သည်။

ထို့အပြင် ခရီးဝေးသွား Tu-95MS ဗုံးကြဲလေယာဉ်များက ဝေဟင်ပစ် ခရုဇ်ဒုံးကျည်များ ပစ်လွှတ်ခဲ့ကြောင်းလည်း ကာကွယ်ရေးဝန်ကြီးဌာနက ပြောကြားခဲ့သည်။

အဆိုပါ စစ်ရေးလေ့ကျင့်မှုတွင် စစ်ဘက်ကွပ်ကဲမှု၊ ထိန်းချုပ်ရေးစနစ်များနှင့် စစ်မှုထမ်းများ၏ စစ်ဆင်ရေးစွမ်းဆောင်ရည်များကို စမ်းသပ်ခဲ့ပြီး ရည်မှန်းချက်များအားလုံး ပြည့်မီခဲ့ကြောင်း ခရမ္မလင်က ပြောကြားခဲ့သည်။

ရုရှားသည် ၎င်း၏ နျူကလီးယားအကာအရံတစ်စိတ်တစ်ပိုင်းအဖြစ် တပ်ဖွဲ့များ၏ အသင့်ဖြစ်မှုလေ့ကျင့်ခန်းများကို ပုံမှန်ပြုလုပ်လေ့ရှိသည်။ ပြီးခဲ့သည့်နှစ် အောက်တိုဘာလအတွင်းက အလားတူစစ်ရေးလေ့ကျင့်မှုအတွင်း ပူတင်က ရုရှား၏ နျူကလီးယားလက်နက်တိုက်သည် မိမိတို့၏ မဟာဗျူဟာမြောက် အရံအတားရည်မှန်းချက်များကို အောင်မြင်နိုင်စေကာ ကမ္ဘာလုံးဆိုင်ရာ နျူကလီးယား တန်းတူညီမျှမှုနှင့် အာဏာချိန်ခွင်လျှာကို ထိန်းထားနိုင်စေသည်ဟု ပြောကြားခဲ့သည်။

Ref: စီအင်န်အင်န်