ရုရှားက ယူကရိန်းမှ ဥရောပသို့ ဓါတ်ငွေ့တင်ပို့နေမှုကို ရပ်မည်

အပူချိန်ကျဆင်းလာချိန်တွင် ဓါတ်ငွေ့လိုအပ်ချက်ကြီးမားလာနိုင်သော ဥရောပတိုက်အနေဖြင့် ယူကရိန်းရှိ ပိုက်လိုင်းများမှတဆင့် ရုရှားဓါတ်ငွေ့ပေးပို့နေမှုကို နှစ်ကူးချိန်နံနက်အစောပိုင်းအထိသာ နောက်ဆုံးအနေဖြင့် လက်ခံရရှိတော့မည်ဖြစ်သည်။

လွန်ခဲ့သည့် ငါးနှစ်ခန့်က နိုင်ငံများအကြား တဆင့်ခံ ဓါတ်ငွေ့ပို့လွှတ်မှုဆိုင်ရာ သဘောတူညီချက်သည် နှစ်ကူးအကြိုညတွင် သက်တမ်းကုန်မည်ဖြစ်ပြီး ရုရှားနိုင်ငံပိုင် စွမ်းအင်ကုမ္ပဏီ Gazprom က ယူကရိန်းပိုက်လိုင်းများမှတဆင့် ဥရောပသို့ တင်ပို့မှုကို နှစ်သစ်ကူးနေ့တွင် ဖြတ်တောက်ရန် မျှော်မှန်းထားသည်။

သဘောတူညီမှုရရန် အချိန် ၁၁ နာရီသာကျန်ပြီး သဘောတူညီချက်မရခဲ့ပါက ၂၀၂၂ ခုနှစ်အစောပိုင်းတွင် ရုရှားက ယူကရိန်းကို အပြည့်အ၀ ကျူးကျော်ခဲ့ပြီးနောက်ပိုင်း သမိုင်းဝင် အရွှေ့အပြောင်းတစ်ခုဖြစ်လာမှာဖြစ်သည်။ ရုရှားသည် တစ်ချိန်က ဥရောပတိုက်၏ အကြီးဆုံး ဓါတ်ငွေ့ရောင်းချနိုင်ငံဖြစ်သော်လည်း စစ်ပွဲစတင်ခဲ့ပြီးနောက်ပိုင်းတွင် ၎င်း၏ အီးယူဖောက်သည်အားလုံးနီးပါးကို ဆုံးရှုံးခဲ့ရကာ ဗဟိုဥရောပတစ်ဝန်းမှ ဓါတ်ငွေ့အဝယ်တော်များသည် အမေရိက၊ နော်ဝေနှင့် ကာတာနိုင်ငံများဘက် ခြေဦးလှည့်သွားခဲ့ကြသည်။

“ဒါဟာ ပထဝီနိုင်ငံရေးအရ အရေးပါတဲ့ အခိုက်အတန့်ဖြစ်ပါတယ်” ဟု လွတ်လပ်သော ဓါတ်ငွေ့ဈေးကွက်လေ့လာဆန်းစစ်သူ Tom Marzec Manser က ပြောဆိုသည်။ တဆင့်ခံသဘောတူညီချက် အဆုံးသတ်သွားခြင်းသည် ဥရောပနှင့် ချိတ်ဆက်ထားသည့် ရုရှားဓါတ်ငွေ့သိုက်များ၏ အဓိကလမ်းကြောင်းကို ပိတ်လိုက်ခြင်းဖြစ်ပြီး အရှေ့ဥရောပနိုင်ငံများအနေဖြင့် အနောက်မြောက်ဥရောပဈေးကွက်များမှ ဓါတ်ငွေ့များပိုမိုတင်သွင်းရတော့မည့် သဘောဖြစ်လာကြောင်း ၎င်းက ပြောဆိုခဲ့သည်။

စစ်သားများအနေဖြင့် အေးခဲသော ရာသီတွင် တိုက်ပွဲဝင်နေရသော အရှေ့ပိုင်းစစ်မျက်နှာ၌ စစ်ရေးဆုံးရှုံးမှုများဖြစ်လာခြင်းကြောင့် တိုက်ပွဲများရပ်ရေး စေ့စပ်ဆွေးနွေးများလုပ်ရန် ယူကရိန်းအပေါ် ဖိအားတိုးလာခြင်းနှင့် ဒေါ်နယ်ထရမ့်ပ်လက်ထက်တွင် အမေရိက၏ အထောက်အပံ့များ ရုပ်သိမ်းသွားနိုင်သည့် စိုးရိမ်စိတ်များတိုးလာချိန်တွင် ရုရှားနှင့် ယူကရိန်းအကြား ပိုက်လိုင်းမှဓါတ်ငွေ့ပို့လွှတ်မှုကို ဖြတ်တောက်ခဲ့ခြင်းဖြစ်သည်။

Ref: သည်ဂါဒီးယန်း